13
1 Nhau nsya anya to, niranya moof.
2 Raa ro srim to, msya raa ro anu wase to, nmen ana nmo nse mam samu wanu. Tna nsorni ma, noo boit nee kʼana mait ye. Raa ro mno feto to, baro moo boit mee kʼmalaikat oh meto. Menohe ana wase.
3 Raa ro raa mbu mam bui mato to, nmo nmat ana ye. Nros tis nban ana. Nnaut nwe ana mnan anya mfi bo anu ai, oh mi raa mbu mam bui mato meto. Nros tis nfoh wanu, mam wore wo raa mno bo ro samyoh mai kʼana ye. Nnaut nwe mnan anya mfi bo weto mai kʼanu ai.
4 Soh raa moo fnya tna fai reto mamo msya ait to, tawe raa beta kbe mros tis kʼana mbewok re miranya matak. Allah yawe wa yawe raa bitsre anya ma, tna mamo mwyah bo to ma. Kbe Allah yoo safo mana ymit kʼraa ro mwyah weto.
5 Allah ykyas mam bokom rAit yawe,
“Jõ sikba anu fee saut. Jõ thau su tsya anu yum.”
Ulangan 31:6,8
Feto to, nsu mase mkah pitis to ma. Nhau to, nnaut nwe bo bawya ro anu nse oh to, mnan.
6 ⌞Riwai Bokom ro Allah mawe kbe Ait sikba anu fee.⌟ Tibyo anu bhar bwe, Tuhan ja yban tis anu. Tibyo anu waa bo ro kbe raa mno mai kʼanu to fee.
7 Nnaut raa ro tiwya mkyas watum ro Tuhan kʼanu. Nnaut bo ro moof ja ana mno msya mafer rau. Tna smot Tuhan kaket mnan fi ana ja smot ye.
8 Yesus Kristus ja yhau ynan anya sai, ja haberek fee. Iis, riwai, tna mfo refo ye, tna mamo snok mam meen hame wajin to mnan anya sai. Ait yhau feto yum.
9 Mfo refo raa baro mkyas watum roto taro sor. Ana mawe wa raa mawe mabo fane bo to ma. Mawe mbau. Kro watum rana reto to ma. Ana ro mno feto mkai mafer aro fee. Nnaut nwe bo mafa ro agama ja ana mno soo oh to, mno bosmot rana to, mo matak fee. Nri ana ma. Nri Tuhan ro yatmof anu. Ait oh mi ro ysan boatmof rAit u kʼanu. Nnaut nwe boatmof rAit oh mi kbe mno bosmot ranu mo matak renti.
10 Soh imam ro Yahudi ksoh yawe Allah yyon iro raa wana to, ana truk mam Sbyah ro Allah. Tna msan sapi msya domba bo to, mam wohat ro mbau. Mbau menohe watum rana mbis mawe ana mesait moo baro mabo ye. Anu smot Yesus, tna bhar bwe bo ro Ait yno oh mi 'bosan' ro matak mkah bo myon iro wanu. Imam weto smot Yesus fee. Tibyo ana fri mafer ro moof reto to fee ye.
11 Mam korat ro masom Pendamaian to, raa msan bo to, mno feto fee: Ja imam ro yase ktan sapi msya kambing. Tna yakah mees reto, ntruk mam yuk ro mbau toni. Mees reto ait ysan afo re Allah yyon iro ro raa mno. Menohe sapi msya kambing mabuf weto raa moo makah frok mbam Sbyah reto. Raa moo tafoh mamo mkah mam mne.
12 Tiwya raa makah sapi msya kambing mabuf weto mamo frok mbam remo. Tna Yesus ye. Raa makah Ait mamo frok mbam remo mamo mame mam mne ye. Yitsre raa mame Ait afo re mees rAit reto myon iro ro anu bno. Au oh mi Ait yoo anu ysan kʼAllah re anu bno bo wAit sai.
13 Ait raa mame mam remo mne rau. Tibyo raa makin miwana Ait, sret Ait masah. Nma, anu kro Ait bmoʼt remo mne ye. Bitsre raa miwana anu, sret anu masah feto ye.
14 Nnaut nwe mam tabam refo fo, yuk ro anu bhau tibyo fee. Anu bhaf binaut bwe ste remo ro anu meen bhau mamo snok mam hame wajin.
15 Yesus yamo imam ranu ro yase. Bo ro anu bsan kʼAllah to, au oh mi anu bibi Allah yasom rAit tna bwe asik mase kʼAit yoyo.
16 Nsorni ma nno bo moof kʼraa. Noo bo nee kʼraa. Bno feto to, Allah yawe mnan fi anu bsan bo kʼAit, tna bno yhaf mnan oh meto.
17 Nri bo raa wanu ro mase mawe to. Nbo nno. Ana oh mi raa ro mbo anu tna kmot anu. Kbe meen Allah ytu bo kʼana tna ana mkyas bo bawya ro ana mno. Soh anu nri ana tna nno bo moof, kbe ana ksoh. Tna soh anu nno bo ro mkair, kbe ana sraujin, tna mafer marak kʼanu nesait ye.
18 Skabuk amu ro nkom aam refo ye. Amu nnaut nwe ja amu nhau nhaf moof. Tna amu nhau to, ja nwe nno bo ro moof ye.
19 Jõ soh-soh kʼanu tawe skabuk Tuhan re kbe jõ thah te fooh tama to kʼanu.
20 Allah tait yno re anu bhau bhaf tnok: Tiwya Tuhan Yesus yajat, tna mees rAit mno bosi ro tna matak. Bosi reto meen mhau tu mamo snok mam hame wajin. Tna Allah yno Yesus yrok yasen. Tna Ait yamo Raa ro yase ro kmot anu. Ait kmot anu kaket mnan fi raa ro ja kmot domba wait.
21 Jõ skabuk Allah re Ait yoo bo ro moof yee kʼanu: Yisoh anu afo re anu nhar bo, tna re anu ntak re kbe nno bo ro Ait yawe. Jõ skabuk re yno anu nhau nhaf sau, srau sau su nsya Yesus. Kbe yisoh anu, re kbe bno bombra ro Ait ksoh. Re kbe Ait yhaf mnan. Tna jõ skabuk re kbe raa bibi Tuhan Yesus yase rAit mamo snok mam hame wajin. Amin: Mabo oh!
22 Taja, tme, tao, tano na; jõ tawe anu nri watum ro jõ tkom mam aam ro mabuf refo.
23 Anu bfoh ranu, Timotius; tii raa tufrok ait mbam bui mato oh. Soh ait yamaʼt befo fooh to, kbe amu mbewok nma su no kʼanu.
24 Nmah meen ajõ kʼraa wanu ro mase, tna msya raa ro Allah wAit beta ye. Raa wanu ro mhau mam rabin ro Italia to mmah meen kʼanu.
25 Jõ skabuk Tuhan afo re Ait yatmof anu beta.