5
Bombra ro tabam refo meen miwro anu fee
1 Awya ro smot Yesus Kristus tna yhar yawe, “Yesus tait Raa ro Allah ysok mkah bo yoo riof ro mase yee kʼraa” to, ait retait ku ro Allah. Tna awya ro yhafri Allah to, kbe ait retait yhafri Allah yare ye.
2 Anu fo ja batmof raa ro Kristen taro fe mfe a? Soh anu ja bri bo ro Ait ybis kʼanu tna ja bbo bno to, kbe anu bhar kaket bwe, “Anu batmof raa ro Kristen taro ye.”
3 Soh anu bhafri Allah to, kbe anu bri bo ro Ait ybis kʼanu tna ja bbo bno bo weto ye tu oh. Tna bo ro Ait ybis weto to samyoh fee.
4 Bombra ro tabam refo ja miwro ku ro Allah wAit re ana mbtek mam iro fee. Bosmot ranu mno re anu bros btak bikyak bo mkair-kar ro tabam refo.
5 Raa ro smot Yesus tna mhar mawe Ait Ku ro Allah yare to, ana weto mesait aran kbe mros matak. Bombra ro tabam refo meen miwro ana weto fee.
6 Tiwya raa baptis Yesus mkah aya. Tna Ait ysan yetsu rAit kʼraa mame yajat tna mees rAit frok ye. Tna Har ro Allah mesait mkyas mawe, “Bo weto to mabo tu oh.” Anu bhar bwe Har rAit ja mkyas bo mabo sai.
7-8 Tna Allah yerif bo trion tuuf refo kʼanu: Har rAit, aya reto, msya mees reto. [Yerif bo tuuf wefo beta kʼanu afo re anu smot bwe Yesus Ait oh mi Raa ro yoo riof yee kʼanu.]
9 Bokyas ro raa mkyas kʼanu to, ja anu smot tna nnaut mamo-me fee. Tna Allah tait Raa ro yase toni, feto to bokyas rAit to matak miwer! Bi Ait ykyas Yesus kʼanu yawe, “Yesus tait Ku aJõ.” Feto tibyo anu bhar bwe bokyas rAit reto matak yum.
10 Awya ro smot bokyas reto yawe “Yesus tait Ku ro Allah yare” to, ait yhar kaket yawe bokyas ro Allah riwai reto to bo ati oh. Tna awya ro smot bokyas ro Yesus reto fefares to, ait retait ywaar yawe bokyas ro Allah riwai reto to bo ro ati fee. Tna ait ro hawe smot Tuhan reto ait ynaut yawe fyi? Ynaut yawe Allah tait Raa ro siroyõ a?
11 Bokyas ro ati oh mefo: Allah ysan roon ro hame kʼanu oh. Tna Ku rAit oh mi yama yno re anu bhau hame to.
12 Feto to awya ro smot Ku rAit to, kbe ait retait ykai roon reto. Tna awya ro hawe smot Ku rAit to, kbe yhau hame fee.
13 Jõ tkom bo wefo beta tiim kʼanu ro smot Ku ro Allah rAit afo re anu nhar nwe meen anu nhau hame wajin.
14 Tna anu nhau skabuk Allah to waa fee. Anu bhar bwe soh boyoh ranu mnan anya msya Ait ksoh rAit to, kbe Ait yari boyoh ranu.
15 Anu bhar bwe Ait yari boyoh ranu tna bhar bwe kbe anu bkai bombra ro anu byoh kʼAit weto ye.
16 Soh anu sait ymat raa ro Kristen yno iro aro to, rau ro moof to, nyõ skabuk nayoh kʼAllah afo re bi Ait yatmof ait retait, yoo riof yee kʼait. Iro taro to, Allah ynaut yawe safo toni, kbe misti raa mhai tu oh. Tna jõ tawe anu skabuk raa ro mno iro ro safo weto to ma.
17 Bombra ro mimara beta to Allah yawe, “Iro meto.” Tna iro taro to misti re raa mhai fee.
18 Anu bhar bwe ku ro Allah wAit to ja mno iro fee. Yesus yatam ana tna saka wa kabes yabi (Iblis). Tibyo kabes yabi ytai yno ana fee.
19 Tna anu bhar bwe kabes yabi yase ybo raa beta ro mhau-ha sai mam tabam refo. Menohe anu fo ku ro Allah wAit to, kabes yabi ytai ybo anu u fee.
20 Anu bhar bwe Yesus yroh yama mam tabam refo tibyo anu btai bhar maja ro Allah. Ait yroh yama afo re kbe anu bhar Allah ro yase, yhaf mato rAit. Tibyo anu fo bhaf sau su, srau sau su, tna bonaut wanu ro bnaut sau su bsya bi Ait tna bsya Ku rAit Yesus Kristus ye. Ait retait Allah ro yase, ro ysan roon ro hame kʼanu.
21 Kukek wojõ; smot bombra ro tabam refo fo ma! Smot Allah ranu ro yaam sai.