☰ Markás 1
Pákén Enjil cha
Markásay
kalamá
Markásay Enjilay pajjár
É ketábay nebisók, Markás, Issá Masihay morid Shamun-Petrosay sangat at o cha bongéji kelisáay báwarmandán yakké at. Kásedáni Káray ketábá, lahtén jágahá Markásay nám átkag ke Petros o Pulosay sangat ent. Báwar esh ent, hamá wahdá ke Markás gón Petros o Pulosá Rumay shahrá nendók butag, áiá pa Rumay shahray jahmenendén* darkawmán é ketáb nebeshtag. Lahtén zántkára gwashit ke Markásá, Issáay bárawá bázén yáddáshté cha Petrosá zortag.
Chárén Enjiláni tahá, Markásay ketáb cha á degarán gwandhter ent. É ketábá, Issá Masihay Hodáwandi, cha áiay mójezah o hayrán kanókén kárán pésh dáraga butag.
Markásay Enjilá, Issáay áyag o Jalilay damagᆠáiay tálim o kár nebisag butagant. Dém pa Urshalimá rawagay wahdá áiay dátagén sar o sój, Urshalimá áiay goddhi‡ rócháni sargwast o merag o zendag bayagay kessah ham átkagant.
1
Pákshódi dayókén Yahyáay kolaw
(Mattá 3:1–12; Luká 3:1–18; Yuhanná 1:19–28)
1 Issá Masih, Hodáay Chokkay wasshén mestágay§ bongéj*.
2 Anchosh ke Eshayá Nabiay Ketábá nebeshtah ent:
Bechár, man wati kásedá cha taw pésar ráha dayán
ke tai ráhá tachk o hamwára kant.
3 Gyábáná kasé gwánka jant:†
“Hodáwanday ráhá tayár bekanét,
Hodáwanday keshkán rást o tachk bekanét.”‡
4 Pákshódi§ dayókén Yahyá gyábáná átk o gwánki jat: “Tawbah bekanét o pákshódi bekanét ke shomay gonáh bakshag bebant.” 5 Cha Yahudiahay damagay sajjahén métag o kallagán o cha Urshalimay shahrá mardom áiay kerrá átkant, wati gonáháni pashómániesh záhera kort o Yahyáyá Ordonay kawrá á pákshódia dátant. 6 Yahyáyá cha oshteray mudán gwaptagén póshák gwará at o póstén kamarbandé lánká bastagati. Áiá, madag o gyábáni bénaga* wárt. 7 Yahyáyá jára jat o gwasht: “Cha man o rand, mardé kayt ke cha man zórmandter ent o man é káray láhek ham naán ke sréná dotal bekanán o áiay kawshbandán† bebóján. 8 Man shomárá gón ápá pákshódia dayán, bale á shomárá gón Hodáay Pákén Ruhᇠpákshódia dant.”
Issáay pákshódi o chakkás
(Mattá 3:13—4:11; Luká 3:21–22; 4:1–13)
9 Á róchán, Issá cha Jalilay damagay shahr Náserahá átk o Ordonay kawrá Yahyáyá á pákshódi dát. 10 Anchosh ke Issá cha ápá dar áyagá at, disti ke ásmánay dap pach but o Pákén Ruh kapótéay dróshom᧠ér átk o mani sará nesht. 11 Cha ásmáná é tawár átk: “Taw mani dóstigén Bacch ay o man cha taw sakk wassh o razá án.”
12 Hamá wahdá Pákén Ruhá Issá gyábáná rawán dát. 13 Issá, tán chell róchá gyábáná mant o Shaytáná á chakkáset*. Issá ódá jangali jánwaráni nyámᆠat o préshtagán áiay hayáldária kort.
Chár máhigiray lótháénag
(Mattá 4:12–22; Luká 4:14–15; 5:1–11)
14 Yahyáay dazgir bayagá rand, Issá Jalilá shot o Hodáay wasshén mestágay jári jat o 15 gwashti: “Wahd átkag o rasetag. Hodáay bádsháhi átkag o sar butag. Cha wati gonáhán pashomán bebét o tawbah bekanét o Hodáay wasshén mestágay sará imán byárét.”
