33
1 Mɔwisi Gusunɔn tɔnu u sere ɡbi, u Isirelibɑ domɑru kuɑ, u nɛɛ,
2 Yinni Gusunɔ u nɑ Sinɑin ɡuurun di
nɡe dɔ̃ɔ wi u Seirin ɡuuru wukiri,
mɑ u win tɔmbu yɑm bururɑsiɑ sɑɑ Pɑrɑnin ɡuurun di.
Gusunɔn ɡɔrɑdobɑ dɑbi dɑbirɑ tɑ nùn yɔ̃sirimɑ.
Mɑ u woodɑ nɛni win nɔm ɡeuɔ nɡe dɔ̃ɔ.
3 Yinni Gusunɔ u Isirelibɑ kĩ.
U rɑ tɔmbu kpuro kɔ̃su be bɑ sɑ̃ɑ wiɡibu,
bɑ rɑ yiire win nuurɔ bu kɑ win sɔ̃ɔsiru wɑ.
4 Nɛ, Mɔwisi, nɑ bɛɛ woodɑ wɛ̃
ye yɑ sɑ̃ɑ bɛɛ Yɑkɔbun bibun bweserun tubi
ye yɑ kpuro kere.
5 Yinni Gusunɔ u kuɑ sinɑ boko Isireliɔ
sɑnɑm mɛ ben ɡuro ɡurobu kɑ ben kpɑrobu bɑ mɛnnɑ
kɑ sere mɑɑ ben bwese kɛri.
6 Mɔwisi u den domɑru toruɑ u nɛɛ,
Rubɛnin bwese kɛrɑ yu dɑkɑɑ dɑ,
yu ku rɑɑ ɡbi.
Gusunɔ u de yen tɔmbu bu dɑbiɑ.
7 U mɑɑ ɡeruɑ Yudɑn bwese kɛrɑn sɔ̃ u nɛɛ,
Yinni Gusunɔ, ɑ swɑɑ dɑkio
ɑ Yudɑn bwese kɛrɑn sokuru nɔ.
A de bɑ n nɔɔ tiɑ sɑ̃ɑ kɑ Isirelin bwese kɛri yi yi tie.
A ye somiɔ yen yibɛrɛbɑ bɑ̀ n ye wɔrim wee.
8 Lefin bwese kɛrɑn sɔ̃ u nɛɛ,
Yinni Gusunɔ, wunɑ ɑ wunɛn sɔm kowobu Lefibɑ urimu kɑ tumimu nɔmu bɛriɑ.
A ben lɑɑkɑri mɛɛrɑ Mɑsɑɔ,
mɑ ɑ bu siri Mɛribɑn bwiɑn ɡɑri sɔɔ.
9 Bɑ nun nɑɑnɛ kuɑ n kere ben mɛro kɑ ben tundo
kɑ ben wɔnɔbu kɑ sere ben bibu.
Bɑ wunɛn woodɑbɑ mɛm nɔɔwɑ.
Mɑ bɑ wunɛn ɑrukɑwɑni ye yibiɑ.
10 Bɑ wunɛn tɔmbu wunɛn woodɑ sɔ̃ɔsi bu kɑ nun mɛm nɔɔwɑ.
Bɑ rɑ yɑ̃ku dɔ̃ɔ mwɑɑrɑruɡinu ko
kpɑ bu turɑre dɔ̃ɔ doke wunɛn yɑ̃ku yerɔ.
11 Yinni Gusunɔ, ɑ ben bwese kɛrɑ somiɔ bu kɑ dɑm ko.
A ben ye bɑ mɔ̀ kpuro domɑru kuo.
A ben yibɛrɛbɑn dɑm buo.
A ku mɑɑ de bu se sere kɑ bɑɑdommɑɔ.
12 Bɛnyɑmɛɛn bwese kɛrɑn sɔ̃ u nɛɛ,
Bɛnyɑmɛɛn bwese kɛrɑ yɑ sɑ̃ɑwɑ ye Yinni Gusunɔ u kĩ.
Mɑɑ yɑ wɑ̃ɑ bɔri yɛndu sɔɔ win bɔkuɔ.
U bu kɔ̃su bɑɑdommɑ.
U mɑɑ wɑ̃ɑ ben suunu sɔɔ.
13 Yosɛfun bwese kɛrɑn sɔ̃ u nɛɛ,
Yinni Gusunɔ, ɑ ben tem domɑru kuo,
kpɑ mu ɡurɑn nim wɑ,
kɑ mɑɑ nim mɛ mu koo yɑri tem sɔɔn di.
14 A ben tem mɛ domɑru kuo,
kpɑ dĩɑnu nu se,
kpɑ suru bɑɑwure bɑ n dɑ n ɡɛ̃ɛru mɔ̀.
15 A de dĩɑ ɡeenu nu koorɑ ben ɡuunu kpuron wɔllɔ.
16 A de tem mɛ, mu dukiɑ yibu.
Kpɑ wunɛ wi ɑ ɡɑri ɡeruɑ sɑɑ kiki bekusun din domɑru tu du Yosɛfun bwese kɛrɑ sɔɔ.
Domi yen tɔmbu bɑ kuɑ beɡibun wiruɡibu.
17 Yosɛfun bwese kɛrɑ ye, yɑ bɛɛrɛ mɔ.
Yɑ dɑm mɔ nɡe kɛtɛ kinɛru.
Yen dɑm mu sɑ̃ɑwɑ nɡe ɡbeeku kɛtɛn kɔbin dɑm.
