19
1 Yinni Gusunɔ u nɛɛ, ɑ ɡɔɔ swĩiyɔ Isirelibɑn sinɑ bibun sɔ̃, ɑ nɛɛ,
2 ben mɛro u sɑ̃ɑwɑ nɡe ɡbee sunɔ niu ɡeu
ɡe bɑ yɛ̃ ɡbee sinɑnsun suunu sɔɔ.
Gɑ rɑ n ɡen binu kpunɛwɑ
ɡɑ n nu diisiɑmɔ.
3 Mɑ ɡɑ ɡen buu teu seeyɑ
ɡɑ kuɑ kpɛmbu.
Gɑ ɡu yɑɑ mwɑɑbu sɔ̃ɔsi,
mɑ ɡɑ tɔmbu sɛ̃sukum wɔri.
4 Ye sɔbɑ ɡen ɡɑri nuɑ,
mɑ bɑ ɡu yinɑ bɛriɑ.
Yerɑ bɑ ɡu mwɑ kɑ kɔkɔru
bɑ kɑ dɑ Eɡibitiɔ.
5 Mɑ ɡen mɛro ɡɑ mɑrɑ ɡu wurɑmɑ.
Adɑmɑ ɡɑ tɛmɑnɑbu kpɑnɑ,
ɡɑ wɑ n ǹ koorɔ.
Yen biruwɑ ɡɑ mɑɑ ɡen buu teu suɑ
ɡɑ seeyɑ ɡɑ dɑm kuɑ,
ɡɑ kuɑ ɡbee sunɔ kpɛmbu.
6 Mɑ ɡɑ wɔri ɡbee sinɑnsun wuuru sɔɔ.
Gɑ yɑɑ mwɑɑbu mɛɛrɑ.
Mɑ ɡɑ tɔmbu sɛ̃sukum wɔri.
7 Gɑ tem min sinɑ kpɑɑru wɔri ɡɑ surɑ.
Mɑ mɛn wusu kuɑ bɑnsu.
Mɑ tɔmbu kɑ ye yɑ wɑ̃ɑ tem mɛ sɔɔ kpuro
yɑ bɛrum soorɑ ɡen kukiribun sɔ̃.
8 Mɑ bwesenu nu mɛnnɑ
nu kɑ ɡu tɑbu kuɑ.
Bwese ni, nu nɑwɑ yɑm kpuron di.
Bɑ ɡu suurɑ kuɑ ɡɑ wɔri.
9 Mɑ bɑ ɡen wɛ̃ru yɑbɑ
bɑ tɑɑbu doke
bɑ ɡu sɔri diru ɡɑru sɔɔ.
Yen biru bɑ kɑ ɡu dɑ Bɑbilonin sinɑ bokon mi.
Mɑ bɑ ɡu kɛnusi
sere bɑ ǹ mɑɑ ɡen kukiribu nɔɔmɔ Isirelibɑn ɡuunɔ.
10 Yinni Gusunɔ u mɑɑ nɛɛ,
ben mɛro u sɑ̃ɑwɑ nɡe resɛm
ye bɑ duurɑ dɑɑ torɑn bɔkuɔ.
Resɛm ye, yɑ rɑ mɑ.
Yɑ mɑɑ kɑ̃ɑsi yibɑ nim mɛ yɑ wɑɑmɔn sɔ̃.
11 Yɑ kɑ̃ɑsi dɑmɡii mɔ yi bɑ koo kpĩ bu kɑ sinɑ dɛki ko.
Yɑ wɑɑbu wɑ̃, yen ɡunum kɑ yen kɑ̃ɑsi dɑbinun sɔ̃.
12 Adɑmɑ bɑ ye wukɑ kɑ mɔru
bɑ surɑ temɔ.
Woo ɡe ɡɑ wee sɔ̃ɔ yɑri yerun di,
ɡɑ yen mɑrum ɡberɑsiɑ.
Yen kɑ̃ɑsi dɑmɡii yi, yi ɡberɑ yi dɔ̃ɔ mwɑɑrɑ.
13 Tɛ̃ yɑ ɡire tem ɡbebum sɔɔ
mi ɡɑ̃ɑnu ku rɑ kpi.
14 Mɑ dɔ̃ɔ u yɑrɑ sɑɑ yen kɑ̃ɑsin di
u yen mɑrum mwɑ.
Yɑ ǹ mɑɑ kɑ̃ɑsɑ dɑmɡiɑ mɔ
ye yɑ koo ko sinɑ dɛkɑ.
Womu ɡeni ɡɑ sɑ̃ɑwɑ ɡɔɔ wuri. Geyɑ bɑ ko n dɑ ko bɑ̀ n ɡɔɔ wuri mɔ̀.
Isirelibɑ
bɑ Yinni Gusunɔ seesi