2
Allah yoo safo mana ymit kʼraa to, yno mnan si
1-3 Tna anu bhar bwe iro ro raa mno feto to, kbe Allah ymit kʼana tu oh. Menohe anu bsait fyi? Mfi bo anu bmat raa roto tibyo mam bhaf mato wanu bwe safo btek kʼana. Menohe anu bsait ja haberek bno bo mkair mnan anya mfi ana feto ye. Anu bsait oh mi bwe safo btek mai kʼanu oh meto! Anu bhar bwe kbe Allah ymit safo weto kʼanu mnan si tu oh! Kbe raa aro yban anu fee saut! Kbe anu bsam bmo fari re Allah yahni iro wanu fee ye!
4 Mfo refo Ait yoo safo ymit kʼraa to fefares. Allah tait Raa ro kanyin sai. Ait tait Raa ro yhaf ase. Allah ksoh yawe raa mashana. Feto to Ait bitsre rere baro feto tna re kbe raa mashana. Nno be anu aro niwana boatmof rAit reto to ma. Beroh nno bo ro mkair ma, re kbe meen Allah yno bo ro mase mai kʼanu.
5 Anu to, nna mase tna hawe bo nashana. Anu to beroh nno iro. Feto to anu nno Ait kmo renti. Tna kbe meen Ait yno bo ro mase mai kʼanu. Nnaut oh: Meen, ati sau to, kbe Ait yoo srah ymit kʼraa beta. Wore Allah yoo safo ymit kʼraa ro mno safo to, yno bo ro mnan si oh meto. Tna kbe raa beta mmat mawe Ait yno bo mnan si yum.
6 Allah kbe ska bo kʼraa sait-sait mamyot si bo ro ait retait yno:
7 Raa ro beroh mno bo ro moof to, mno re Allah yhaf mnan. Ana weto to raa ro ja saso roon ro hame. Mam wono to ana weto ksoh re Allah yoo ana yse hre abyõ mam yuk ro moof, tna kbe raa mmat ana ye. Ana ro saso bo weto oh mi meen Allah yno afo re fri roon ro hame.
8 Menohe kbe Allah kmo raa ro ja mno bo ro moof mkah ana mesait ai sai. Kbe Allah kmo raa ro ja mmat raa anya fee. Kbe Ait kmo raa ro hawe bo mari bo ati ro mbam kʼAit, tna raa ro ja mber safo. Tibyo meen ana weto mkai bo ro mkair.
9 Meen kair mai kʼraa beta ro ja mno bo mkair: Raa mbam raa mana ro Yahudi wia tinyi tna msya raa mbam raa mana roto ye. Kbe ana mbewok ye srau wana hri.
10 Menohe meen Allah yno bo ro moof kʼraa ro ja mno bo ro moof. Meen Allah yoo ana weto yse hre abyõ mam yuk ro moof tna mam wono to, kbe raa mmat ana ye. Tna ana weto meen mhau mhaf tnok ye: Raa ro Yahudi wia tinyi tna raa mbam raa mana roto makin to ye.
11 Allah ymat raa beta to, yawe mnan anya sai. Ysok raa sait fee.
12 Tna raa mbam raa mana ro Yahudi to, ana mhar Watum ro Allah yoo yee kʼMusa. Tna soh ana mno bo mnan si Watum reto to fee, kbe yoo safo mana ymit kʼana. Tna raa ro mbam raa mana roto makin to, ja wase Watum ro Musa. Menohe soh ana mno iro miwer Watum reto to, meen ana safe mkak ye.
13 Allah tait yhaf mnan kʼawya? Ait hawe raa ro mhar Watum ro Musa sai menohe mbo mno beta fee. Ait yhaf mnan raa ro mari Watum reto tna mbo mno beta. Allah ymat sas ana weto tna meen yawe ana oh mi raa ro mhaf moof ati.
14 Raa ro mbam raa mana roto makin weto, ana wase Watum ro Musa reto. Menohe ana baro mno bo moof mfi bo ana kro Watum reto. Watum maja rau reto ana mhar mam mhaf mato wana ai sai.
15 Bo moof ro ana weto mno to, merif mawe Allah yno re mhaf mato wana to, mti bonaut kʼana. Mti bonaut kʼana re mhar Watum reto maja rau. Ana mesait mnaut bana re mhar mno bo ro moof mamyot Watum reto. Tna soh ana mno bo ro mkair to mhaf wana bhah ana ye.
