69
Oo Hodá! Maná berakkén
Pa sázger o washáwázáni sálárá. “Susanáni” tarzay sará. Dáuday Zabur.
1 Oo Hodá! Maná berakkén
ke áp tán mani gardená ent.
2 Johlánkén pujgelán mén butagán,
jágahé ke páda naóshtit.
Johlánkén ápáni tahá kaptagán o
hár o lahrhán maná angerr kortag.
3 Cha bázén peryátán damon bortag,
mani nokk hoshk ent o
chamm wati Hodáay wadárá tahár butagant.
4 Á ke bésawab cha man naprata kanant
cha mani saray mudán géshter ant.
Bázéné mani gár kanagay randá ent
dozhmen mani sará drógén bohtáma janant.
Cha man lóthant hamá chizzán per betarrénán
ke man nadozzetagant.
5 Oo Hodá! Taw zánay ke man ahmaki kortag,
mani gonáh cha taw chér naant.
6 Oo Hodáwand, oo lashkaráni Hodáwand!
Hamá ke tai wadárig ant mani sawabá sharmendag mabátant.
Oo Esráilay Hodá!
Hamá ke tai shóházá ant mani sawabá roswá mabátant.
7 Chiá ke pa taigi maná sobakka kanant o
mani dém cha sharmá póshénag butag.
8 Brátáni chammá bigánag butagán o
wati mátay chokkáni démá darámadé.
9 Á gayrat ke maná pa Hodáay lógá hastent,
maná jánsócha kant o báhénit o
tai rad o bad kanókáni rad o bad,
mani sará kaptagant.
10 Á wahdá ke arson rétkag o róchagon dáshtag
sobakk kanag butagán.
11 Á wahdá ke sugi god o póshákon gwará kortagant,
esháni kerrá batalé butagán.
12 Shahray masteráni gwará nám o dap án o
sharábiáni sawt.
13 Bale man, oo Hodáwand, tai rahmay wahdá,
tai dargáhá dwá kanán.
Oo Hodá! Cha wati bázén mehr o wapádáriá,
gón deljamén rakkénagé passaw beday.
14 Maná cha pujgelán dar kan,
tánke ér maboddhán.
Cha naprat kanókáni panjagá maná berakkén o
cha johlánkén ápán dar kan.
15 Mayl ke hár maná angerr kanant,
yánke johlánki maná ér barant,
yá mani sará kall wati dapá bebandit.
16 Oo Hodáwand! Mani passawá beday ke tai rahmat báz ant,
wati rahmatáni kesás o hesábá, wati démá gón man betarrén.
17 Démá cha wati hezmatkárá mapóshén,
pa mani madatá eshtáp kan
ke sakk tang átkagán.
18 Nazzik byá o maná berakkén,
dozhmenáni sawabá maná bemók.
19 Taw á sobakkián wata zánay ke mani sará ant o
mani sharmsári o roswáián,
mani sajjahén dozhmen tai démá ant.
20 Sobakki o béezzatián mani del próshtag o dar mantagán,
rahmay wadárá atán o dastá nakapt,
gamwáréay shóházá atán o naraset.
21 Warákay badalá, maná jawresh dát o
wahdé tonnig bután tropshén sharábesh nóshént.
22 Parzónagesh dámé bát o
sohl o émeniesh talké.
23 Chammesh tahár bát o magendátant o
srénesh drahag o larzagá bát.
24 Wati hezhmá áyáni sará begwárén,
gazabay ácheshá pa áyán berasén.
25 Lóg o jágahesh haráb o wayrán bát,
áyáni gedánán hechkas jahmenend mabát.
26 Chiá ke hamáiá ázára rasénant ke taw jatag o
hamáiay ranjáni habará kanant ke taw thappig kortag.
27 Mayár pa mayáresh beladdh,
cha tai adlá bébahr bátant.
28 Cha zendagénáni daptará gár bátant,
gón pahrézkárán yakjáh nebisag mabátant.
29 Bale nun man, setam distag o padard án.
Oo Hodá! Tai neját maná émen bedárát.
30 Hodáay námá gón sawta názénán o
gón bázén shogrgozáriá shán o shawkatia dayán.
31 É chizz Hodáyá cha gwaskéá géshter pasonda bit,
cha mazankánth o mazansrombén gókéá.
32 Békebr o darbésh é chizzá ke begendant gal o shádána bant.
Oo Hodáay shóház kanókán! Zendahdel bátét.
33 Hodáwand nyázmandáni dwáyán gósha dárit o
wati bandigén mardomán bazzag o wára nakant.
34 Ásmán o zemin áiá benázénant,
daryá o áiay tahay sajjahén sahdár.
35 Chiá ke Hodá Sahyuná nejáta dant o
Yahudáay shahrán nóksará addha kant.
Kawm ódá jahmenenda bit o
molkay hakkén wáresa bit.
36 Molk áiay hezmatkáráni poshtpaday mirása bit o
áiay námay dóst dárók ódá jahmenenda bant.