MATIU
Matiudo Vua Amure
E Matiu fu e Jesu Kuraesido vua fiemo be, ro ive fuone be bu kua Rivaeno kuavo. Ro i fuone fu meno ije fu e Romuko aesakae samuavo ijiebuo imena e ijiebuo takesi moni karimo. Ro rade Jesu fu Matiu abeno fu una e vua fuone fiemo ije rei. E Matiu fu buki igene abe isoekina e Jiusi ije bu ijia dana vierafero Jesu fu ma Godire kuamo fu bu karauniakiro ari ruaemaro bu ijiege vierafeke. Matiu fu buki ije vame izege Jesu fu arina e ije Godido vua vierafena kuaevo ijiebuo vua ije bu ma isuibe buki akae ijia isoena kuae fu rekono kuaeva ijene remogana fune ijiakuma riarema fu ijene isoe. Ro Matiu fu kuke Jesudo vua boeje izege Godi fu e boeje ijiebuo oe ije samuagiadufuo ije fu kame mena kuaema ijene isoe. Ro fu kuke e boeje bu izege rega bu Godido e ijena besu maziedufuo ijene isoe.
Matiudo vua binobino fu isoema ijeja -
1:1–2:23 Jesu izege bu bieteva ijene.
3:1-12 Joni e do ruoriamo fu imenoema ijene.
3:13–4:11 Jesu fu nigofo do ruemoga rade Setani fu kekena biesirima ijene.
4:12–18:35 Jesu fu aesakae Gareri ijia oenoekinu vua nijasiaema ijene.
19:1–20:34 Jesu fu aesakae Gareri arena una Jerusareme ijia ruaema ijene.
21:1–27:66 Maza ije e bu Jesu abe kurosi kanadufuo ije fu uria rekoga irerebe ude rema ijene.
28:1-20 Jesu fu mako ijia una urina e fuone ije biediamo bu gaeva ijene.
1
Jesudo uifari ije bu uinuvena ruoma Jesu bu bieteva ijene
(Ruki 3:23-38)
Suvuare ige ijeja izege Jesu Kuraesido asaerafa ije bu e Eburamedo ijia uinuvena ruoma e Devidido ijia usiaena ruoma Jesu bieteva ijene. Ro e uije ije bu uinuvena ruaeva ije ijiege. E Eburame fu fari fuone e Aeseki bietemoga fu uri fari fuone e Jekafu bietei. Fu Jekafu bietemoga fu uri e Judakiro uviarafa fuone ije nafei. Areme Juda fu uri ame inokiro e Ferezekiro e Zera nafei ro asie buone ije bara Tama. Ro e Fereze fu uri fari fuone e Ezironi nafenoga fure uri fari fuone e Rame nafei. 4-6 Ro e Rame fu uri fari fuone e Aminadabi nafenoga fu uri fari fuone e Nasoni nafei. Ro e Nasoni fu uri fari fuone e Saramoni nafenoga fu uri fari fuone e Boezi nafei. Ro e Boezido asie ije bara Reabi. Ro e Boezi fu uri bara Ruti abena e Obedi nafei. Ro e Obedi fu uri fari fuone e Jesi nafenoga fu uri fari fuone Devidi e ije fu Kini rema ije nafei. Areme Devidi fu uri fari fuone e Soromoni nafei ro asie fuone ije fu e Uraeado bara.
7-10 Ro e Soromoni fu uri fari fuone e Reoboame nafenoga fu uri fari fuone e Abaeja nafei. Ro Abaeja fu uri fari fuone e Asa nafenoga Asa fu uri fari fuone e Jeosofati nafenoga fu uri fari fuone e Jorame nafei. Ro Jorame fu uri fari fuone e Azaraea nafenoga fu uri fari fuone e Jotami nafenoga fu uri fari fuone e Easi nafei. Ro Easi fu uri fari fuone e Esekaea nafenoga fu uri fari fuone e Manasa nafenoga fu uri fari fuone e Amoni nafei.