16 Meen, ati ro Allah yoo safo mana ymit kʼraa sait-sait to, kbe ymat sas raa mhaf mato wana. Ymat sas tibyo yhar bo beta ro tiwya ana mno wai. Tna yhar soh raa kro Bokyas Moof ro Yesus to, tna mno mnan si, fe mfe a. Tna fo Kristus Yesus yoo safo mana ymit kʼraa. Bokyas Moof reto oh mi ja jõ tkyas kʼraa.
Raa ro Yahudi miwer Watum ro Musa
17 Anu taro nwe, “Jõ fi raa ro Yahudi. Tna amu nnaut nwe Watum ro Musa reto to, matak re mno amu nhaf moof ati tibyo nkai riof ro mase.” Tna anu weto to safuk nwe anu niranya nsya Allah oh.
18 Tna anu nwe anu nhar bo bawya ro Ait yhaf mnan. Tna anu nhar Watum ro Musa tibyo anu nhar bo ro moof msya nhar bo ro mkair.
19 Anu to, nwe anu nsu maah re mbefatu raa. Mbefatu raa tna nerif iso ro Allah kʼraa ro masu mti fares. Anu nwe anu to, nbo kek nmo nram raa ro mhau mam wore mamur fares.
20 Anu nwe Watum ro Musa mno re anu nhar bo ro ati. Tna anu nwe anu nhar Watum ro Allah beta mnan si oh to. Nwe nhar oh tibyo nerif bo kʼraa ro wase bo ye tna nmo guru ro ja watum bo kʼraa ro mfi ku kinyah fares ye.
21 Soh anu nwe nhar bo weto beta oh to, fyi re anu nbo tna nno bo weto fee! Rau ro moof to, anu nesait nri bo ro ja anu watum kʼraa. Anu nkyas nwe, “Nsyõf bo ma!” Fyi, anu nesait ja nsyõf bo fe mfe a?
22 Anu to, nkyas nwe, “Nwyah ma!” Fyi, anu nesait nwyah ye fe mfe a? Anu nkyas nwe, “Amu knait berhala bo to.” Fyi re anu nmoʼt yuk ro raa msan bo kʼberhala weto, tna nsyõf bosan ro raa mse kʼberhala weto!
23 Anu safuk nwe anu nhar Watum ro Allah yoo yee kʼMusa oh. Menohe anu nno bo miwer Watum rAit reto. Anu nno bo bawya meto ee? Soh anu niwer Watum rAit to, anu niwana Allah oh meto.
24 Feto oh mi Bokom ro Allah mkyas mawe,
“Anu, raa ro Yahudi, oh mi nisti re raa ro mbam raa mana roto makin mamus Allah ranu to.”
Yesaya 52:5
25 Anu raa ro Yahudi to, ja nkom tohmi (sunat). Anu nkom anya feto, afo re kbe raa mhar mawe anu to, raa ro Allah wAit. Soh anu weto nri tna kro Watum ro Musa weto beta mnan si to, kbe bo mafa ro nkom tohmi reto mafer moof ye. Soh anu nkro Watum ro Musa weto beta to fee, anu weto nnan anya nsya raa mana roto sai, ro raa mkom fee. Anu nkom to, mafer marak.
26 Feto ye: Ana ro raa mkom tohmi fee; mfi bo ana weto mari Watum ro Musa mbo mno kaket to, kbe Allah ymat ana mfi raa wAit ye, mnan anya msya raa ro raa mkom oh.
27 Raa ro mbam raa mana roto makin to, ja mkom fee. Menohe soh ana ja mno bo mamyot Watum rAit to, Allah yhaf mnan ana ye. Menohe anu ro raa mkom oh tna nhar Bokom ro Allah ye to; soh anu niwer Watum rAit reto to, meen Allah yoo safo ymit kʼanu. Ymit safo kʼanu tna kbe raa ro mne mros mmat mawe, “Ae, amu ksoh ye.”
28 Anu ro Yahudi nwat to nwe kro bo mafa ro hohos na wanu. Tibyo anu raa mkom tohmi oh. Anu raa mkom feto oh mi misti anu weto nnaut nwe anu nesait ku ro Allah wAit to, ku ro ati to. He mfe.
29 Mfi bo anu raa mkom, tna mfi bo anu kro bo mafa raa ro Yahudi to, bo ati meto fee. Watum ro Musa to, matak misoh raa mhaf wana moof to fee. Soh Har ro Tuhan misoh anu nhaf wia to, kbe anu nmo raa ro Allah wAit ro ati to. Kbe raa ro tabam refo bibi anu u fee. Menohe kbe Allah bibi anu.