11
Ogatamee me aseta menaa yaweganaa see bagee ekea wiya deeta menaa
1 Kuwa kaboo da tamo ena, togoo-katu ebeadee siyaa tamoo da mokoo ena anii neeta kaama naseta menaa ko "Anoogeeta peedoota Ogatamee me ee kaa peemaata kaama mee ee ma, Wa paagoo agiyoo kupi-manee taa see yoo ma kuwa mee tamoo da me ebeadee taai. Bedaa kiyoo Ogatamee ebo ekee, yaapaagee see bagee kuwa miya egadee taai.
2 Kiya Wa me ee yoo da kaa tapaato yaato kuwa se ebeadii. Kuwa yoo da kaa tapaato yaato magaa kuwa uduma Waa ewo see bagee yuwa paagoo ekegataata magaa kemaata keno mée wiya ma wiya kuwa okoo me mee Wa me daamaa wa too wigintaata kota magaa mee bado batagi-patagi segee naadi pedeo kiyaabuu taatagea.
3 Okoo me kisee ukuwataakea kaboo mée ekea wiya, mena naweganaa see bagee wiya kuwa unu seribu dua ratus enam puluh Ni me menaa naweganaasi naadi pesee da ekea maniita. Ekea dimi boodi kaa karung see see ponee yuwa maataata kaama mena nawegagee taatagea" see nasigi.
4 Kuwa mée wiya kuwa ko zaitun piya wodo wiya ebea-ebea, bedaa pelita biyaa maagee yoo wiya kuwa miya ebea-ebea. Ekea ko magaa da kaa se-agiyoo, we-agiyoo uduma me Eboo Tuhan mee ikigii to kaa totaa see bagee wiya.
5 Kuwa mée wiya kuwa mée me wegee-wegee taano see dimii mee agoo kiyu ko ekea me ebeawee kaama biyaa gada pudumega naaki ekea ma yape kiyaa bagee yuwa uduma poonooga siyaa. Mée me ekea wegee-wegee taanaka see dimii gaayaa bagee kuwa kisee taa ma taa bogaapea.
6 Pesee agiyoo kuwa ekea kaa manta kemaata ekea Ogatamee me aseta menaa kuwa yaweganaaka too deka se wisi naadi epoo to yaato muntagaa siyaa pesee da mee miya ekea agoo. Uwo yuwa kuwa tadaa kiyaayaa pesee da mee miya ekea agoo. Magaa da kaa se-pedeo, we-pedeo miyaabuu siyaa pesee da mee miya ekea agoo. Ekea me kisee ukuwaanaka see dimii gaayaa kaboo kisee agiyoo agoo kiyaayaa.
7 Ekea me mena yaweganaa siyaa kuwa uduma sikii, daamaa yawegataagea kaboo paa yuwa dooyamoo taa see komoo yiba kaama pedeo see agiyoo damaa to pakaatagi. Pakaamaata kaama waa omaago yoka kuwa bagee wiya ma yape aawogee naadi kaama ekea peedi kiyaata booyaatagi.
8 Ekea booyaata kaama ekea boota kopaya wiya kuwa ebo kota magaa kaa etaa da kaa aii kisee ekeasiitagea. Mee ebo kota magaa mee ko ekea epoo Mée Tuhan mee piya bokoo to kaa paku wugitaata magaa mee. Mee magaa mee ko Sodom magaa ma, Mesir magaa ma kuwa magaa wiya ebea-ebea kuwa.
9 Ekea boota kopaya wiya kuwa mée me ogo se magaai naadi kaama unu wedo ma ebe etaa da kaa aii ekeasiitagea. Kuwa kaboo da mée tomaa-tomaa yuwa ma, mée apa tomaa-tomaa yuwa ma, mena tomaa-tomaa yuwa ma, maga tomaa-tomaa yuwa ma kisee tomaa-tomaa bagee kuwa uduma me ekea boota kopaya wiya kuwa aii deegee taatagea.