16 Issá, Jalilay Mazangwarmay‡ lamb᧠rawagá at ke do máhigiri dist, Shamun o áiay brát Andriás ke pa máhigiriá wati dám o máhórán gwarmá dawr dayagá atant. 17 Issáyá gón áyán gwasht: “Byáét, mani randgiriá bekanét. Man shomárá anchosha kanán ke máhig geragay badalá, mardománi delán shekára kanét.”* 18 Áyán hamá damáná wati dám yalah dátant o áiay hamráh butant. 19 Issá ke kammé démá shot Zebdiay chokk Ákub o áiay brát Yuhannái distant ke bójigᆠneshtagatant o wati máhórán sráchag‡ o sharr kanagá atant. 20 Anchosh ke Issáyá á distant, gwánki jatant. Áyán wati pet Zebdi gón kárendahán§ bójigá yalah dát o Issáay hamráh butant.
Ganókéay jennay kasshag
(Luká 4:31–37)
21 Issá o áiay morid Kaparnáhumay shahrá shotant. Shabbatay róchá* Issá kanisahᆠshot o mardomi tálim dátant. 22 Mardom cha áiay dars o tálimán hayrán o habakkah atant, chéá ke áiá Sharyatay zánógeráni‡ paymá tálim nadát, gón wák§ o ehtiáré* tálimi dát. 23 Hamé wahdá, kanisahay tahá mardéá kukkár kort. É mardá jenné per at. Gwashti: 24 “Oo Issá Náseri! Tará gón má che kár ent? Átkagay ke márá gár o bégwáh bekanay? Mana zánán taw kay ay, taw Hodáay gechén kortagén hamá Pákén ay.” 25 Issáyá jenn hakkal dát o gwasht: “Chopp kan o é mardá yalah day.” 26 Jenná á mard sakk zhámbalént† o kukkár kanáná cha áiá dar átk. 27 Sajjahén mardomán pa hayráni watmánwatá gwasht: “É chónén habaré? Nókén tálimé. É mard pa wák o ehtiáré jennán ham hokma dant o jenn eshiay habará gerant.” 28 Dér nagwast ke Jalilay sajjahén kerr o gwarán, Issáyá nám dar áwort.
Nádráháni drahbakshi
(Mattá 8:14–17; Luká 4:38–41)
29 Issá, wahdé cha kanisahá dar kapt, Ákub o Yuhannáay hamráhiá Shamun o Andriásay lógá shot. 30 Ódá, Shamunay wassig tapig at o nepáday sará waptagat. Anchosh ke Issá áyáni lógá potert, nádráhay hálesh dát. 31 Issá nazzikká shot, áiay dasti gept o pádi kort. Tapá yalah dát. Á pád átk o áyáni hezmat kanagá lagget.
32 Magrebtahárá mardomán wati sajjahén nádráh o jenni ganók Issáay kerrá áwortant. 33 Shahray sajjahén mardom, lógay dapá mocch butant. 34 Issáyá bázéné ke dhawl dhawlén nádráhián geptagatant, dráh kort o bázén jenné kassheti, bale áiá jenn pa habará naeshtant, chéá ke jennána zánt ke á kay ent.
Enjilay wasshén mestágay jár
(Luká 4:42–44)
35 Sabáhá máhallah ke angat tahár at, Issá pád átk, cha lógá dar kapt, gestᇠo panáhén jágahéá shot o dwái kort. 36 Shamun o áiay sangat Issáay shóházá dar kaptant. 37 Wahdé Issáesh dist, gón áiá gwashtesh: “Sajjahén mardom tará shóház kanagá ant.” 38 Issáyá gwasht: “Byáét dega jágahéá rawén, kerr o gwaray métag o bázárán tánke man ódá ham wasshén mestágay járá bejanán, chéá ke man pa hamé kárá átkagán.” 39 Gorhá, sajjahén Jalilá tarr o tábi kort, kanisaháni tahá wasshén mestágay jári jat o jenniáni jenni ham kasshetant.
