2
1 Nɛnɑ nɑ sɑ̃ɑ nɡe ɡunɑrun biibii ye yɑ kpiɑ tem tɛɛrɑɔ.
Nɑ mɑɑ sɑ̃ɑ nɡe yɑkɑsun biibii ye yɑ wɑ̃ɑ wɔwɑɔ.
Durɔ u nɛɛ,
2 ɑ̀ n nɛn kĩnɑsi wɑ win wɔndiɑ kpɑɑsibun wuurɔ,
u rɑ n sɑ̃ɑwɑ nɡe biibii ye yɑ wɑ̃ɑ sɑ̃kin suunu sɔɔ.
Kurɔ u nɛɛ,
3 ɑ̀ n nɛn kĩnɑsi wɑ ɑluwɑɑsibɑn suunu sɔɔ,
u sɑ̃ɑwɑ nɡe dɑ̃ɑ te bɑ mɔ̀ pɔmiɛ dɑ̃nun suunu sɔɔ tèn mɑrum mu dibu do.
Nɑ rɑ kɑ̃ nɑ n sɔ̃ win sɑɑrɔ.
4 U kɑ mɑn dɑ mi bɑ rɑ tɔ̃ɔ bɑkɑ dĩɑnu di.
Mɑ u mɑn nɛnuɑ kɑ kĩru.
5 Wee kĩrɑ mɑn bɑrɔ kuɑ.
A mɑn dɑm kɛ̃ kɑ kirɑ duronu, kɑ pɔmiɛn mɑrum.
6 Nɑ kĩ nɑ n nɛn wiru sɔndi win nɔm dwɑrɔ,
kpɑ win nɔm ɡeu ɡu mɑn bɔkɑsi.
Durɔ u nɛɛ,
7 bɛɛ Yerusɑlɛmun wɔndiɑbɑ, nɑ bɛɛ sɔ̃ɔmɔ
kɑ yɛɛ kpiki kɑ nɛnnun yĩsinu,
i ku nɛn kĩnɑsi yɑmiɑ sɑɑ ye u ǹ kĩ u se.
Durɔ u wee
Kurɔ u nɛɛ,
8 nɑ nɛn kĩnɑsin nɔɔ nɔɔmɔ.
Wɔɔ u ɡuunu sɑrikirɑmɔ u wee.
9 U sɑ̃ɑwɑ nɡe yɑɑ kpiku ǹ kun mɛ nɡe ɡini kpɛmɑ.
Wi wee dirun biruɔ,
u mɑn mɛɛrimɑ fɛnɛntin di.
10 Mɑ u kɑ mɑn ɡɑri kuɑ u nɛɛ,
ɑ seewo nɛn kĩnɑsi, kurɔ burɔ, ɑ nɑ.
11 Wee purɑn sɑɑ yɑ doonɑ,
mɑ ɡurɑ yɑ yɔ̃rɑ .
12 Biibii yɑ kpiɑ yɑm kpuro.
Sɑ ɡunɔ bwese bwesekɑn swĩi nɔɔmɔ.
Kpɑrukonun swĩi yi nɔɔrɑ bɛsɛn tem sɔɔ.
13 Dɑ̃ɑ te bɑ mɔ̀ fiɡie tɑ mɑrum torumɔ,
mɑ resɛm tɔ̃kɑn wɛ̃sun nuburɑ pusɑ.
A seewo, ɑ nɑ nɛn kĩnɑsi, kurɔ burɔ,
14 wunɛ wi ɑ sɑ̃ɑ nɡe sɑ̃kusɑ̃ ye yɑ wɑ̃ɑ kpee bɑɑ sɔɔ yɑ kukuɑ.
A mɑn wunɛn wuswɑɑ sɔ̃ɔsio.
A de n wunɛn nɔɔ nɔ.
Domi wunɛn dɔkɔrɑ nɔɔbu do.
Mɛyɑ mɑɑ wunɛn wuswɑɑ rɑ mɑn wɛ̃re.
Kurɔn mɛro u nɛɛ,
15 i sun dɛmɑku binu mwɛɛrio
ni nu bɛsɛn resɛm ɡbɑɑru sɑnkumɔ sɑɑ ye yɑ wɛ̃su sɑ̃ɑ.
Kurɔ u nɛɛ,
16 nɛn kĩnɑsi u sɑ̃ɑwɑ nɛɡii,
nɑ mɑɑ sɑ̃ɑ wiɡii.
U win sɑbenu kpɑrɑmɔ yɑkɑsun biibiin suunu sɔɔ.
17 A de ɑ ɡɔsirɑ, nɛn kĩnɑsi, ɑ n wɑ̃ɑ ɡuunu wɔllɔ
ɑ n sɑ̃ɑ nɡe yɑɑ kpiku ǹ kun mɛ nɡe ɡini kpɛmɑ,
sere sɔ̃ɔ u kɑ du sɑɑru tu kpɛ̃ɑ.
Kurɔ u kɑ win kĩnɑsi dosimɔ
Kurɔ u nɛɛ,