Matiu
Jisas nukan Ämän Eposek Matiu nukas jer wewon
Okoro buk nukan onoktapau
Jisas ko meienuk, woisan 35 orip manonuk, Matiu ko kar Jisas nukan ämän oi ariäwon ro kos okoro Jisas nukan Ämän Eposek jer wewon. Matiu kos okoro ämän nukakan jaukut Jura roasiret jer we marowon. Akan ronkat Anut nukas akan kamwaraun ro näwäu sare maronuk, kowai rai ronkateäin. Utianik, akan ro näwäu owo senek kowai ak äpu wa, okon, Jisas okoro omnokou opok kowon, akan ronkat oiroror orip raumoi, Jisas mesin akan woiaka epar mau wa. Matiu nukas Jisas ko akan kamwaräun ro näwäu epar ätär maraun kiro buk jer we marowon.
Okoro buk tainoraun ämän
1:12-23 Jisas ko owose pewon.
3:1-12 An jomariäwon ro, Jon nukan sarau.
3:13–4:11 Jon nukas Jisas an jomuronuk, Satan nukas Jisas ate aparwon.
4:12–18:35 Jisas ko Galili provins opok, Anut nukan ämän roasiret aware ariewon.
19:1–20:34 Jisas ko Galili provins utomoi, Jerusalem näu mena kowon.
21:1–24:66 Jisas ko tup karar Jerusalem näu mena raunuk, owo onok pewon.
28:1-20 Jisas ko meiemara, kon roasiret amiakap penuk, ak ko aparin.
1
Jisas Krais nukan Askanai.
Okoro Jisas Krais nukan askanai akan enmaka, Jisas ko Devit nukan kinjauk ko Apraham nukan askanai.
2-6 Apraham ko akan momonaka pakas pote Devit kamwareäwon ro, akan enmak okoro jer we moin, rau:
kiro Apraham,
Apraham nukan mokoi Aisak,
Aisak nukan mokoi Jekob,
Jekob nukan mokoi Juda, kon amakut pak,
Juda nukan mokoi Peres, ko Sera ori awan aninawa Tamar,
Peres nukan mokoi Hesron,
Hesron nukan mokoi Ram,
Ram nukan mokoi Aminarap,
Aminarap nukan mokoi Nason,
Nason nukan mokoi Salmon,
Salmon nukan mokoi Boas, kon anak Rehab,
Boas nukan mokoi Obet, kon anak Rut,
Obet nukan mokoi Jesi,
Jesi nukan mokoi, kamwareäwon ro king Devit.
7-11 Devit rawon ses opok Israel roasiret Babilon mena karapus imware manoin, okoro askanai akan enmaka:
kiro Devit,
Devit nukan mokoi Solomon, ko Uria nukan waun mokoi,
Solomon nukan mokoi Rehoboam,
Rehoboam nukan mokoi Abija,
Abija nukan mokoi Esa,
Esa nukan mokoi Jehosapat,
Jehosapat nukan mokoi Jehoram,
Jehoram nukan mokoi Usia,
Usia nukan mokoi Jotam,
Jotam nukan mokoi Ehas,
Ehas nukan mokoi Esekaia,
Esekaia nukan mokoi Manasa,
Manasa nukan mokoi Emon,
Emon nukan mokoi Josaia,
Josaia nukan mokoi Jekonaia, kon amakut pak.
12-16 Babilon mena Israel roasiret pote rain ses opok, pote Jisas an jowon ses opok, okoro askanai akan enmaka:
kiro Jekonaia,
Jekonaia nukan mokoi Sealtiel,
Sealtiel nukan mokoi Serubabel,
Serubabel nukan mokoi Abiut,
Abiut nukan mokoi Eliakim,
Eliakim nukan mokoi Eso,
Eso nukan mokoi Sadok,
Sadok nukan mokoi Ekim,
Ekim nukan mokoi Eraiat,
Eraiat nukan mokoi Eleasa,
Eleasa nukan mokoi Matan,
Matan nukan mokoi Jekob,
Jekob nukan mokoi Josep, ko kon wau Maria, ko Jisas nukan anak.
Jisas ko Krais. Kiro enip onoktapau ‘Anut nukas äsimorwon, ätäi imäikaun ro’.
17 Keseria, kiro askanai 14 orip akan tupsiu pakas ak Apraham raiäwon ses pakas pote Devit rawon opok. Karauk askanai ak 14 orip akan tupsiu pakas, Devit rawon ses pakas pote Babilon mena karapus rain opok. Keseriar, askanai 14 orip akan tupsiu pakas karapus rain pakas pote Jisas Krais an jowon ses opok rain.
Maria Jisas Krais An Jowon.
(Luk 2:1-7)
18 Jisas Krais owose pewon? Kon pewon onok kesek. Kon anak Maria ko Josep owaun sare moin. Utianik, meter kiro ro asir ori au ouratäu wa opok, Maria ko äpu mowon Anut nukan Osou Näus ko amaiwo sarewon. 19 Josep ko erekapu onok eposek miäu. Keseria, ko roasiret amiak opok Maria utonuk, Maria wou aru mai. Keserianik, ko ämäi ämäi Maria utaun ronkatewon. 20 Utianik, Josep ko asik utaun ronkat ounuk ounuk, Anut nukan sarau eitekus nini epir pakas keser auruwon, “Josep. Devit nukan askanai, Anut nukan Osou Näu nukasar Maria amaiwo sarewon. Keseria, na kiro asik owaun itok, ko nan asik. 21 Ko mokoi an jounuk, na kon enip Jisas mam. Kiro enip onoktapau ‘kos kon roasiret akan onok aru jäkäi mareanik, ak ätäi imwarai’.”
22 Rurisapai, kiro onok erekapu Näwäu nukas Anut nukan ämän roianik, areawon ro, Aisaia, auruwon siar kiro epar peu. Aisaia nukas äiewon, 23 “Kar asir makun ko ro pak niniäu wa, ko amaiwo sareanik, ko mokoi an jowai, kiro mokoi kon enip Emaniuer äiäiei. Kiro onoktapau kesek, ‘Anut ik pak rau’.” Aisaia 7:14
24 Keserianik, Josep ko siräumara, Anut nukan sarau eitek nukas auruwon siar kon asir Maria ätäi owon. 25 Utianik, Josep ko kiro asir pak ninau wa erar rai rai, pote Maria ko mokoi an jowon. Mokoi an jounuk, Josep nukas kiro mokoi enip Jisas mowon.