6
Anu bjat tna brok bsen bsya Yesus oh
1 Feto to fyi? Kbe anu bno iro renti re kbe boatmof ro Allah reto mninon kʼanu u fe mfe a?
2-3 Mfe saut! Anu to raa ro tiwya smot Kristus oh tibyo anu raa baptis oh. Nnaut oh: Raa baptis anu to, fret bo mawe anu bsya Kristus su to, raa tiwya mame bjat oh. Tiwya tak mkair sau mbo anu misti re anu raa ja bno iro to. Menohe ati ro anu bhai su bsya Kristus to, tak mkair reto mitsre anu tna mbo anu u fee. Reto oh mi anu hawe bo bno iro renti u fee.
4 Raa baptis anu to, fret bo mawe anu bjat, tna anu raa sama bsya Kristus. Raa mame yajat tna Yaja mkah yase rAit, yno re Kristus yrok yasen. Feto ye mkah yase rAit reto yno re anu bmos wanu to mrok maam. Reto oh mi tak mkair reto mbo anu renti u fee. Tibyo anu kro iso ro tna to.
5 Soh anu bsya Ait tiwya bjat oh to, kbe anu brok bsen bsya Ait tu oh.
6 Tiwya tak ro mkair reto mbo anu re anu ja bno iro. Menohe anu bhar bwe, anu bsya Yesus to raa mame afo re tak reto mbo anu u fee. Tibyo anu bmo sryan ro bri tak reto u fee ye.
7 Tna awya ro yajat ysya Kristus to, Allah yawe ait retait yrok yhaf moof ati oh. Tibyo tak mkair reto mbo ait u fee. Tna misti ait yno iro u fee.
8 Soh tiwya anu bhai bsya Kristus to anu bhar bwe meen anu brok bsen bsya Ait fea!
9 Anu bhar bwe Kristus yrok yasen to. Tibyo meen ye yhai u fee. Yesus sbi hri wa hai matak rau reto. Ait yase yiwer. Kbe hai mbo Ait u fee.
10 Ait yajat mun sau aran sai. Yajat to sbi hri wa tak mkair ro ja misti raa mno iro reto. Tna mafer bo ro Kristus yno reto to, meen mhau matak yum oh. Tna Ait yrok yasen to, yhau mkah yno bo ro Allah wAit.
11 Feto to nnaut nwe anu bhai bsya Kristus Yesus oh. Tibyo tak ro mkair reto mbo anu u fee. Menohe anu bnaut anu bwe anu baam bsya Allah su oh mefo. Anu bhau mkah bno bo ro Allah wAit.
12 Feto to anu bhau raa sai mam tabam refo baro fares to, anu beroh bri tak ro mkair reto u ma. Nno wa be nmo sryan ro tak reto tibyo bo ro ja raa msrau oot-oot mno to, kbe anu kro nno ye.
13 Tna anu netsu wanu to, mfi bo sbe ye. Kaket anu nsoh wanu, ntem wanu, nhaf wanu to! Noo anu nsan kʼtak ro mkair reto nmo sbe rau to ma. Kbe tak reto misti re anu nno bo ro mkair-kar. Menohe anu nfi raa ro mhai oh. Tna Allah yno re anu nmos ranu mrok naam u. Feto nsan netsu wanu beta kʼAllah ybo mkah nmo sbe rAit. Feto to kbe Ait ybo anu nno bo ro moof ati to.
14 Watum ro Musa mbo anu u fee. Mfo refo to, boatmof ro Allah mhau mkyar anu. Tibyo kbe anu nmo sryan ro tak mkair reto u fee.
Anu nmo sryan ro awya rait?
15 Watum ro Musa mbo anu u fee. Tna Allah ymat mees ro Kristus tibyo yatmof anu yoyo. Feto to, mfo refo anu bno iro mbau a? Mfe saut!
16 Anu bhar bwe, soh anu bitsre anu bsan kʼraa roto mbis to, ja anu bmo sryan rait oh meto. Anu fo nmo sryan ro awya rait? Soh nwe nri tak ro misti iro to, kbe anu nhai. Menohe soh nwe nri bo ro Allah yawe to, kbe yawe anu nfi raa ro mhaf moof ati. Nksoh ranu to ryo?
17 Tiwya anu nmo sryan ro tak mkair reto, tibyo nhau nno iro yoyo. Menohe Allah tubat anu. Tna raa wAit merif watum ro ati kʼanu. Tna mfo refo anu nri watum rAit reto tna nbo matak oh. Feto to jõ tayoh asik mase kʼAllah.
18 Allah yno re tak ro mkair reto mbo anu u fee. Mfo refo anu nmo sryan ro Allah rAit. Tibyo anu nno bo ro moof ati.
19 Riwai tkyas raa ro mamo sryan. Anu raa sai. Feto to tkyas bofret reto afo re anu nhar bo ro jõ watum kʼanu to kaket. Nnaut nafos wanu: Awya ro ybo? Tiwya anu ntem, nkit, nsoh wanu bo to mno bo masmamo tna anu niwer watum ro Allah. Reto oh mi anu ksoh nmo sryan ro tak mkair reto. Tna mfo refo jõ tawe kʼanu tawe, “Nno bo ro moof ati mkah anu ntem, nkit, nsoh wanu bo to. Anu nmo sryan ro Allah wAit oh meto. Tna mafer rau to, anu nhau nno ro bo ro Allah wAit yoyo sai.”
20 Wore wo tak ro mkair reto mbo anu fares to, Allah ybo anu re nno bo moof ati to fee.
21 Ati ro anu nnaut bo ro tiwya anu nno weto to, anu saban. Bo ro anu nno wore weto to, mafer rau to bo bawya? Bo weto misti re raa mhai tibyo.
22 Menohe Allah skur anu re tak ro mkair reto mbo anu u fee. Tna mfo refo anu nmo sryan ro Allah wAit oh. Mafer rau to, anu nhau nno ro bo ro Allah wAit yoyo sai. Tibyo meen tis rau to anu nhau hame wajin ye.
23 Soh raa mno iro to, Allah yawe boren ro yaren ana weto to: Ana mhai tibyo. Menohe Allah yatmof anu: Ait yuumto roon ro hame kʼraa ro smot Kristus Yesus, Tuhan ranu.