6
Anu nbet anya
1 Taja, tme, tao, tano na; soh anu sait yno iro to, kbe anu baro nmo nmat ait. Anu baro ro ja nri bo kʼHar ro Tuhan to nmo tna watum bo kʼait nno mkah nhaf ro sneh. Nwe, “Nhah ne nno bo ro moof.” Tna kaket anu be kbe ana mno tibyo anu ntek ye.
2 Tna nmat raa anya ro mkai bo ro samyoh to, nsen nmo nbet ana. Nsya ana tubat bo ro samyoh reto su. Nisoh ana mhaf wana re ana sraujin u fee. Anu nno feto to anu kro watum ro Kristus oh meto.
3 Soh raa sait ro ati fee ynaut yawe, “Jõ fi raa ro ati!” Ait tait sioh-sah ait oh meto.
4 Menohe ait ro yawe bibi ait yesait ai to, rau ro moof to, ait ymat sas bo ro ja ait yno kaket to wia. Tna soh ykai mafer ro moof to, kbe ait simaut mam yhaf mato. Nmat sas bo ro raa roto mno to ma.
5 Rau ro moof to, raa sait yesait kaket ait ai sai. Tna siko yno bo moof mnan si bo ro Allah yerif kʼait.
6 Tna raa ro ja mkyas watum ro Allah kʼanu to, kbe anu sait-sait noo bo nee kʼana riryõn.
7 Sioh anu nesait to ma: Allah ymat tna yhar bo ro anu sait yno-yno. Awya ro ynaut mam yhaf mato yawe, “Allah wase bo ro mkair ja jõ tno to.” Raa retait sioh ait yesait ai oh meto! Feto niwana Allah to ma! Jõ fret bo tawe, “Mfi bo raa sait furere bobat makan rau mam armato rait to, kbe meen bobat weto to make. Tna tis rau to ait yaret bobat mnan anya mamyot makan tiwya ait furere to.”
8 Reto oh mi: Anu bhaf to mkair. Tna awya ro yari bo ro yhaf rait mbis, tibyo yno bo ro asmamo to, kbe ait safe mkak. Tna awya ro yari bo kʼHar ro Tuhan ybo yno to, kbe meen ykai roon ro hame mbam Har reto ye.
9 Nma, anu beroh bno bo ro moof. Wore anu hrowyõ to, bitsre ma. Tna meen tis rau to, anu bkai bo ro moof.
10 Wore wo moof refo. Feto to nma, anu bno bo moof kʼraa beta: Tinyi rau to, kbe anu bno bo moof kʼraa anya ro smot Kristus. Tna fo bno bo ro moof kʼraa roto beta ye.
Paulus ykyas watum ro tis beta tna ymah meen
11 Bokom ro tis refo fo, jõ tkom mkah tatem ajõ ai. Tkom mayir mase.
12 Raa mkbair reto tomer mkuk anu re kro Watum ro Musa. Mno feto afo re kbe raa wana ro agama Yahudi nksoh. Au oh mi ana mbis anu mawe raa mkom (sunat). Ana mhar he bo reto bo ro ati fee. Rau ro ati to, raa smot (percaya) bo ro Yesus tiwya yno mam ara warok. Bo ro yno reto misoh iranya raa msya Allah. Raa mkbair reto mhar bo reto menohe beroh mbis raa mawe ana raa mkom (sunat). Raa mkbair reto waa kbe raa ro Yahudi to kmo tna sikowah ana.
13 Ana ksoh mawe raa mari he anu raa mkom tna kro Watum ro Musa ye mnan si mkah bo ro ana mbis. Re kbe ana safuk mawe, “Raa ro mhau mam Galatia to mari tna kro amu oh.” Raa mkbair reto to, tiwya raa mkom (sunat) oh. Menohe ana mesait, kro Watum ro Musa mnan si fee.
14 Jõ hawe bo safuk. Jõ hawe bo raa mmat jõ. Jõ ksoh re raa mmat bo ro Tuhan ajõ Yesus Kristus yno sai. Au oh mi ysan yetsu rAit mam ara warok. Watum aro msya bo ro tabam refo fo taro to, ja raa mnaut mawe bo ro ati. Menohe mfo refo jõ tnaut tawe bo weto to bo ro ati fee. Tna bo ro jõ tnaut tawe bo ro ati to, raa ro tabam refo to hawe bo weto ye.
15 Mfi bo anu raa mkom oo mkom fee bo to, bo ati fee. Rau ro ati to anu smot Kristus tibyo nmos wanu to mrok maam.
16 Jõ skabuk Allah re Ait yatmof awya-awa sai ro miwer bo maja ro jõ tawe refo fee. Tna jõ skabuk re Ait ysan riof rAit kʼana weto tna yno re ana mhau mhaf tnok ye. Ana oh mi raa ro Israel, raa ro Allah wAit.
17 Tna jõ hawe te santri bo wefo tsya anu u fee. Raa roto ro mamo byoh kʼKristus sikowah jõ mnan oh! Jõ fi raabis ro Tuhan rAit tibyo raa mai jõ mayir-ayar mawat kʼjõ sai.
18 Taja, tme, tao, tano na; jõ skabuk Tuhan ranu Yesus Kristus re yatmof anu sait-sait. Amin: Mabo oh.