Pa Timutáusá
Pulosay awali kágad
Pa Timutáusá Pulosay awali kágaday pajjár
1
Salám o drót
Cha Pulosay némagá, mane Pulos ke cha may rakkénókén Hodá o may omét Issá Masihay hokmá, Issá Masihay kásedé án,
pa Timutáusá, ke imánay hesábá mani hakkigén chokk ent.
Cha Hodáén Pet o may Hodáwandén Issá Masihay némagá tará rahmat o rahm o émeni sar bát.
Drógén ostád
Hamá wahdá ke Makduniahá rawagá atán, man gón taw dazbandi kort o annun ham gwashán ke Epésosay shahrá bedár o lahtén mardom ke drógén tálim dayagá ent, áyán hokm beday ke wati é kárá band bekanant o watgarhén kessah* o halás nabayókén sar o bonáni némagá ham delgósh makanant. É chizz Hodáay káray démá baragay badalá arh o korh addha kanant, chéá ke Hodáay kár cha imánay ráhá démá rawt. É hokmay maksad mehr ent ke cha sapáén del o pákén zamir o delsetkén imánéá pédá bit. Lahtén ostádá é chizz yalah kortagant o gomráh butagant o bémánáén gappáni tahá mán gisshetagant. É mardom Sharyatay zánóger bayaga lóthant bale nazánant ke ché gwashagá ant o hamá chizzáni bárawá ke pa deljami habara kanant, á chizzáni jendá ham sarpada naant.
Má zánén ke Sharyat sharr ent, bale agan yakké pa sharri kári bebandit. Má é ham zánén ke Sharyat pa pahrézkárán jórh kanag nabutag, pa Sharyatay próshókán, pa sarkasshán, pa hodánáparmán o gonahkárán, pa nápák o bédinán, pa hamáyán ke wati pet o mátána koshant, pa hónigán, 10 pa syahkárán§, pa lawátkárán*, pa golámáni tájerán, pa drógband o drógén sawgend warókán o pa é dega hamá mardomán jórh kanag butag ke rástén tálimay heláp ant, 11 hamá tálim ke áiay sarchammag mazanshánén Hodáay porshawkatén wasshén mestág ent ke mani dastá dayag butag.
Pa Pulosá Hodáay rahmat
12 May Hodáwandén Issá Masih ke maná zór o wáki dátag, man áiay shográ gerán ke áiá maná wapádár zánt o pa wati hezmatkáriá dásht. 13 Har chont ke pésará kopr kanók, ázár dayók o sheddatién mardomé atán, bale Hodáwandá mani sará rahm kort, chéá ke man cha wati nábáwariá zánagá naatán ke ché kanagá án. 14 Haw, may Hodáwanday rahmatán mani sará békesás§ gwart. Maná cha hamá imán o mehrá sarréchi kort ke cha Issá Masihay némagá rasant.
15 É gapp rást ent o sarjamiá mannaga karzit ke Issá Masih pa gonahkáráni rakkénagá donyáyá átk o esháni tahá ganterén man án. 16 Bale mani sará paméshká rahm kanag but ke Issá Masihá lóthet gón man wati békesásén sabr o ópárá záher bekant, man ke cha sajjahénán ganter án, o é paymá man pa hamá mardomán mesálé bebán ke áiay sará imána kárant o abadmánén zendéay wáhonda* bant. 17 Abadmánén bádsháh, bezán hamá yakkén Hodá ke namirán ent o cha chammán chér o andém ent, áiay ezzat o shawkat abad tán abad barjáh bát. Anchosh bát. Ámin.
18 Timutáus, mani chokk! Man tará é hokmá, hamá péshgóiáni bonyádá dayán ke yakk randé tai bárawá kanag butagant tánke taw áyáni tránagá bekapay o é nékén johdá kort bekanay o 19 wati imán o pákén zamirá barjáh dásht bekanay. Lahtén mardomá wati zamiray tawár gósh nadáshtag o wati imánesh zawál kortag. 20 Cha eshán yakké Himenáus ent o yakké Sekandar ke man cha kelisáyá kasshetag o yakkerr kortagant ke ebrat begerant o kopr makanant.
* 1:4 Watgarhén kessah, bezán hamá kessah ke ensáná jórh kortagant. 1:4 Sar o bon, bezán pet o pirok o bonpirok o poshtáni nám gerag. 1:7 Sharyatay zánóger, bezán dini álem o Mussáay Sharyatay zántkár. § 1:10 Syahkár, bezán hamá mardom ke náráhén wapt o wába kant, hamá ke zená kant. * 1:10 Lawátkár, bezán hamá mardén ke gón mardénán wapt o wába kant. 1:11 Mestág, bezán wasshén hál, bashárat. 1:13 Sheddati, bezán jang o jérhah kanók, arh o korh kanók. § 1:14 Békesás, bezán béhesáb, sakk báz. * 1:16 Wáhond, bezán málek, hodábond. 1:18 Tránag, bezán yát, hayál, tahtál. 1:20 Asligén Yunáni nebeshtánka gwashit: man Shaytánay dastá dátagant.