Dargwaz
1
Esráili zolm o zóray ámácha bant
Ákubay hamá mardénchokk* ke har yakkéá wati lógay mardom zortant o gón Ákubá Mesrá shot gón, áyáni nám esh ant: Ruben o Shamun o Láwi o Yahudá o Issákár o Zebulun o Benyámin o Dán o Naptáli o Jád o Ásher. Ákubay chokk o nomásag sarjamiá haptád atant. Issop cha pésará Mesrá at. Issop mort o sajjahén bráti ham mortant o áiay hamomrén sarjamén nasl ham mort. Bale Bani Esráil porsamar at. Áyán chokk o bar kort, waddán but o sakk báz butant. Mesray molk cha Esráilián porr but.
Nun Mesray sará nókén Perawné bádsháhi tahtá nesht. É bádsháh Issopay bárawá sarpad naat. Áiá gón wati mahluká gwasht: “Bechárét, Bani Esráilay mardom cha má báz géshter o zórmandter jórh butagant. 10 Báyad ent pa hóshmandi esháni démá bedárén, agan é géshter bebant o márá jangé begipt, é may dozhmenáni hamráha bant o gón má janga kanant o padá cha may molká tachant o rawant.”
11 Bádsháh o áiay mansabdárán, bigárgir esháni kármaster kortant ke esháni sará zóráki bekanant o gránén káresh bebandant. Bani Esráilián pa Perawná§ do shahr addh kort. Yakkéay nám Pitum at o yakkéay Ramesés. Doén ambári shahr* atant. 12 Mesrián áyáni sará haminkas ke géshter zórákia kort, Esráili géshter bayán o sheng bayána butant. Gorhá Mesrián cha Esráilián torset. 13 Mesrián Esráili pa bérahmi kára bastant. 14 Hesht o batánahay addh kanagesha parmátant o dhagáráni sará har dábén gránén káresha geptant o áyáni zendagiesh azáb kort. Sajjahén káresh pa bérahmi parmátant.
15 Mesray bádsháhá gón Ebráni janbógán§ habar kort. Yakk janbógéay nám Shiprah at o domiay Puah. 16 Gón eshán gwashti: “Wahdé shomá Ebráni janénán chokmát kanét, chellagiay bashánahá bechárét, agan chokk bachakké, bekoshéti o agan jenekké, belléti.” 17 Bale janbógán cha Hodáyá torset o á dhawlá nakortesh ke Mesray bádsháhá gwashtagatant o mardénchokkesh nakoshtant. 18 Gorhá Mesray bádsháhá janbóg lótháéntant o gón áyán gwashti: “Shomá chéá chó kort o mardénchokk zendagá eshtant?” 19 Janbógán gón Perawná gwasht: “Ebráni janén Mesri janénáni paymá naant. Dhaddhén zál ant o cha janbogáni rasagá pésar chokká pédá kanant.”
20 Gorhá Hodá janbogáni sará mehrabán but. Esráilián chokk o bar kort o sakk báz butant. 21 Janbógán cha Hodáyá torset, paméshká Hodáyá áyáni lóg ábád kortant.
22 Gorhá Perawná wati sajjahén mardom hokm dát o gwashtant: “Har Ebráni mardénchokké ke pédá bit, áiá Nillay kawrá dawr bedayét, bale Ebráni jenekkán bellét.”
* 1:1 Asligén Ebráni nebeshtánka gwashit: Esráilay mardénchokk. Esráil, Ákubay domi nám at. 1:11 Mansabdár, bezán káréay zemmahwár, ogdahdár. 1:11 Bigárgir, bezán hamá mardom ke dega mardomán pa zór kára bandit. § 1:11 Perawn hecch bádsháhay jenday nám nabutag. Ahdi zamánagán, Mesray har bádsháh Perawn gwashag butag. * 1:11 Ambári shahr, bezán hamá shahr ke ódá warák o sámán ambár kanaga bit. 1:14 Batánah, bezán heshtáni lecchénagay gel yá semetth. 1:15 Ebráni, bezán Esraili. § 1:15 Janbóg, bezán dáig, dáeg, dinnabóg, chokk pédá kanókén ballok.