148
Hodáwanday shán cha zemin o ásmáná borzter ent
 
Hodáwandá benázénét, Halléluyá.
Cha ásmánán Hodáwandá benázénét,
borzén jágahán áiá satá kanét.
Oo áiay sajjahén préshtagán! Áiá satá kanét.
Oo áiay sajjahén ásmáni lashkarán! Áiá satá kanét.
Oo máh! Oo róch! Áiá satá kanét.
Oo sajjahén drapshnákén estárán! Áiá satá kanét.
Oo borzén arsh! Áiá satá kan.
Oo ásmánay sarboray ápán! Áiá satá kanét.
 
É sajjahén, Hodáwanday námá satá bekanátant,
chéá ke cha hamáiay hokmá jórh butagant.
Hamáiá é sajjahén, abad tán abad barjáh dáshtagant o
anchén hokmé dáti ke hechbar dawr dayag o nákár kanaga nabit.
 
Hodáwandá cha zeminá satá kanét,
shomá oo sajjahén daryái sahdárán o zeray sajjahén johlánkián,
oo gerók o tróngal, barp o jambarán,
oo tupánén gwátán ke hamáiay hokmá barjáha dárét,
oo kóh o sajjahén jompán,
oo nibagi drachk o sajjahén gazzán,
10 oo rastar o sajjahén dalwatán,
oo kasánén jánwar o báli morgán,
11 oo zeminay bádsháh o sajjahén kawmán,
oo zeminay shahzádag o sajjahén hákemán,
12 oo warnáén mardén o janénán,
oo pirénán, gón chokkán yakjáh!
 
13 É sajjahén, Hodáwanday námá satá bekanátant,
chéá ke tahná hamáiay nám mazanshán ent,
hamáiay shán o shawkat cha zemin o ásmáná borzádter ent.
14 Áiá kánthé* pa wati kawmá borz kortag,
áiay sajjahén wapádárén hezmatkáráni satá,
Esráilay satá, kawmé ke gón áiay delá nazzikk ent.
Hodáwandá benázénét, Halléluyá.
* 148:14 Kánthay máná edá zór o kodrat ent.