7
Watum ro Allah bo ro msai miwrek watum ro raa sai
1 Ti sau fo, raa ro Farisi msya guru agama Yahudi baro mbam Yerusalem mama mo kʼYesus.
2 Ana mmat he kuber ro Yesus wAit mait boit to, ana myon matem wana wia fee.
3 (Raa mabi ro Yahudi mbis raa myon matem wana kaket wia mamyot bo mafa rana, tna kbe mait boit. Soh raa mait boit menohe hawe myon matem wana kaket wia to, raa mabi ro Yahudi mnaut mawe kbe Allah kmo ana weto.
4 Bo mafa wana roto taro mawat ye: Ati ro ana mbam pasar mama to, kbe ana hre mait boit fee. Ana mate aya myon metsu wana beta wia matim mamyot bo mafa wana. Tna kbe ana hre mait boit. Tna raa ro Yahudi ja myon hawereh msya bo ro saruk boit moof kaket feto ye.)
5 Raa mabi ro Yahudi weto mmat he kuber ro Yesus wAit mno bo mafa wana weto fee. Tibyo ana kmo mtu kʼYesus mawe, “Yesus; fyi re kuber woNyõ mno bo mafa wamu fee? Ro moof to, ana myon matem kaket wia tna fo mait bo to!”
6-7 Yesus yawe kʼana yawe, “Tiwya Allah ybis nabi Yesaya ykyas anu. Ait ykom yawe anu nmo wan-wan sai. Mabo oh! Bokom reto mawe,
‘Raa mana refo mbaut Jõ mkah masoh mabyõ sai. Menohe ana mhaf wana to hayah sai. Ana maka smot Jõ mati sai. Tna bo ro ana mkyas mam samu watum rana to taro watum raa sai, mbam kʼJõ fee.’ ”
Yesaya 29:13
8-9 Yesus yawe u yawe “Anu nno bo mkair! Watum ro Allah to, anu nsorni, beak. Tna anu nno bo mafa ro mbam kʼraa sai to matak.
10 Tiwya Allah ybis Musa ykom yawe,
‘Natmof nja msya nme na.
Keluaran 20:12
Awya ro yawe kair yaja yme bo to, kbe ait raa mame yajat tu oh.’
Keluaran 21:17
11 Menohe anu nno bo mkair nwe raa matmof maja msya mme na to ma. Anu nwe kʼana nwe, ‘Thar tawe bo ro anu bewok nse to mabuf. Tii tawe tatmof anu mbewok tawe too pitis tee kʼanu, he mfe. Pitis weto beta tsan kʼAllah oh.’
12 Anu nwe feto tna natmof nja, nme na fee.
13 Anu nno bo mafa ro hohos wanu fares menohe miwer Watum ro Allah oh meto. Tna anu ja nno bo mkair mnan feto taro ye.”
14 Tna Yesus ytu raa msis-sas mama. Tna ykyas bo kʼana yawe, “Nri oh, nnaut oh:
15 Bo aro mno wa iranya raa msya Allah to. Bo aro ro twok mam raa mhaf mno feto fee. Menohe bo ro frok mbam raa mhaf mato oh mi mno wa iranya raa msya Allah to. [
16 Anu ro nri bokyas reto oh to, nnaut kaket!”]
17 Yesus sikba raa mawat weto tna yamo twok mam amah mato. Tna kuber wAit mayoh kʼAit mawe, “Nbetoo bofret reto maja rau kʼamu.”
18 Tna Yesus yawe kʼana yawe, “Anu fo nfot fee ye? Boit ro raa mait tna aya ro raa mata to mno wa iranya raa msya Allah to fee. Bo sohmaam ro twok mam raa mhaf mato to bo ati fee.
19 Bo weto twok mam raa masoh to, tna mroh beta mamoʼt raa mhaf. Tna kbe haberek mamo syõ. Tibyo raa mamo msyõ mam sutet makus akus. Feto to, boit mesait ja mno wa iranya raa msya Allah to fee.” (Mkah bokyas reto to, Yesus yawe boit aro mbau to fee.)
20 Tna Yesus yawe, “Soh raa mhaf mkair to, kbe ait yno bo ro mkair ye.
21 Raa ro mhaf mkair to, ja mnaut-nat bo ro mkair-kar. Ana mjah bo kbik-kbak, tna msyõf bo raa. Ana mame ajat,
22 mno bo wyahte, ana masmamo, tna mhaf mkair-kar kʼraa anya. Ana sioh raa anya, tna mno bo ro mti hrenaut. Ana mawe kair raa anya, tna tawyõ ana ai, tna mno bo ninya sai, mnaut tis fee.
23 Bo ro mkair weto beta frok mbam kʼraa mhaf mato ro mkair. Bo weto oh mi mno wa iranya raa msya Allah to.”
Fai sau smot Yesus kaket
24 Yesus sikba remo reto tna yamoʼt rabin ro Tirus. Ait twok mam amah sau yawe ymyõt Ait wai. Menohe mfe; raa mhar Ait yama oh.
25-26 Tna fai sau mari he Yesus yama si fo, au mama mo kʼYesus. Fai au reto to, fnya mana ro Yahudi fee. Fai au fnya mana ro Siro-Fenisia. Au mama maka soh-soh kʼAit mawe, “Nikyak kabes ro mbo ku ajõ ro ano, mbau a!”
27 Tna Yesus yawe, “Ja raa moo boit mee kukek wana mait mhaf matu wia matim. Raa moo boit ro kukek mait reto to, beak mtah mait fee!”
28 Menohe fai au reto mawe, “Ae; menohe makyõ-aka ro btek mbam ambar to, ja mtah mait.”
29 Tna Yesus yawe kʼfai au yawe, “Bokyas anyõ reto moof toni. Feto to, hah ne namo bonyõ oh. Kabes ro mbo ku anyõ to, frok mamo oh.”
30 Fai au reto hah mamo snok mam amah rau. Tna mmat he ku rau reto mjin maam knar sai wea. Kabes frok mbam ku au reto mamo marak oh.
Yesus yisoh raa ro yimara mtuk
31 Yesus sikba rabin ro Tirus, tna yasen yamo iti kota ro Sidon yamoʼt maru ro Galilea. Ait truk mam rabin ro Dekapolis.
32 Tna raa makah raa sait mama mo kʼYesus. Ait retait yimara mtuk msya ymai kair ye. Ana soh-soh kʼAit mawe, “Yesus; noo natem ntor abyõ kʼraa refi, mbau a.”
33 Yesus yakah raa retait yamo wore ana mbewok mros kar. Tna Yesus yoo yatem krem ysu kʼait yimara ewok. Tna Yesus tfeh oot yatem yiir kʼraa retait hrea ye.
34 Mam weto Yesus heyut ayoh yayõ yafos fari-fara yawe, “Efata!” (Efata to mai ro Aram mawe, 'maah oh'.)
35 Raa retait yimara mrok moof yari bo, tna ymai mrok moof ykyas bo yasoh mnan-an ye.
36 Tna Yesus yawe wa kʼana yawe, “Nmo nkyas bo wefo kʼraa renti ma!” Menohe ana mrok mamo mkyas kʼraa renti sai.
37 Raa mari he Yesus yno bo msai reto to, mrok ktak. Ana mawe, “Ait yno bombra beta moof sai! Raa ro mimara mtuk sai, msya raa ro mai kair fyi sai, Ait yisoh mrok moof beta.”