11-14 Ro Amoni fu uri fari fuone e Josaea nafenoga fu uri fari fuone e Jekoniakiro iviefari fuone ije nafei. Areme e Bebironiko ijiebe usiae Jerusareme sidove ije kenama areme uri e Isureroko ije bune kaenamiana una are buone Babironi ijia vae. Areme rade e Jekonia fu uri fari fuone e Siritero nafenoga fu uri fari fuone e Zerubabero nafei. Ro e Zerubabero fu uri fari fuone e Abiudi nafenoga fu uri fari fuone e Eraeakimi nafenoga fu uri fari fuone e Ezo nafei. Ro Ezo fu uri fari fuone e Zedoke nafenoga fu uri fari fuone e Akimi nafenoga fu uri fari fuone e Eriudi nafei.
15-17 Ro e Eriudi fu uri fari fuone e Erisa nafenoga fu uri fari fuone e Matani nafei. Ro e Matani fu uri fari fuone e Jekafu nafenoga fu uri fari fuone e Josofu bara Merido baru ije nafei. Ro bara Merire Jesu e ije bu kua Kuraesino kuavo e ije fu e boeje karauniakiro ruaema ijene biete. Ijadufuo e Eburame ijia ruoma e Devidi bu nafeva ijia e uije ije buka e fotini (14) ijiege. Ro una kuke e Devidido uifari ijia ruoma maza ije e Babironiko bu usiae Jerusareme sidove kena areme e Isureroko bu kaenamia Bebironi vaeva ijia e uije bu kuke e fotini (14) ijiege. Ro una maza ije bu kaenamia Babironi vaeva ijia ruoma e ije Godi fu abe e nuvuone E Ireobo rema ije bu bieteva ijia e uije bu kuke e fotini (14) ijiege.
Jesu Kuraesi bu bieteva ijene
(Ruki 1:1-7)
18 Ijiege ro Jesu Kuraesi bu bieteva ije fu ijiege. Bara Meri asie fuone ije bu e Josofu manidufuo kuae. Ro fu uria kabaekua baruna naebe naema ijia fu fue ganami gake fu Kavene Akae ijadufuo daro ijia fu e fudiema fu ije gae. 19 Rove e Josofu fuka e mado fu naebe una Meri e ije fu fudiema ije mesirina dabe kuaegadufuo ije fu naebe ijiege rei. Ijadufuo fume oe fuone ijia Meri fu abedufuo ije fu mauike ijia arekiro fu ijiege vierafei. 20-21 Fu ijiege vierafenoenoga E Ireobo ijadufuo anera ijare ari naka urana kuae, Josofu e Devidido uifari ige bara Meri a abekiro jumemo ije fu bakino abene. Ro e ije fu fudiema ije fu Kavene Akae ijadufuo daro ijia fudiedo fu ame fari bietekuma a ive ina Jesu kuake. Ijadufuo maeje fure e fuone ijiebuo ise ije bu renoejo ije karauniakono kuae.
22 Ijiege ro ire boeje bu reva ije fune izege E Ireobo fu isuibe Asaea e vua fuone vierafena kuaemo ijadufuo oe ijia vierafejamo fu kuaema fune ijiakuma riarekiro fu ije ijierei. 23 Ro vua ije fu kuaema ije bu ijiege isoe,
Bara kabaekua be fu baruna naebe naeno fu e fudiena ame fari be bietega bu e Imanuero kuake. (Ro ive ijadufuo maeje Godi fu noena).
24 Ijadufuo Josofu fune naema suoke urina izege E Ireobo ijadufuo anera fu kuaraema ijiege fune bara Meri abei. 25 Fu abe rove fu naebe fuosiki besu naekoga fu vakuma ame fuone amure ije biete. Fu bietemoga Josofu fu abe ive ina Jesu kuae.