Mo꞉fo꞉s we Fol eyo꞉
Filemon
emo꞉ sa꞉sa꞉liga꞉fo꞉.
Asuluma꞉no꞉ to
Mo꞉fo꞉s we Fol eyo꞉ Keliso kalu nowo꞉ Filemon emo꞉ sa꞉sa꞉liga꞉fo꞉. Filemona꞉ ene madali nanogdo꞉ dian kalu nowo꞉, Onesimus e tamin amio꞉ Filemono꞉ ta꞉ta꞉ga꞉ nai ane. E nai ha꞉na꞉ga꞉, amisa꞉n nowa elena, Fol e o꞉lia꞉ dibolo aya galili. Onesimus e Fol o꞉lia꞉ silikiyo꞉, e Keliso dota꞉ga꞉, Folo꞉ a꞉na asuwa꞉ta꞉len.
Fol e dibolowa silikiyo꞉, mo꞉fo꞉s we Filemonbo꞉ sa꞉sa꞉liga꞉fo꞉. Filemon eyo꞉ Onesimuso꞉ a꞉ma꞉la꞉ dia꞉sa꞉ga꞉, ha꞉fo꞉ disa꞉laki, aole o꞉ngo꞉ doma꞉ki, mo꞉fo꞉s we a꞉na sa꞉sa꞉liga꞉fo꞉.
1
1-2 Fol, ne Ya꞉su Kelisowa꞉ wiya a꞉la꞉ta꞉ga꞉lo꞉ dibolo amilo꞉ so꞉lo꞉ ne o꞉lia꞉ nao Timoti naino꞉ sagalo꞉ towo꞉ gemo꞉ sa꞉sa꞉liga꞉to꞉l.
To we nili mili nafa nanogo꞉ negelelo꞉ dia꞉seno꞉, Filemon, ge o꞉lia꞉ nado Abia o꞉lia꞉ negelelo꞉ nanogo꞉ halaido꞉ dia꞉seno꞉ Akibus o꞉lia꞉ Keliso kaluka꞉isale gi ayamilo꞉ Godeya꞉ mando꞉ da꞉ba꞉ ya꞉lab o꞉lia꞉mo꞉wo꞉, mo꞉fo꞉s we gimo꞉ sa꞉sa꞉liga꞉to꞉l.
Do Gode o꞉lia꞉ nili Alan Ya꞉su Keliso o꞉lia꞉ma꞉yo꞉ ini kanulo꞉ o꞉lia꞉ ha꞉salo꞉ mesa꞉no꞉ man a꞉no꞉lia꞉yo꞉ gi o꞉lia꞉ dofo꞉melea꞉ki, Godemo꞉ dulugu so꞉lo꞉l.
Filemon elo꞉ man nafale dimido꞉wo꞉ we
4-5 Gilo꞉ Ya꞉su Alan amilo꞉ tilidabu a꞉no꞉lia꞉, Godeya꞉ ene malilo꞉ kaluka꞉isalemo꞉lo꞉ ha꞉fo꞉ disa꞉ man a꞉no꞉lia꞉yo꞉, ne da꞉da꞉sen ko꞉lo꞉, niyo꞉ ni Godemo꞉ dulugu sa꞉la꞉likiyo꞉, ge asulufo꞉liki, mada o꞉m a꞉la꞉ sa꞉la꞉sen. Gilo꞉ tilidabu a꞉no꞉ nolbo꞉wo꞉ wida꞉lalikiyo꞉, giyo꞉ Ya꞉su Kelisowa ege dowab amilo꞉ kelego꞉ nafale nimo꞉lo꞉ dimi a꞉no꞉ go꞉no꞉no꞉ asuluma꞉ki, niyo꞉ ge Godemo꞉ dulugu so꞉lo꞉l.
A꞉la꞉do꞉ fa꞉la꞉dowaki, Kelisowa꞉ wiyo꞉ alan doma꞉kiyo꞉, niyo꞉ Godemo꞉ dulugu sio꞉ Ni nao, giyo꞉ Keliso kaluka꞉isale nolo꞉ sagale alifela꞉sen ko꞉lo꞉ gilo꞉ ha꞉fo꞉ disa꞉lan man a꞉ma꞉yo꞉ ne ko꞉lo꞉ halale alitaki, sagale alifa꞉.
Onesimuso꞉ asuwa꞉foma꞉ki, Filemonbo꞉ sio꞉.
