☰ Yuhanná 2
2
Issáay awali mójezah
1 Sayomi róchá, Jalilá, Káná námén métagéá, sur o árósé hastat o Issáay mát hamódá at. 2 Issá o áiay moridesh ham lóthetagatant. 3 Wahdé sharáb* halletant, Issáay mátá gón áiá gwasht: “Eshán dega sharáb nést.” 4 Gwashti: “Oo bánok! Maná o tará gón eshiá che kár? Mani wahd angat nayátkag.” 5 Mátá gón kárendahán† gwasht: “Harché ke shomárá gwashit, hamá kárá bekanét.”
6 Ódá shash sengén kunzag‡ ér at ke har yakkéá hashtád tán sad o bist litar§ ápa dásht o Yahudiáni shosht o shódi rasmán kármarza butant. 7 Issáyá gón kárendahán gwasht: “Kunzagán cha ápá porr kanét.” Gorhá kunzagesh cha ápá porr kortant. 8 Issáyá gwasht: “Nun kammoké bekasshét o pa diwánay kamáshá bebarét.” Áyán anchosh kort. 9 É áp ke sharáb butagatant, diwánay kamáshá chashtant. Nazánti ke cha kojá árag butagant, bale hamá kárendahán ke áp kasshetagatant, áyána zánt. Nun diwánay kamáshá, sálónk tawár jat o 10 gwashti: “Harkas mehmánán sharterén sharábá pésará dant. Wahdé á mast o malára bant, randá adná* o arzánteréná kárit. Bale taw sharterén sharáb nóki áwortag.”
11 É mójezah o ajabbatén nesháni ke Issáyá Jalilay métag Kánáyá pésh dásht, áiay awali mójezah at. Áiá gón hamé mójezahá wati shán o shawkat záher kort o moridán áiay sará imán áwort. 12 Randá Issá gón wati mát o brát o moridán Kaparnáhumay shahrá shot. Lahtén róchá hamódá dáshtesh.
Issá cha parasteshgáhá sawdagerána gallénit
(Mattá 21:12–13; Markás 11:15–17; Luká 19:45–46)
13 Yahudiáni Pesah, bezán Sargwazay Aid,† nazzikk at. Paméshká, Issá Urshalimá shot. 14 Disti ke mazanén parasteshgáhá mardom gók o pas o kapótay bahá kanagá goláésh ant o sarráp‡ ham neshtagant. 15 Gorhá cha sádá hayzaráné jórhi kort o sajjahén sawdáger o pas o góki cha parasteshgáhá galléntant§ o sarrápáni zarr o sekkahi ham rétkant o thébali* chappi kortant. 16 Gón kapót bahá kanókán gwashti: “É chizzán cha edá dar kanét. Mani ásmáni Petay lógá bázáré makanét.” 17 Nun morid yátá kaptant ke Hodáay Pákén Ketábá nebeshtah ent: Á jósh o gayrat ke maná pa Hodáay lógá hastent, maná sóchit o pora kant.†
18 Gorhá Yahudián gwasht: “Taw gón chónén mójezah o ajabbatén neshánié sábeta kanay ke tará é káráni ejázat hastent?” 19 Issáyá gwasht: “É mazanén parasteshgáhá bepróshét, man say róchá padá chestia kanán.” 20 Yahudián gwasht: “É mazanén parasteshgáh, chell o shash sálá jórh kanag butag, taw chón eshiá say róchá chesta kanay?” 21 Bale á parasteshgáh ke Issá áiay bárawá habar kanagá at, áiay jenday badan at. 22 Issáay merag o jáh janagᇠrand, morid yátá kaptant ke áiá wat é habar kortagat. Nun áyán Hodáay Pákén Ketáb o Issáay habaráni sará imán áwort.
23 Á róchán, Issá Sargwazay Aidá Urshalimá at. Bázén mardoméá ke Issáay ajabbatén nesháni distant, áiay námay sará imánesh áwort. 24 Bale Issáyá áyáni imánay sará báwar nakort, chéá ke áiá sajjahénáni del o daruna§ zánt. 25 Áiá ensánay bárawá hechkasay gwáhiay zalurat naat, chéá ke á, ensánay delay har hálá sahig at.
* 2:3 Pákén Ketábay tahá har jágah ke sharábay labz átkag, eshiay máná cha angurá jórh butagén sharáb ent ke Engréziá “wine” gwashaga bit. † 2:5 Kárendah, bezán kárdár, nawkar. ‡ 2:6 É kunzag kombpaymén mazanén kunzag atant. § 2:6 Asligén Yunáni nebeshtánka gwashit: “do tán say metretes”. * 2:10 Adná, bezán arzán, kamkimat, kamarzesh. † 2:13 É aidá Sargwazay Aid paméshká gwashant ke cha Mesriáni chérdastiá Esráiliáni ázátiay wahdá markay préshtag cha Esráili mardénchokkáni koshagá sar gwast. ‡ 2:14 Sarráp, bezán hamá mardom ke zarr bahá zurit o zarr bahá kant. § 2:15 Gallénag, bezán táchénag, dar kanag, dur ráh dayag. * 2:15 Thébal, bezán méz, mazanén chárpádag. † 2:17 Zabur 69:9. ‡ 2:22 Jáh janag, bezán cha wati jáhá yakdam pád áyag, zendag bayag, chest bayag. § 2:24 Darun, bezán báten, andarun.
☰