1 Oo brátán! Nun, may Hodáwandén Issá Masihay áyag o áiay kerrá may mocch bayagay bárawá, má cha shomá dazbandia kanén ke 2 agan mani námay sará anchén gappé shomárá sar but ke gwashit Hodáwanday róch átkag o rasetag, toré péshgóié bebit yá hál o hawálé yá kágadé, bezánét ke drógé, damáná larzán mabét o delá dawr madayét. 3 Chó mabit kasé warhé na warhé shomárá rad bedant, Hodáwanday róch tán hamá wahdá nayayt ke mardom cha Hodáwandá sarkassh mabant o bérahbandén* mard, bezán “tabáhiay chokk” páshk mabit. 4 Á Hodáay helápá oshtit o watá cha hamá sajjahén chizzán bálátera kant ke Hodáay námesh per ent yá parastesh kanaga bant. Godhsará wat Hodáay parasteshgáhá nendit o jára jant ke Hodá man án. 5 Shomárá yát naent ke wahdé shomay kerrá atán, man shomárá é hál dátant? 6 Shomá zánét ke hamá bérahbandén mardá annun kojám chizz dáragá ent o nayliti ke cha wati wahdá pésar záher bebit. 7 Chéá ke bérahbandiay chérén zór o wák wati kárá cha pésará kanagá ent, bale hamá ke bérahbandiay démá dáragá ent, tánke jendi dur kanaga nabit, bérahbandiay démá dárit. 8 Wahdé á dur kanag but, nun bérahbandén mard záhera bit, bale Hodáwandén Issá pa shán o shawkaté kayt o áiá tabáha kant, gón wati dapay hoppéá áiá nést o nábuda kant. 9 Bérahbandén marday áyag Shaytánay káráni bahré. Á gón har paymén zór o drógén nesháni o mójezahána kayt o 10 gón tahr tahrén badián hamá mardomán rada dant ke gári o gomráhiay ráhesh zortag. É mardom gár o gomsára bant, chéá ke eshán rásti dóst nadáshtag o nazortag ke berakkant†. 11 Paméshká Hodá pa eshán zórmandén prébé déma dant ke drógá báwar bekanant o 12 é dhawlá hamá sajjahén mardom mayárbár kanaga bant ke rásti‌esh báwar nakortag o badiay tahá shádmán butagant.

13 Oo brátán! Oo Hodáwanday dóstigén mardomán! Má báyad ent pa shomá modám Hodáay shográ begerén, chéá ke Hodáyá shomárá cha bendátá gechén kortag ke shomá Pákén Ruhay pák o palgár kanókén káray barkatá o rástiay sará wati imánay barkatá berakkét. 14 Pa é kárá, Hodáyá shomárá may wasshén mestágay barkatá tawár kortag ke shomá may Hodáwandén Issá Masihay shán o shawkatá bahramand bebét. 15 Gorhá, brátán, mohkam bóshtét o hamá tálim ke má shomárá dátagant, áyán mohr bedárét, zobáni habar bebant yá may nebeshtagén kágad.

16 May Hodáwandén Issá Masihay jend o may Hodáén Pet ke márá dósta dárit o wati rahmatay barkatá márá abadi delbaddhi‡ o sharrén ométi dátag, 17 shomay delá dhaddh kanát o shomárá pa har sharrén kerdár o goptárá zórmand kanát.