3
Wiitumaghana God yana wiiwiita kamone
19 Raghanina yagu kabikwarakwara,
da yagu wiikedakeda kubura rabarabae anoghosidi,
na noko damina ware rarima kawaororana naboni.
20 Nokodi sawara anoghosidi,
na nuwanuwagu yabero kirakii.
21 Bi gegha da yagu noghota yaveramagha da Yawe God anoghosi
na wiigeruwana adagumayeni.
 
22 Yawe God yana nuwamonika kiiravidaye na getughurinana,
bi yana wiinuwaghaneyana gegha iyakovikovina;
23 didibara patepatena yanavereyana na yanono wiikarukaru,
touna nonowa yaberabera ware metagha ivisuwonana naboni.
24 Tagumani awonena mayegu bo, “Yawe God na nonowa gwabiguve,
na getana awaki ayakayokayoveni,
noko kiiravine tagu anitumaghanena kirakiiyeni.”
 
25 Raghanina wawaya yadi tumagha Yawe God gwabine bi sinoyeni,
na touna miisena yabera toudi biiyadi.
26 Na noko biidi imiise da touda tanikoyakoyagha wiiraborabobo touna kiiravine,
basuna touna iniyawiida.
27 Imiise bi touda akowa tana kabi da Yawe God tanakabisisireni,
raghanina touda patana woudayena.
 
28 Raghanina Yawe God piropiro debadae yatoura,
na touda duma tayamakeyowogha tayiraborabobo,
29 touda tayituwapore oghogheyana,
bi mayiyida siyayowogha dobodobove na,
meboda God iyiwiiteda.
30 Raghanina wawaya tana nawanawam inarouvi, bo inisisiya berovem,
na kiwaghasineni da awaki ibera.
 
31 Kiiravine Yawe God geyana wawaya iyamiimiiri kubutena wagiyedina.
32 Raghani mududiye na kabikwarakwara yapiikeni,
bi kate bada wiinuwanuwaneyana yidebeni touda biiyadi,
basuna yana nuwamonika touda kiiravidaye na getughurinana.
33 Wiisuwona, raghani mududiye na sinivisi da nuwapoya yapiikedi wawaya biiyadi,
bi gegha, touna geiyinuwamiise da nokodi bera inaberana.