5
Tã tã gólâ krístõ ꞌbá ãzâ gólĩyî lãfálé rî drí tã õnjí tẽtẽ ꞌẽzó rî tãsĩ rî
1 Má ârî tã ókĩ nĩ rî, õjílã ãzâ ãnî lãfálé sĩ õꞌê tã õnjí tẽtẽ ãnyĩ kâ trá. Ãgô ãzâ õrî ậyı̣́lı̣́ átá lâ rî õkó bê. Tã õnjí rî gógó ꞌdĩ lậvũ gạ̃rạ̃ tã õnjí õjílã gólĩyî Ôvârí rî nı̣̃ ꞌbá kô rî drí rĩꞌá ꞌẽlâ rî ꞌbá yî drı̣̃ı̣̂ sĩ.
2 Ãꞌdô gõꞌdá trá ĩtí rî, nĩ gõ nĩ rî ãníkâ ãnî lômbélé rĩrĩ ãníkâ krístõ ꞌbá ró rî tãsĩ ꞌdî ãꞌdô drí yã? Tí võ lâ ꞌá rî, tã õnjí gólĩyî ĩtí ꞌdĩ ꞌbá yî âꞌdô ãnî ꞌbãꞌá âꞌdólé tã ı̣̂sũ ró. Nĩ drô ãgô ꞌdĩ vólé ãnî lãfálé sĩ.
3-4 Gbõ lé má âꞌdó bê kô ngbãângbânõ ãnî lãfálé tólâ rî, tã ı̣̂sũ ámákâ bê ãní bê tólâ. Gõꞌdá mâ rî gógó nyãányâ lâ drı̣́-ãcê Yésũ Krístõ kâ sĩ âtâ tã trá kĩ, rĩꞌá tãndí ró tã-vó ãgô ꞌdĩ kâ kĩzó. Nĩ êꞌbê rû võ ãlô ꞌá Ôvârí rî îrátãlé, nĩ nı̣̃ tãndí ró kĩ, nõngá rî, má âꞌdô rãtáã ꞌẽꞌá Ôvârí drí ãnî pãzó, gõꞌdá drı̣́-ãcê Yésũ Krístõ kâ rî âꞌdô ꞌbãꞌá ãní bê tólâ.
5 Nĩ drô ãgô rî gógó ꞌdĩ vólé ãnî lãfálé sĩ, gõꞌdá nĩ âyê gólâ Sãtánã drı̣́gạ́, Sãtánã ĩîzã ró gólâ rî rúꞌbạ́ ꞌdĩ vólé ngá lãzé sĩ. Áâꞌdô lâŋõ ꞌdî fẽꞌá gólâ drí ĩtí, tãlâ gólâ ãâdĩ ró drı̣̃ bê tã õnjí íyíkâ ꞌdĩ ꞌásĩ, tã mbı̣̂ rî ꞌẽlé ĩꞌdî, gõꞌdá Yésũ Krístõ õpâ ró gólâ bê kậyı̣̂ drílâ ꞌẽzó âgõlé tã-vó õjílã kâ kĩlí rî tú.
6 Rĩꞌá õnjí ró ãnî drí ãgô õnjí ꞌdĩ âyézó zãâ rĩlí ãnî lãfálé, gõꞌdá ãnî drí kpá rĩzó ãnî lômbélé kĩ, ĩyî ãâꞌdô krístõ ꞌbá ꞌî. Nĩ nı̣̃ úlı̣́ mãnĩgõ gólâ âtálé nõ kĩ, “Ạ̃kú lõngá fínyáwá rî âꞌdô õdrá mõrá ꞌá dũû rî ꞌbãꞌá ângálé gõꞌdá gĩlí kpá gãlãhã.” Kpá ĩtí, tã õnjí õjílã ãlô kâ âꞌdô lậꞌbúꞌá krístõ ꞌbá ãzí îzãlé ndrĩ.
7 Âꞌdô bê trá ĩtí rî, gõꞌdá nĩ drô tã õnjí ꞌbá ꞌdĩ vólé ãnî lãfálé sĩ, tãlâ nĩ âꞌdô ró bê ngbángbá tã õnjí ãkó, nyé õzõ ãmâ Yúdạ̃ yî drí lôfõrẽ lâ ãmâ lãfálé sĩ ãmbãtã ạ̃kú ãkó rî ꞌbẽꞌbẽ lâ sĩ kãrámã lậvũ-lậvũ kôrô kâ ꞌá rî tí. Nĩ ndrê, úfû Yésũ Krístõ trá ĩꞌdî kạ́bı̣̃lı̣́kı̣̃ kãrámã lậvũ-lậvũ kôrô kâ ró, tãlâ gólâ õpâ ró ãmâ bê tã õnjí ãmákâ ꞌásĩ.
