6
1 Má Hodáay hamkáráni hesábá gón shomá dazbandia kanén ke Hodáay rahmat ke shomárá rasetag, áiá zawál makanét.
2 Chéá ke Hodá gwashit:
“Man rahmatay wahdá tai habar gósh dásht o
nejátay róchá tai madat kort.”
Tará gwashán, nun Hodáay rahmatay wahd ent, nun nejátay róch ent.
Pulosay sakki o sóri
3 Má hechkasay pádáni démá mán gisshénókén seng dawra nadayén tánke may kár o hezmatay bárawá kasé badén gappé majant.
4 Má cha wati har kárá pésha dárén ke Hodáay hezmatkár én: gón mazanén sagg o bardáshtá, ázár o sakki o sóri o janjáláni tahá,
5 latth o kotth o zendán o shóresháni tahá, hédréchi o shappási o gozhnay tahá,
6 gón páki, gón sarpadi, gón sabr o ópár, gón mehrabáni, gón Pákén Ruhá ke may delá ent, gón rástén mehrá,
7 gón rástiay habaray bayán kanagá, gón Hodáay zórá, gón rástáwariay seláhán ke may rástén o chappén dastá ant,
8 ezzat o béezzati o bannámi o washnámiay tahá. Mardom márá rad dayóka gwashant, bale má rástiay sará óshtátagén.
9 Má námdár én bale kass márá mána nayárit. Chó mordagá én bale esh ent, zendag én. Latth o kotth bayagá én, bale koshag nabutagén.
10 Gamáni tahá én, bale modám shádán én. Garib o nézgár én, bale bázéné sér o ábáda kanén. Márá hecch nést bale har chizzay wáhond én.
11 Oo Korentián! Má gón shomá tachká gapp jatag o wati del pa shomá práh kortag.
12 May del pa shomá práh ent, bale shomay del pa má práh naent.
13 Shomá mani chokk ét, gón má hamá paymá bekanét ke má gón shomá kanagá én, shomá ham wati delá práh bekanét.
Gón nábáwarán sharikdár mabét
14 Gón nábáwarán yakkén jogay chérá mabét. Rástáwari o badkári hamráha nabant o rozhnái gón taháriá hamráhdária nakant.
15 Masih o Shaytánay nyámá hecch hamshawri nést. Báwarmandá gón nábáwará hecch sharikdári nést.
16 Hodáay lóg o bot yakjáha nabant. Chéá ke má namiránén Hodáay lóg én, anchó ke Hodáyá gwashtag:
“Man áyáni nyámá jahmenenda bán o
áyáni hamráha bán.
Man áyáni Hodá bán o
á mani kawma bant.”
17 Paméshká Hodáwanda gwashit:
“Cha esháni nyámá dar áét o jetá bebét o
nápákén chizzán dast majanét,
gorhá man shomárá dasta gerán” o
18 “man shomay Peta bán o
shomá mani bacch o jenekka bét,”
zórmandén Hodáwanda gwashit.