116
Maná Hodáwand dóst ent
1 Maná Hodáwand dóst ent ke
mani tawári gósh dáshtag,
mani peryát o záriay tawár o
2 wati delgóshi mani némagá tarrént.
Tán zendag án, gwánkia janán.
3 Markay sádán patátagatán,
kabray tors mani sará kaptagat
gam o andóháni bandig atán.
4 Hodáwanday námon gept o gwashton:
“Oo Hodáwand! Mani zendá berakkén.”
5 Hodáwand mehrabán o ádel ent,
may Hodá, cha mehr o rahmá sarréch.
6 Hodáwand sádahdelén mardomána sambálit,
man ke wár o zár atán, maná rakkénti.
7 Padá árám bay, oo mani arwáh,
ke Hodáwand pa taw mehrabán butag.
8 Oo Hodáwand! Taw mani arwáh cha marká rakként,
mani chamm cha arsán o
pád cha lakoshagá
9 ke Hodáwanday bárgáhá gám bejanán
zendagénáni zeminá.
10 Maná báwar at, hamá wahdá ham ke gwashton:
“Sakk bazzag án.”
11 Paréshániáni tahá gwashton:
“Harkas drógband ent.”
12 É sajjahén sharri ke Hodáwandá gón man kortagant,
esháni badalá chón bedayán?
13 Nejátay pyálahá chesta kanán o
Hodáwanday námá tawára kanán.
14 Gón Hodáwandá wati kawlán puraha kanán,
áiay sajjahén kawmay démá.
15 Hodáay wapádáráni mark,
Hodáwanday démá gránkadr ent.
16 Oo Hodáwand! Man tai hezmatkár án,
haw, man tai hezmatkár án, tai móleday chokk,
taw maná cha zamzilán ázát kortag.
17 Shogrgozáriay korbánigé tará pésha kanán o
Hodáwanday námá gerán.
18 Gón Hodáwandá wati kawlán puraha kanán,
áiay sajjahén kawmay démá,
19 Hodáwanday lógay péshgáhá,
tai nyámá, oo Urshalim!
Hodáwandá benázénét, Halléluyá.