2
Yesus yros susai masuf
Kukek wojõ: Aam refo jõ tkom tiim mama kʼanu re kbe anu nno iro ma. Tna soh anu sait yno iro to, kbe Yesus Kristus ro yhau yoof retait, yamo yo kʼAllah tna yros susai masuf yawe, “Nyõ kmo ait toni to ma.” Ait fi Raa ro sotak iro wanu tna yno re iro wanu Allah yyon beta. Yyon iro wanu besait sai fee. Ait yyon iro raa makin ro mhau mam tabam refo beta ye.
Soh anu bri tna bno bo ro Allah ybis kʼanu to, reto merif mawe, anu bhar Ait yhaf mato rAit. Mfi bo raa sait yawe, “Jõ thar Allah yhaf mato rAit.” Soh ait retait ja yari yno bo ro bi Ait ybis to fee, ait fi raa ro ykyas bo sioh retait. Ait ykyas bo ro ati meto fee. Awya sai ro yari tna ybo yno bo ro Allah yawe to, ait retait yhafri Allah kaket, aro mabut fee. Fyi re anu bhar bwe anu bhaf sau su bsya Allah fe mfe a? Raa ro ja mno bo ro Kristus yno to, ana mesait sai aran oh mi raa ro mhaf sau su msya Allah oh. Raa roto taro mhaf sau su msya Allah fee.
Bosi ro ati au oh mefo: Anu natmof raa anya kaket
Taja, tme, tao, tano na ro jõ ksoh; tkom aam refo tsi bo ro tna kʼanu fee. Bosi ro Allah ykyas ooh-oh bo ro ati fares: Tiwya tinyi Ait yawe, “Nko hawe sai, anu natmof raa anya kaket oh!” Mfo refo jõ te tsi bosi reto kʼanu u. Tna jõ betoo bosi refo maja rau ro tna: Maja rau oh mi Yesus yama mam tabam refo fo, tna raa mmat he Ait ja yatmof raa kaket. Yno feto yerif iso ro ati reto kʼanu. Tna mfo refo raa mmat anu beta ja batmof raa anya kaket ye. Boatmof reto to, mfi kek ro mama mram tabam ro mamur refo. Mfo refo kek reto mo maut tna mamur to mroh baro. Awya ro yawe, ‘Jõ thau mam kek ro Kristus’ to, menohe ait knait raa ro Kristen taro, ait retait yhau wore wo mamur fares. 10 Awya ro yatmof raa Kristen taro to, kek ro Kristus mhau kʼait retait. Tna kek reto kbe mram iso ro ait yamo re kbe ait ytek yawe mam iro fee. 11 Awya ro knait raa anya ro Kristen to, ait retait yhau mam wore mamur fares. Yasu mti tibyo wase iso ro yamo ye.
Yohanes ybaut bo ro moof raa ro Kristen aro rau-rau mam weto ja mno
12 Kukek wojõ; jõ tkom aam refo tiim kʼanu tna thar tawe Kristus yno re Allah yyon iro wanu oh to.
13 Taja na; jõ tkom aam refo tiim kʼanu tna thar tawe anu nhar bi Ait yhaf mato rAit kaket oh. Anu nhar bi Ait ro tiwya yhau bait wia wore tabam refo Allah tii yfen fefares.
Tao na ro tna; jõ tkom aam refo tiim kʼanu tna thar tawe anu nsya kabes yabi (Iblis) nfa oh. Tna anu ntak nikyak ait ro yetsu mnis safo retait. Ait yros yatak abyõ fee.
14 Kukek na; jõ tkom aam refo tiim kʼanu tna thar tawe anu ja nhar Bja ranu yhaf mato rAit kaket.
Taja na; jõ tkom aam refo tiim kʼanu tna thar tawe anu ja nhar Tuhan yhaf mato rAit. Ait yhau bait wea wore tabam refo tii yfen fefares.
Tao na ro tna: Jõ tkom aam refo tiim kʼanu tna thar tawe bosmot ranu to matak oh, tna anu ja nri bokyas ro Allah nbo nno. Tibyo anu ntak nikyak ait ro yetsu mnis safo oh to.