Garray nádráhéay drahbakshi
(Mattá 8:1–4; Luká 5:12–16)
40 Yakk mardéá garr§ at. Issáay kerrá átk, kóndhán kapt, dazbandi kort o gwashti: “Agan taw belóthay, maná dráh o palgár* korta kanay.” 41 Issáyá áiay sará bazzag but, dasti shahárt o á marday badani dast per mosht o gwashti: “Mana lóthán. Dráh o palgár bay!” 42 Hamá damáná á mard cha garrá dráh but. 43 Roksat kanagay wahdá, Issáyá kaddhan† kort o gwasht: 44 “Bechár, hechkasá cha é habar o hálá sahig makan, bale beraw, watá dini péshwáyá pésh bedár o pa wati páki o palgáriá hamá korbánigá hayrát kan ke Mussáay Sharyatá nebisag butag, tánke pa áyán sháhedié bebit.” 45 Bale á mard ke cha ódá dar átk, habará lagget o wati kessahi sheng o tálána kort. É sawabá, nun Issáyá natwánt hecch shahrá watá záher bekant, dhanná dur o gestáén jágahána dáshti, bale angat mardom cha har némagá áiay kerrá átkant.
* : Jahmenend, bezán jágahéay neshtagén mardom, sáken, ábád. † : Damag, bezán hand, elákah, ostán, subah. ‡ : Goddhi, bezán áheri. § 1:1 Mestág, bezán wasshén hál, bashárat. * 1:1 Bongéj, bezán bendát, shoru. † 1:3 Gwánk janag, bezán tawár kanag, lótháénag. ‡ 1:3 Band 2–3, bechár Maláki Nabiay Ketáb 3:1; Eshayá Nabiay Ketáb 40:3. § 1:4 Pákshódiay labz, Yunáni zobáná “baptismah” gwashaga bit o eshiay máná “ápá bokk dayag” yá “gón ápá shódag” ent. * 1:6 Bénag, bezán shahd, asal. † 1:7 Kawshband, bezán swásband, swásay band. ‡ 1:8 Hodáay Pákén Ruh, bezán Ruholkodos. § 1:10 Dróshom, bezán shekl, surat. * 1:13 Chakkásag, bezán ázmáesh kanag, emtehán gerag. † 1:13 Nyámá, bezán myáná, darnyámá, tahá, tóká. ‡ 1:16 Mazangwarm, bezán daryáchah. § 1:16 Lamb, bezán dámon, kerr. * 1:17 Delay shekár kanagay maksad mardomán Hodáay ráhá árag ent. † 1:19 Bójig, bezán lánch, kashti. ‡ 1:19 Sráchag, bezán dertagén chizzéay dóchag o addh kanag. § 1:20 Kárendah, bezán kárdár, nawkar. * 1:21 Shabbatay róch, hamá Shambeh ent, bezán Yahudiáni kár nakanagay róch. † 1:21 Kanisah, bezán Yahudiáni parasteshgáh. ‡ 1:22 Sharyatay zánóger, bezán dini álem o Mussáay Sharyatay zántkár. § 1:22 Wák, bezán zór, tákat. * 1:22 Ehtiár, bezán masteri, kodrat, zór. † 1:26 Zhámbalénag, bezán chizzéay gerag o pa trondi sorénag o larzénag. ‡ 1:35 Gestá, bezán yakk kerr, dur. § 1:40 Asligén Yunáni zobánay labz pa sohrbádá, bezán jozámá, o pa garr o bag o dega tahr tahrén pósti nádráhián kár bandag butag. * 1:40 Palgár, bezán sáp o sallah, bepóleng. † 1:43 Kaddhan, bezán mohrén tákid, hokm.
☰