30
Mótkay badal nách o sohbat
Dáuday Zabur. Pa mazanén parasteshgáhay wapká sawté.
1 Oo Hodáwand! Tará shán o shawkata dayán,
chiá ke taw maná cha johlánkián chest kort o
naeshtet dozhmen mani sará shádehi bekanant.
2 Oo Hodáwand, mani Hodá! Tai gwará pa komaká peryáton kort o
taw maná cha nájórhiá dráh kort,
3 mani arwáh cha mordagáni jaháná dar áwort o
cha áyáni nyámá ke kall o kabr butant zendag kort.
4 Oo Hodáwanday dóstdárán! Pa Hodáwandá názénk bejanét,
áiay pák o palgárén námay shográ begerét.
5 Chiá ke hezhmi damáné o
mehr o rahmati omray drájiá.
Bit ke sajjahén shapé pa gréwag begwazit,
bale bámgwáhá shádehi wati chehragá záhera kant.
6 Man wati ásudagiay wahdá gwasht:
“Hechbar larzénaga nabán.”
7 Oo Hodáwand! Taw maná cha wati mehr o rahmatá
mohrén kóhéay paymá óshtáréntagat,
bale wahdé wati démet cha man tarrént,
torseton.
8 Oo Hodáwand! Tará tawáron jat,
tai gwará zári o peryáton borz kort:
9 “Mani marká che sutté mán o
kabray tahá mani ér rawagá chónén páedagé?
Záná, hák tará satá dant?
Jára jant ke taw wapádár ay?
10 Oo Hodáwand! Beshkon o mani sará mehrabán bay.
Hodáwandá! Mani madat kanók bay.”
11 Taw mani mótk nách o sohbaté kort,
sugi god o póshák dar kort o
maná gón shádmániá póshént,
12 tánke mani arwáh tará satá bedant o bétawár mabit.
Oo Hodáwand, mani Hodá! Tán abad tai shográ gerán.