15 Kaket anu: Saso-sasa bo knik-knak ro tabam refo toni to ma! Awya ro yhafri bo weto to, ait yhafri Allah ranu fee. Allah tait anu Bja ranu. 16 Bo knik-knak ro tabam refo fo boasmamo ro mase: Raa ro masmamo ja mno bo ro ana metsu rana ksoh sai, ana mnaut ttis to fee. Ana weto oh mi hafri bo ro tabam refo. Raa ro mmat bo tna srau oot-oot mawe moo; ana weto oh mi hafri bo ro tabam refo. Tna raa ro saso masom ro mase, re raa bibi ana; ana weto oh mi hafri bo ro tabam refo. Bo weto beta to bo ro tabam refo sai, mbam kʼAllah anu Bja ranu fee. 17 Tabam fo msya bombra aro rau-rau ro ja raa masmamo to, meen aro mhau mawyõs fee. Bo weto beta kbe saef mkak. Ro meen mhau mawyõs oh mi raa ro mari tna mbo mno bo ro Allah ksoh.
Raa ro knait Kristus
18 Kukek wojõ; tabam ro mfo refo fo, kene wore nsboh rau oh. Tiwya anu nri raa mkyas mawe, “Raa yase sait ro yasom rait ‘Kabes ro Knait Kristus’ kbe frok yama.” Mfo wefo fo raa makin mari Kabes ro Knait Kristus oh. Bo reto merif kʼanu mawe makyon sboh rau kene oh mefo. 19 Ana ro knait Kristus weto to, tiwya skabuk msya anu su. Menohe ana mhaf rana to hayah tibyo ana masen frok sikba anu mamo. Bo reto merif kʼanu mawe ana mhaf sau su msya anu to fee. Raa ro mhaf sau su mnan msya anu to, ana mhau skabuk su msya anu fares. 20 Menohe Tuhan yesait ybis Har rAit mama mjin kʼanu nhaf wanu tibyo anu beta ja nhar bo ro ati kaket. 21 Taja, tme, tao, tano na; tkom aam refo kʼanu fyi? Tnaut tawe anu wase bo a? Mfe. Anu nhar bo kaket. Anu nhar nwe bokyas ro mbam kʼAllah to bo ro ati sai. Tna anu nhar nwe bokyas reto maja ro sioh aro fee ye. 22 Mfi bo raa sait ywaar Yesus yawe, “Yesus tait Mesias* fee.” Raa retait raa ro knait Kristus. Raa ro knait Kristus weto to, ja mwaar Yesus tna mwaar Yaja rAit ye. 23 Awya ro ywaar yawe, ‘Yesus tait Ku ro Allah yare metait fee.’ to, ait retait yiranya ysya Allah fee. Tna awya ro yitbat yawe, ‘Yesus tait Ku ro Allah yare oh metait.’ to, ait oh mi ja yiranya ysya Allah to. 24 Reto to bokyas ro ati tiwya anu nri tna smot tinyi rau. Soh anu smot bokyas reto nbo renti to, kbe anu nhaf sau su nsya Allah tna nsya Ku rAit ye. 25 Tna bi Ait ysi kʼanu yawe, meen anu bhau broon.
26 Bo wefo beta jõ tkom tiim kʼanu weto afo re anu nhau kaket anu. Nri raa ro mama mkyas bo ro mkair tna besruf anu to ma! 27 Yesus Kristus ybis Har rAit mroh matam anu. Feto to anu nhar bo ro ati weto oh. Soh raa sait yama ykyas bokyas roto naut kʼanu to, nri ait retait ma! Har ro mjin kʼanu nhaf to mesait merif bombra ro ati kʼanu. Har reto ja mkyas bo ro siroyõ fee. Feto to, rau ro moof to, anu nhau nhaf sau su nsya bi Ait, mfi bo tiwya tinyi Har rAit mkyas mawe kʼanu.
Kukek ro Allah
28 Kukek wojõ; beroh nhau nhaf sau su nsya Kristus afo re meen ati ro Ait hah yama u to, anu waa bo ntru Ait to fee, tna anu hrenaut Ait fee ye. 29 Anu nhar nwe Ait tait Raa ro yhaf moof yum bait sai. Tibyo anu nhar ye nwe awya sai ro ja mno bo moof to, ana oh mi ku ro Allah wAit to.
* 2:22 Som reto to, “Ait ro Allah ysok tna yawe yamo Raja.” Mai ro Ibrani mawe Mesias, tna mai ro Yunani raa mawe Kristus.