Dɑm mɛyɑ yɑ rɑ kɑ bwese tukunu so,
kpɑ yu nu ɡirɑ.
Efɑrɑimun tɔn dɑbirɑ tɑ sɑ̃ɑ nɡe kɔbi yin tiɑ,
mɑ Mɑnɑsen tɔn dɑbirɑ mɑɑ sɑ̃ɑ nɡe kɔbi yin yiruse.
18 Sɑbuloni kɑ Isɑkɑrin bwese kɛrin sɔ̃ u nɛɛ,
Gusunɔ, ɑ Sɑbulonin bwese kɛrɑ kuurɑsio
yen tenkurun sɔ̃ te yɑ mɔ̀ nim ɡoorɔ.
Kpɑ ɑ de Isɑkɑrin bwese kɛrɑ yɑ n wɑ̃ɑ bɔri yɛndu sɔɔ yen kunɔ.
19 Bɑ koo tɔmbu soku ben ɡuunɔ
kpɑ bu yɑ̃kunu ko sɑnnu
nɡe mɛ woodɑ yɑ ɡeruɑ.
Ben dukiɑ yɑ koo nɑwɑ nim wɔ̃kun tenkurun di
kɑ sere mɑɑ yɑni sɛɛrin di.
20 Gɑdin bwese kɛrɑn sɔ̃ u nɛɛ,
bu Gusunɔ siɑro
wi u Gɑdin bwese kɛrɑ bɑtumɑ bɑkɑ wɛ̃.
Yɑ yen yibɛrɛbɑ mɑrɑ
nɡe ɡbee sunɔ ɡe ɡɑ ɡen yɑɑ mɑrɑ ɡu kɑsuku
sɑɑ wirun di sere kɑ nɑɑsɔ.
21 Yɑ tii tem mɛ mu ɡeɑ bo ɡɔsiɑ.
Ye wiruɡii u rɑ sue yerɑ yɑ suɑ.
Yɑ ɡbiɑ Isirelibɑ kpuron wuswɑɑɔ tɑbu sɔɔ.
Yɑ Yinni Gusunɔn woodɑ kɑ win ɡere mɛm nɔɔwɑ.
22 Dɑnun bwese kɛrɑn sɔ̃ u nɛɛ,
Dɑnun bwese kɛrɑ yɑ sɑ̃ɑwɑ nɡe ɡbee sunɔ kpɛmbu
ɡe ɡɑ yɔ̃ɔmɑ Bɑsɑnin di.
23 Nɛfitɑlin bwese kɛrɑn sɔ̃ u nɛɛ,
Nɛfitɑlin bwese kɛrɑ yɑ Yinni Gusunɔn domɑru yibɑ
mɑ yɑ win durom wɑ.
Yen tem mu ko n wɑ̃ɑwɑ sɑɑ sɔ̃ɔ duu yerun di
n kɑ dɑ sɔ̃ɔ yɛ̃sɑn nɔm dwɑrɔ.
24 Asɛɛn bwese kɛrɑn sɔ̃ u nɛɛ,
Asɛɛn bwese kɛrɑ yu domɑru wɑ
n kere bwese kɛri yi yi tie.
Gusunɔ u de yen mɑɑbu bu ye kĩru sɔ̃ɔsi,
kpɑ yen tem mu n olifin ɡum yibɑ too,
25 kpɑ yen wusun ɡbɑ̃rɑnun kɔnnɔsu su n sɑ̃ɑ sisuɡisu kɑ sii ɡɑnduɡisu,
kpɑ yɑ n dɑm mɔ yen wɑ̃ɑrun tɔ̃ru kpuro sɔɔ.
26 Yerɑ Mɔwisi u kpɑm ɡeruɑ u nɛɛ,
bɛɛ Isirelibɑ, i n yɛ̃ mɑ Yinni ɡoo sɑri nɡe Gusunɔ.
Wee u wɔllu sɔni u kɑ sisi bɛɛn mi kɑ win yiiko bɑkɑ.
Guru wirɑ u duɑ u kɑ wee u bɛɛ somi.
27 Wiyɑ u sɑ̃ɑ bɛɛn kuku yeru sere kɑ bɑɑdommɑɔ.
Sɑɑ yee yellun diyɑ win nɔm dɑmɡuu ɡɑ bɛɛ kɔ̃su.
Mɑ u bɛɛ yibɛrɛbɑ ɡirɑ u nɛɛ, i bu kɑm koosio.
28 Yen sɔ̃nɑ bɛɛ Isirelibɑ, Yɑkɔbun bweseru, i sɔ̃ bɔri yɛndu sɔɔ.
I sɔ̃wɑ mi dĩɑ binnu kɑ resɛm yɑ rɑ koore too.
Mɛyɑ ɡurɑ yɑ rɑ mɑɑ nɛ mi.
29 Bɛɛ Isirelibɑ, i sɑ̃ɑwɑ doo nɔɔruɡibu.
I ǹ kɑ bweseru ɡɑru weenɛ.
Domi i sɑ̃ɑwɑ bwese te Yinni Gusunɔ u fɑɑbɑ kuɑ.
U sɑ̃ɑwɑ nɡe bɛɛn tɛrɛru
te tɑ bɛɛ kɔ̃su.
U sɑ̃ɑwɑ nɡe bɛɛn tɑkobi
ye yɑ bɛɛ nɑsɑrɑ wɛ̃ɛmɔ.
Bɛɛn yibɛrɛbɑ bɑ koo nɑ bu bɛɛ suuru kɑnɑ
kpɑ i ben tii suɑbu kpeerɑsiɑ.
Mɔwisin ɡɔɔ