1 Tem mɛ bɑ Yosɛfun bibun bweseru wɛ̃, mɛn nɔɔ burɑ yeru tɑ wɑ̃ɑwɑ sɑɑ Yuudɛnin di, Yerikon bɔkuɔ, n kɑ dɑ bwiiyɔ yi yi wɑ̃ɑ Yerikon sɔ̃ɔ yɑri yeru ɡiɑ ɡbɑburɔ, n kɑ ɡirɑri Betɛliɔ mi ɡuunu wɑ̃ɑ. 2 Sɑɑ mɑɑ min di, tɑ dɑ Lusiɔ kɑ Atɑrɔtuɔ, Aɑkibɑn tem nɔɔ burɑ yerɔ. 3 Mɑ tɑ dɑ sɔ̃ɔ duu yeru ɡiɑ mi Yɑfilɛtibɑn tem mu nɔɔ yɔ̃rɑ. Mɑ tɑ mɑɑ dɑ Bɛti Horoniɔ kɑ Gesɛɛɔ n kɑ ɡirɑri nim wɔ̃ku ɡe bɑ mɔ̀ Mɛditerɑnɛɔ. 4 Tem mɛyɑ mu kuɑ Yosɛfun bibu Mɑnɑse kɑ Efɑrɑimun bweserun tubi.

5 Efɑrɑimubɑ bɑ mɛn sukum suɑ mɛ̀n nɔɔ burɑ yeru tɑ wɑ̃ɑ sɑɑ Atɑrɔtu Adɑrin di sɔ̃ɔ yɑri yerɔ sere n kɑ ɡirɑri Bɛti Horoniɔ ye yɑ wɑ̃ɑ ɡunɡuru wɔllɔ. 6 Min diyɑ tɑ dɑ nim wɔ̃ku ɡe bɑ mɔ̀ Mɛditerɑnɛɔ. Sɔ̃ɔ yɛ̃sɑn nɔm ɡeu ɡiɑ tɑ dɑ Mikimɛtɑtin di sere Tɑɑnɑti Siloɔ sɔ̃ɔ yɑri yeru ɡiɑ, n kɑ ɡirɑri Yɑnɔɑɔ. 7 Sɑɑ Yɑnɔɑn di tɑ dɑ Atɑrɔtuɔ kɑ Nɑɑrɑtɑɔ kɑ Yerikoɔ n kɑ ɡirɑri Yuudɛniɔ. 8 Sɔ̃ɔ duu yeru ɡiɑ mɑɑ, tɑ dɑ sɑɑ Tɑpuɑn di n kɑ dɑ Kɑnɑn dɑɑrɔ, n kɑ ɡirɑri nim wɔ̃ku ɡe bɑ mɔ̀ Mɛditerɑnɛɔ. Mɛni kpurowɑ bɑ Efɑrɑimun bwese kɛrɑ wɛ̃. 9 Mɑ bɑ mɑɑ Mɑnɑsen tem wusu ɡɑsu kɑ sin bɑru kpɑɑnu suɑ bɑ bu sosiɑ. 10 Efɑrɑimubɑ bɑ ǹ Kɑnɑnibɑ ɡire be bɑ wɑ̃ɑ Gesɛɛɔ. Bɑ bu deriwɑ ben suunu sɔɔ bɑ yoo sɔmɑ koosiɑmɔ sere kɑ ɡisɔn ɡisɔ.