8 Ĩtí rî, mã ꞌê kãrámã lậvũ-lậvũ kôrô kâ ꞌdĩ tãndí ró. Mã njú kô zãâ ãmbãtã ãmákâ ạ̃kú bê tíbê âꞌdó ꞌbá ĩꞌdî tã ꞌẽꞌẽ õnjí ãmákâ rî rú âꞌdólé ĩꞌdî ngá nyãnyã kãrámã rî ꞌdĩ kâ ró. Bê-rî, mã trõ ãmbãtã gólâ ạ̃kú ãkó rî ĩꞌdî, gólâ âꞌdó ꞌbá tã ꞌẽꞌẽ õnjí ãmákâ ãkó rî. Ãmbãtã gólâ âꞌdó ꞌbá ạ̃kú ãkó ꞌdĩ rî, rĩꞌá rĩrĩ tãndí ãmákâ gõꞌdá tã lẽzó ĩꞌdî tã pạ̃tı̣́ı̣̃ Ôvârí kâ nõ ꞌá rî ĩꞌdî.
9 Wárãgã má drí îgĩlí sı̣́sı̣́ ãnî drí nã ꞌá rî, má kĩ ãnî drí rî, nĩ õrî kô kpãkã ãlô õjílã gólĩyî ãvẽ ꞌbá ró ꞌdĩ ꞌbá yí bê.
10 Tã gólâ má drí îgĩlí ãnî drí ꞌdĩ, tã ífí lâ âꞌdó kô kĩ, õjílã tíbê âꞌdó ꞌbá ĩyî krístõ ꞌbá ró kô rî yî ĩꞌdî. Õzõ nĩ õlẽ ãnî lãfálé cãlé tã õnjí ꞌbá gólĩyî Ôvârí rî nı̣̃ ꞌbá kô, rĩ ꞌbá ĩyî tã õnjí gólĩyî nõ ꞌbá yî ꞌẽlé rî yî, ậyı̣́lı̣́ õkó bê ngãtá ãgô bê ĩyî õkó yî ngãtá ágó yí bê drı̣̃lı̣́ sĩ, ãvẽ ꞌbá, ꞌdó-má-drí ꞌbá, ũgú, ôvârí ãbãrãdãgõ îrátã ꞌbá yî rú sĩ rî, îcá kô, té nĩ âꞌdô ãngó tã õnjí kâ nõ âyéꞌá ĩꞌdî vólé.
11 Tã õnjí ꞌbá má drí tã lâ îgĩlí ãnî drí kĩꞌá nĩ rî, nĩ õcâ ãnî lãfálé gólĩyî rú sĩ ꞌdî ꞌbá yî, ãkpã ãnî ãzí-ãzí yî gólĩyî ĩyî zı̣̃ ꞌbá krístõ ꞌbá ró gõꞌdá kpá zãâ rĩꞌá ĩyî tã õnjí ꞌẽꞌá ꞌdĩ ꞌbá yî ĩꞌdî. Õzõ krístõ ꞌbá ãzâ ãꞌdô ãnî lãfálé sĩ õrî zãâ rĩꞌá ậyı̣́lı̣́ õkó bê ngãtá ãgô bê íyî ágó ngãtá õkó drı̣̃lı̣́ sĩ, ãꞌdô ãvẽ ꞌbá ꞌî, ãꞌdô ꞌdó-má-drí ꞌbá ꞌî, õrî ôvârí ãbãrãdãgõ îrátãlé ĩꞌdî, õrî úlı̣́ õnjî-õnjî âtálé õjílã ãzí rú, õrî õdrá mvũlı̣́ õdrá drí rĩzó gólâ rî cĩlí rõô, gõꞌdá ãꞌdô ũgú ꞌî rî, ꞌdĩî õjílã gólĩyî má drí tã lâ îgĩlí ãnî drí kĩꞌá nĩ rî, nĩ õcâ ãnî lãfâ gólĩyî rú sĩ rî ꞌbá yî ĩꞌdî. Gõꞌdá nĩ nyâ ngá kpá kô gólĩyí bê võ ãlô ꞌá.
12-13 Má âtâ úlı̣́ ꞌdĩ ĩtí ꞌdĩ rî, tãlâ õjílã gólĩyî âꞌdó ꞌbá kô krístõ ꞌbá yî ró ꞌdĩ rî, tã gólĩyíkâ rî âꞌdó kô tã ámákâ rî ĩꞌdî. Ôvârí âꞌdô tã-vó gólĩyíkâ kĩꞌá nĩ. Gõꞌdá ãníkâ rî rĩꞌá tãndí ró ãnî drí krístõ ꞌbá ꞌdĩ ꞌbá yî rĩrĩ gólĩyíkâ vó lâ ậrı̣̃lı̣́. Nĩ ꞌê tã gólâ búkũ Ôvârí kâ drí âtálé rî ĩꞌdî nyé õzõ ãgô gólâ ậyı̣́ ꞌbá íyî átá rî õkó bê ꞌdĩ kâtí ꞌdĩ kĩꞌá nĩ rî,
“Nĩ drô õjílã gólĩyî rĩ ꞌbá zãâ tã õnjí ꞌẽlé ãnî lãfálé rî ꞌbá yî ãnî lãfálé sĩ vólé.”
Tã ꞌBãꞌbã Ândâ 17.7