10
1 Taja, tme, tao, tano na; jõ tnaut raa ro Israel to, srau hri. Tna jõ skabuk soh-soh Allah tawe yoo riof yee kʼana ye.
2 Jõ thar tawe ana safo triar mno bo ro ana mnaut mawe Allah ksoh. Menohe ana wase bo ro Allah ksoh.
3 Allah yno iso re kbe Ait yawe raa mamo mhaf moof. Menohe raa wase iso rAit reto. Tna ana siko mamo mhaf moof mkah mamo mam iso rana mesait, iso roto. Tibyo ana hawe bo mamo mam iso ro Allah yerif kʼana re mamo mhaf moof.
Raa ro mhaf moof ati
4 Ana ro Israel weto siko kro Watum ro Musa mawe kbe ana mesait misoh mhaf wana. Menohe anu fo smot Kristus. Reto oh mi Allah ymat mees ro Yesus tibyo yawe anu fo, bfi raa ro mhaf moof ati oh. Tibyo awya sai ro smot Kristus sai to, kro Watum ro Musa u fee.
5 Tiwya Musa ykom yawe,
“Awya ro ksoh yhaf moof mkah bo kro Watum ro Musa to, yako hawe sai kbe yari tna kro Watum ro Musa reto beta, ybo yno mnan si.”
Imamat 18:5
6 Menohe mfo refo anu smot Kristus tibyo Allah ymat anu yawe anu fo raa ro bhaf moof mnan si oh meto. Kbe anu bno bawya naut u? Anu fo raa tu ro tabam refo sai. Mfi bo tiwya watum ro Allah mawe, anu sait ytai yamoʼt sawro ro Allah tna saso Kristus fee. Tna ybis Ait yroh yamaʼt tabam refo fee ye. Raa sait aro ytai yno feto fee.
7 Tna anu sait ytai yroh yamoʼt sawro ro hai mam ti no tna saso Kristus re tubat Ait to fee ye. Raa sait aro ytai yno feto fee.
8 Bokom ro Allah mawe, “Bokyas ro Allah reto mhau nkene sai. Tna bokyas reto anu nkyas ye tna anu nhar mam nhaf mato wanu ye.” Tna bokyas reto amu nbo nkyas ye nwe kbe raa smot Yesus.
9 Au oh mi awya sai ro hrenaut fee, menohe ykyas abyõ kʼraa yawe, “Yesus tait yamo Tuhan ro ybo jõ.” Tna soh ait yhar mam yhaf mato yawe, Yesus yajat tna Allah yno Ait yrok yasen; kbe meen ait retait ykai riof.
10 Jõ tkyas u tawe soh raa sait ksoh yawe Allah ymat ait yfi raa ro mhaf moof to, kbe ait yno bo bawya? Soh ait smot Yesus mam yhaf mato rait to, kbe Allah yawe ait yfi raa ro mhaf moof. Tna soh ykyas abyõ yawe, “Yesus yamo Tuhan ro ybo jõ.” ykyas mam wore raa mros mmat to, kbe meen ait ykai riof.
11 Bokom ro Allah mkyas reto ye mawe,
“Awya sai ro smot Ait to, meen yanwaruk fee.”
Yesaya 28:16
12 Allah ymat raa to, raa ro Yahudi ye msya raa mana roto makin ye. Ymat ana yawe ana mnan anya beta sai. Raa sait hayah fee. Raa mkbair ewok weto ye mamo mo kʼAllah mam iso sau reto. Tna Yesus yamo Tuhan ybo ana mkbair ewok weto ye. Ro mayoh kʼAit to, kbe bi Ait yno bo moof msis soh kʼana beta.
13 Bokom ro Allah mawe,
“Awya sai ro yamo yo kʼTuhan Allah tna ytu yawe ‘Tuhan noo riof nee kʼjõ ye!’ to, kbe meen ait ykai riof.”
Yoel 2:32
14 Menohe raa ro smot Ait fefares to, kbe mayoh bo kʼAit fyi? Tna soh ana wase Ait yasom fefares to, fyi re kbe ana smot Ait? Tna soh raa mamo mkyas Yesus yasom kʼana fefares to, fyi re kbe ana mhar Ait yasom?
15 Tna soh Allah ybis sryan aro mamo fefares to, fyi re sryan mamo mkyas Yesus yasom kʼana? Bokom ro Allah mawe,
“Raa ro makah Bokyas Moof mama mkyas to mno bo moof toni.”
Yesaya 52:7
Raa mana ro Israel hawe smot Kristus
16 Menohe tiwya Allah ybis raa mamo mo kʼraa ro Israel. Tna raa weto mkyas Bokyas ro Moof kʼana oh. Raa mamo mkyas oh menohe raa ro Israel msis hawe bo smot. Tiwya Nabi Yesaya ykyas bo refo yawe, “Tuhan; awya oh mi yari tibyo ybo yno bo ro amu nkyas to?”
17 Feto to anu bhar bwe, “Ja raa mari Bokyas ro Moof (Injil) reto to wia matim. Mari Bokyas Moof ro Kristus reto tna fo ana mhaf mse Bokyas reto tibyo smot Kristus.”
18 Raa ro Israel weto to mari Bokyas reto oh fe mfe a? Mari oh! Bokom ro Allah mawe,
“Bokyas rana reto to, raa mkyas mamo snok mam tabam refo beta oh. Mamo snok mam arin aso beta oh.”
Mazmur 19:4
19 Fyi, raa ro Israel srau mnaut bo ro ana mari reto to, kaket fe mfe a? Mhar oh. Allah yawe kʼMusa yawe,
“Kbe Jõ tno bo moof kʼraa roto taro. Raa weto tiwya Jõ tsok fee. Tibyo anu, raa woJõ to, kbe nmat tibyo nrok kmo. Kbe jõ tatmof raa mana ro wase Jõ. Feto oh mi tno anu fo nrok kmo.”
Ulangan 32:21
20 Feto ye, Allah ybis Yesaya ykom bo ro mai kʼraa ro Israel sau. Tibyo Yesaya waa fee. Tna ykom bo ro Allah ykyas raa ro mne weto yawe,
“Raa ro Yahudi fee ja ana saso Jõ fee. Menohe ana mkai Jõ oh. Ana mayoh bo kʼJõ fee. Menohe Jõ terif Jõ kʼana tibyo ana mhar Jõ.”
Yesaya 65:1
21 Menohe ykyas raa ro Israel yawe,
“Jõ ttu ana mama mo kʼJõ. Tiwya ttu ooh oh. Menohe ana hawe. Ana to mana mase. Ana raa ro mari bo meto fee.”
Yesaya 65:2