143
Man pa taw tonnig án
Dáuday Zabur.
1 Oo Hodáwand! Mani dwáyá gósh dár
mani peryát o záriá beshkon,
pa wati wapádári o adlaygi
maná passaw beday.
2 Wati hezmatkárá mayárig makan
ke tai bárgáhá kass bémayár naent.
3 Dozhmen mani randá kaptag,
áiá maná zeminá dawr dátag,
maná taháriá jahmenendi kortag
kwahnén mordagáni paymá.
4 Arwáh mani daruná nezór ent o
delon mán bátená hayrán.
5 Kwahnén zamánagán yáta kanán
tai sajjahén káráni sará pegra kanán,
tai dastáni kortagén káráni hayálá kapán.
6 Wati dastán tai némagá shahárán,
man pa taw tonnig án,
chó hoshkén dhagáréá. Ósht...
7 Hodáwand! Maná zutt passaw day,
mani ruhá dam bortag,
wati démá cha man chér maday,
ke hamáyáni paymá bán ke kall o kabrá kapant.
8 Bámgwáhán tai mehray habará beshkonátán,
ke man tai sará tawkal kortag,
sój day ke kojám ráhá berawán,
ke man wati zend tai dastá dátag.
9 Oo Hodáwand! Maná cha dozhmenán berakkén,
man tai kerrá chéra bán.
10 Maná tálim beday ke tai razáay sará kár bekanán,
chéá ke taw mani Hodá ay,
tai nékén Ruh tachkén ráhá mani rahshón bát.
11 Oo Hodáwand! Pa wati námaygi maná zendag bedár,
pa wati adlaygi, maná cha sakki o sórián dar kan.
12 Wati mehray tahá mani dozhmenán tabáh kan,
mani badwáhán gár o bégwáh kan,
ke man tai hezmatkár án.