☰ Ebránián 1
Pa Ebránián kágadé
1
Hodáay kolaw
1 Gwastagén dawr o zamánagán báz randá Hodáyá cha nabiáni dap o zobáná gón may pet o pirokán báz paymá habar kortag, 2 bale é goddhi* róchán áiá gón má cha wati Chokkay dap o zobáná habar kortag, cha hamáiay dapá ke Hodáyá sajjahén chizz áiárá mirás dátagant o cha áiay wasilahá jaháni addh kortag. 3 É Chokk Hodáay shán o shawkatay ádénk ent, Hodáay tab o sareshtᆠzáhera kant o wati porzórén habaray barkatá sajjahén chizzán barjáha dárit. Mardománi gonáháni shódagá o rand, Chokk borzén arshay Hodáay rástén kashá nesht.
Chokk cha préshtagán báláter ent
4 Gorhá Chokk cha préshtagán sakk báz báláter ent, anchó ke hamá nám ham cha préshtagáni námá borzter ent ke Hodáyá Chokkárá mirás dátag. 5 Chéá ke Hodáyá hechbar gón wati hecch préshtagá nagwashtag:
“Taw mani Bacch ay,
maróchi man tará pédá kortag.”
Hecch préshtagéay bárawá ham nagwashtagi:
“Man áiay Peta bán o
á mani Chokka bit.”
6 O padá wahdé Hodá wati awali Chokká é donyáyá déma dant, gwashit:
“Mane Hodáay sajjahén préshtag áiá parastesh bekanant.”
7 Préshtagáni bárawá Hodá gwashit:
“Wati préshtagán gwát jórha kanán,
bezán wati hezmatkárán ásay bránz‡.”
8 Bale Hodá gón Chokká gwashit:
“Oo Hodá! Tai bádsháhiay taht abad tán abada mánit o
tai bádsháhiay asá, adl o ensápay asá ent.
9 Taw páki o rásti dóst dáshtag o
cha badiá naprat kortag,
paméshká mane Hodáyá, bezán tai Hodáyá
tará cha tai hamráhán géshter, shádehay rógen per moshtag§.”
10 Hodá gón Chokká chosh ham gwashit:
“Oo Hodáwand! Taw bongéjá zeminay bonhesht* ér kort,
ásmán ham tai dastáni jórh kortagén ent.
11 É gár o bégwáha bant bale taw abadmán ay.
É sajjahén chó pósháká kwahna bant.
12 Taw eshán chó kabáhéᆠpéchay.
É chó pósháká badal kanaga bant,
bale taw dáemá hastay o
tai máh o sál halása nabant.”
13 Hodáyá hechbar gón wati hecch préshtagá nagwashtag:
“Mani rástén kashá tán hamá wahdá benend
ke man tai dozhmenán tai pádáni chérá dawra dayán‡.”
14 Béshakk sajjahén préshtag hezmatkárén arwáh ant o pa hamáyáni hezmatá ráh dayag butagant ke áyán nejátay mirása rasit.
* 1:2 Goddhi, bezán áheri. † 1:3 Tab o saresht, bezán zát, báten, jawhar. ‡ 1:7 Bránz, bezán ásay shamálah, shólah. § 1:9 Rógen per moshag, bezán pa káréá gechén kanag o wák o twán dayag. Esráiliáni kerrá rógen per moshag bádsháh o mazanén dini péshwáyáni gechén kanagay rasmé butag. * 1:10 Bonhesht, bezán lógay awali hesht yá seng. † 1:12 Kabáh, bezán jobbah ke pashkay sarborá gwará kananti. ‡ 1:13 Asligén Yunáni nebeshtánka gwashit: “tai pádáni chéray tahtoké bekanán”.
☰