60
Dozhmenáni démá márá madat kan
Pa sázger o washáwázáni sálárá. “Susanay” tarzay sará. Gwáhié. Pa tálimá Dáuday shayr, hamá wahdá ke Dáudá gón Naharaymay Árámián o Sóbahay Árámián jang kort o hamá wahdá ke Yuáb per tarret o Wáday dashtá cha Edumián dwázdah hazár mardomi kosht.
1 Oo Hodá! Taw márá yalah kortag o may sangar próshtagant,
hezhmnák butagay, bale nun gón má wasshán bay.
2 Zeminet jombéntag o tal dátag,
taláni beger ke larzagá ent.
3 Wati kawmet gránén jáwarán perréntag,
márá madhósh kanókén sharábet wáréntag.
4 Bale angat bayraket pa Hodátorsán borzád kortag
tánke yakjáh bebant o cha dozhmenay kamáná berakkant. Ósht...
5 Gón wati rástén dastá berakkén o passaw beday
tán hamá ke tará dóst ant berakkant.
6 Hodáyá cha wati pákiá habar kort:
“Shekémá gón shádehi bahra kanán o
Sukkótay daragá kesása kanán.
7 Galyád manig ent o Manassi mani,
Epráim mani jangi koláh ent,
Yahudá bádsháhiay asá o
8 Muáb mani dasshódi trasht,
Edumay sará wati swásá chagala dayán o
Pilistiahay sará wati péróziay gwánká janán.”
9 Kay maná choshén shahréá kárit ke sangarband ent?
Kay maná dém pa Edumá rahshóna bit?
10 Oo Hodá! Taw márá yalah dátag.
Oo Hodá! Padá may lashkaráni hamráha nabay.
11 Dozhmenáni démá márá madat kan,
chiá ke ensánay madat békár o náhudag ent.
12 Gón Hodáyá sóbéna bén,
hamá ent ke may dozhmenán pádmála kant.