8
Nókén ahd o paymánay péshwá
1 Nun may é habaráni masterén maksad esh ent ke márá anchén mazanén péshwáé hast ke ásmáná borzén arshay Hodáay tahtay rástén kashá neshtag o
2 pákén jágahá hezmata kant, bezán hamá asligén tambuá hezmata kant ke Hodáwandá mekk kortag, ensáná mekk nakortag.
3 Har mazanén dini péshwá pa thékiay árag o korbánigay nadr kanagá gechén kanaga bit, paméshká allami ent ke Issáyá ham pa nadr kanagá chizzé bebit.
4 Agan á zeminay sará butén, hecch paymá dini péshwáé nabutagat, chéá ke dega dini péshwá hast ke Sharyatay hesábá thékia kárant.
5 Á, anchén parasteshgáhéá hezmata kanant ke ásmáni parasteshgáhay nákámelén shekl o dróshomá ent, paméshká tambuay addh kanagay wahdá Hodáyá Mussá habardár kort o gwasht: “Bechár, é sajjahén chizzán hamá paymá addh kan ke man tará kóhay sará pésh dásht.”
6 Bale nun é hezmatá ke Issá kant, eshiay darjah cha áyáni hezmatay darjahá báz borzter ent, hamá paymá ke é ahd o paymán ke Issá eshiay myánjigeriá kant, cha pésari ahd o paymáná báláter ent o é paymánay bonhesht mohrterén wádaháni sará ér ent.
7 Chéá ke agan awali ahd o paymán béayb butén, dega ahd o paymánéay zalurat nabutagat.
8 Bale Hodáyá kawmay ayb distant o gwashti:
“Mane Hodáwanda gwashán ke hamá róch pédák ant
ke man gón Esráilay lóg o Yahudáay lógá nókén ahd o paymáné bandán.
9 Bale á paymén ahd o paymáné nabandán ke man gón áyáni pet o pirokán hamá róchá bast
ke áyáni daston gept tánke cha Mesrá daresh bekanán.
Á mani ahd o paymánay sará naóshtátant,
gorhá man wati dém cha áyán tarrént.
10 Mane Hodáwanda gwashán, esh ent hamá ahd o paymán
ke áyókén róchán gón Esráilay kawmá bandáni:
man wati ráh o rahbandán áyáni pegr o hayáláni tahá naksha kanán o
áyáni delá nebeshtahesha kanán.
Man áyáni Hodá bán o á mani mahluk.
11 Cha ed o rand kass wati hamsáhegá tálima nadant o
kass wati brátá nagwashit: ‘Hodáwandá pajjáh byár,’
chéá ke á sajjahén, kasán o mazan, maná zánant
12 ke man áyáni radkárián pahella kanán o
cha ed o rand, hechbar áyáni gonáhán yáta nakanán.”
13 Hodá “nókén ahd o paymánéay” habará kant o gón é habará awali ahd o paymáná kwahn o nákára kant o harché ke nákára bit o kwahna tarrit, zutt gár o bégwáha bit.