10 Ekea wiya boogea naadi kaama mée tomaa-tomaa uduma esee ede kaatagea. Kuwa mée wiya bogaano taa kaboo ekea me kuwa magaa da kaa toogee see bagee yuwa okoo kaa ae-wae, boodi abaataa see agiyoo eebaa yamiyaabuu semea kuwa me okoo ede ma, ede ma ebo pesta noogee taatagea, maniyaa agiyoo miya ede kaa aii aamanee taatagea.
11 Kisee kiya unu wedo ma ebe omemaata kaama Ogatamee me ekea aya tuyaano see naadi dimi noogaa da ekea yiba seemiyaagi naaki ekea anoogeegea. Ekea deeta bagee uduma weda ebo kegea.
12 Kuwa kaboo da epoo to wodoo kaama ebo mena wuu ena ekea yeegea, mee ko "Nakaayoo pakaai" asigi naaki ekea sinu yiba epoo to wodoo pakagea. Ekea be kepea bagee yuwa me pakaa-diitookea.
13 Kuwa kaboo da taka ena maga pigii ebo mega. Mee kota magaa kuwa gaaseagoo to yaato magaa pedeo kedaaka. Ee yuwa bugumedaa naadi kaama mée eebaa, tujuh ribu kuwa boogea. Bogaano taa bagee yuwa weda ebo kaa epoo to wodoo Ogatamee yaapaageekea.
14 Pedeo yamiyaayaa agiyoo wiyaagoo to etaa mee anii deepa yoka sikii. Wedaagoo to etaa mee miya moga meepa.
Puusee petaagoo to mee puu seta menaa
15 Kuwa kaboo da malaikat bagee petaagoo to mee wa me puusee da puu asigi naaki epoo to wodoo kaama ebo mena wuu yuwa kuwa anii yeetaa, kuwa ko kisee:
"Eto kaama wodoo uwoo to, magaa to uduma
inii epoo Mée Tuhan mee ma, Wa me wigintaata Mée Ebo Kristus mee ma Ekea too ebo mée eetoowoo taatagea,
kisee too iminoo miya, iminoo miya" see wegagea.
16 Kuwa kaboo da kuwa ebo bagee mée oga ma wui kuwa okoo me ebo animagaano yoo komoo yuwa kaa kaama esedoota Ogatamee ikigii to kaa esee-gapuunta kaama yaapaageekea.
17 Okoo me wegaano,
"Se-pesee, We-pesee yago Mée Tuhan Ogatamee mee inii kiiboo, paamee see kasege.
Aa ko Toono too Mée, idukaa kaama toowoo see Mée, eto miya totaake Mée.
Eto ko A me ebo pesee da mee me
uwoo to, magaa to uduma A too awee da kaa ebo mée eetoowooke kuwa me inii kaapaageeke.
18 Mée tomaa-tomaa yuwa okoo me Aa kakagoo kegea
kiya eto A me kagoo kuwa awee da kaa kega.
Eto ko boota bagee yuwa wigintagaa see monaa kaa kega,
bedaa daamaa kaukuwagee setaa to mokoo da maniino monaa kaa kega.
Kuwa ko A me agiyoo kaokagee see bagee yuwa, nabi bagee kuwa ma,
A ekaa da ebo kaekee see bagee yuwa ma, kisee A me daamaa wa too wigintaata bagee uduma
ebo miya, peedi miya okoo me daamaa kaukuwagee setaa to mokoo da maniino monaa kaa kega.
Bedaa uwoo to, magaa to pedeo kiyaabuu siyaa bagee kuwa miya okoo pedeo kiyaano monaa kaa kega" see kuwa okoo me yaapaageekea menaa.
19 Kuwa kaboo da epoo to wodoo kiyoo Ogatamee me ee mee kene kabataata kaama piya gupumaa to awee da kaa topa. Mee ko idukaa Ogatamee me mena kamu gaasi kuwa oma tabegea wiya kaa ebeamaata menaa kuwa kiyoo awemaata topa see gupumaa to mee. Kuwa kaboo da bego-bego dimi nagi, tukuu da esee ebo, keemuu, maga pigii, oma patagu keenda see es dekaa, kisee agiyoo kuwa uduma agoo kedaaka, see kuwa anii deepa.