140
Maná cha badkárán berakkén
Pa sázger o washalhánáni sálárá. Dáuday Zabur.
 
Hodáwand! Maná cha badkárán pahréz o
cha hezhmnákán berakkén,
cha hamáyán ke wati delá badén pandala sázant o
har róch jangé páda kanant.
Wati zobáná chó márá téza kanant o
garrmáray zahresh lontháni chérá ent. Ósht...
 
Hodáwand! Maná cha badkáráni dastá dur bedár o
cha hezhmnákán berakkén
ke pa mani pádán dám sázagá ant.
Gorunákán pa man dám chér gétkag,
dámi chammag.
Mani ráhá talkesh chér kortag. Ósht...
 
Gón Hodáwandá gwashán: “Taw mani Hodá ay.”
Mani peryát o záriá gósh dár, oo Hodáwand!
Oo Hodáwand, mani mohkamén Hodáwand o rakkénók!
Jangay róchá taw mani saray negahpáni kort.
Hodáwand! Badkáráni armánán purah makan,
wahdé orosha kanant
áyáni pandalán sóbén bayagá mayl. Ósht...
 
Áyán ke maná angerr kortag,
áyáni lontháni badi, áyáni jenday sará bekápát.
10 Rókén eshkaresh sará berechát,
ásá dawr dayag bátant o
pujgelén kaddhán boddhátant o
hechbar dar átk makanátant.
11 Pléndh may sardhagárá ábád mabátant,
hezhmnákáni sará baláhé kapát.
 
12 Mana zánán ke Hodáwand pa bazzagán dadrasi o
pa hájatmandán adl o ensápa kant.
13 Pahrézkár zalur tai námay shográ gerant o
nékdel tai bárgáhá jahmenenda bant.