A꞉la꞉fo꞉ko꞉lo꞉ Filemon, gilo꞉ dimidama꞉no꞉wo꞉ nowo꞉ da꞉lab ko꞉lo꞉, giyo꞉ dimidama꞉ki, Ya꞉suwa꞉lo꞉ iliga꞉felo꞉ kalu niyo꞉ to halaido꞉wo꞉ gemo꞉wo꞉ o꞉li sa꞉ma꞉no꞉. Ko꞉sega Keliso kaluka꞉isalemo꞉lo꞉ ha꞉fo꞉ disa꞉la꞉sen man gilo꞉wo꞉ ne asulo꞉ ko꞉lo꞉ to halaido꞉wo꞉ gemo꞉wo꞉ mo꞉sa꞉laki, go꞉no꞉n asulo꞉wa꞉ dimidama꞉ki, asulo꞉l. Ne anaso꞉le dowakiyo꞉, Ya꞉su Kelisowa꞉ wiya a꞉la꞉ta꞉ga꞉ dibolowa so꞉l. 10 Ne dibolo aya silikiyo꞉, Onesimus e Keliso dowabiki, ni so꞉wale o꞉ngo꞉ fa꞉la꞉dowo꞉. A꞉la꞉fo꞉ko꞉lo꞉ giyo꞉ Onesimus e o꞉lia꞉yo꞉ ha꞉fo꞉ disa꞉ma꞉kiyo꞉, gemo꞉ dabu bo꞉do꞉l. 11 Tamin amio꞉ Onesimus* eyo꞉ ge mo꞉asuwa꞉ta꞉sen ko꞉sega o꞉go꞉ eyo꞉ na꞉no꞉ o꞉li asuwa꞉fa꞉ib. 12 Ne Onesimus o꞉lia꞉yo꞉ asulo꞉wo꞉ imilig dowaki, e o꞉lia꞉ ha꞉fo꞉ disa꞉lakiyo꞉, niyo꞉ e gelo꞉wa a꞉ma꞉la꞉ iliga꞉to꞉l. 13 Niyo꞉ e mo꞉hamana꞉kiyo꞉ ka꞉la꞉sa꞉ga꞉, ne o꞉lia꞉ dowai kibo꞉bowo꞉, ne Ya꞉suwa꞉ wiya a꞉la꞉ta꞉ga꞉lo꞉ dibolowa so꞉l wenamio꞉, gilo꞉ asuwa꞉tan aumbo꞉, eyo꞉ ne o꞉li asuwa꞉fabe. 14 Niyo꞉ a꞉la꞉ asulo꞉ ko꞉sega, na꞉no꞉ towo꞉ semo꞉saefa꞉ amio꞉, a꞉la꞉bo꞉ mo꞉dimidama꞉no꞉. Mo꞉wo꞉ gilo꞉ ne asuwa꞉fa꞉no꞉wo꞉, niyo꞉ mo꞉ dibolama꞉no꞉, go꞉no꞉n asulo꞉wa a꞉la꞉ta꞉ga꞉ dimidama꞉ki asulab. 15 Ge o꞉lia꞉ Onesimus o꞉lia꞉ ho꞉len imilig no amio꞉lo꞉ aloba꞉da꞉sa꞉ga꞉ ane a꞉no꞉ mo꞉wo꞉ ha꞉? E gelo꞉wa a꞉ma꞉la꞉ ya꞉sa꞉ga꞉, ga꞉ino꞉ mela꞉no꞉ mela꞉no꞉ doma꞉no꞉ a꞉la꞉bo꞉ asulaya? 16 Onesimus e gelo꞉wa a꞉ma꞉la꞉ fa꞉la꞉dowalikiyo꞉, e gi madalilo꞉ nanogdo꞉ dian kalu dowaki, giyo꞉ e madali nanogdo꞉ dian kalule a꞉dowab a꞉la꞉bo꞉ asula꞉so꞉bo. Niyo꞉ Onesimuso꞉ mada asulab ko꞉sega, e gi nanog dialikiyo꞉, Alana꞉ wi amio꞉ e gaoleyo꞉ o꞉ngo꞉ dowaki, giyo꞉ e mada alan asuluma꞉ib.
17 A꞉la꞉fo꞉ko꞉lo꞉ na꞉no꞉ giyo꞉ milile a꞉la꞉asulalega, Onesimus e gelo꞉wa fa꞉la꞉dowalikiyo꞉, giyo꞉ ne yab amilo꞉ sagalo꞉ dowa꞉sen o꞉leaumbo꞉, emo꞉wo꞉lo꞉ a꞉la꞉ka sagala꞉bi. 18 Onesimus eyo꞉ gemo꞉wo꞉ halabo꞉ dimido꞉lalikiyo꞉, wa꞉lo꞉ dimia꞉no꞉wo꞉ dowo꞉lalega, gemo꞉wo꞉ wa꞉lo꞉ no꞉no꞉n dugumia꞉no꞉ ko꞉lo꞉ nemo꞉ sa꞉la꞉bi. 19 Ne Fol, to we no꞉no꞉n dagileya꞉ sa꞉sa꞉lo꞉l, “Wa꞉l a꞉no꞉ niyo꞉ hendele gemo꞉wo꞉ dugumia꞉no꞉” a꞉la꞉li sa꞉sa꞉lo꞉. Ko꞉sega giyo꞉ a꞉la꞉ asulab. Gilo꞉ mela꞉no꞉ ho꞉gi di a꞉namio꞉, nemo꞉lo꞉ wa꞉l mia꞉no꞉wo꞉ da꞉lab. 20 Na꞉no꞉ Keliso amio꞉ naole dowo꞉ ko꞉lo꞉ giyo꞉ man nafa we nemo꞉wo꞉ dimidama꞉ki, asulab. Kelisowa꞉ man nafa gilo꞉ dimidama꞉no꞉ a꞉ma꞉yo꞉, ni asulo꞉wo꞉ sagalema꞉ib.
21 Nilo꞉ gemo꞉lo꞉ dabu bo꞉do꞉l we, giyo꞉ hendele dimidakiyo꞉, man nafa nolo꞉lo꞉ a꞉dimidama꞉ib a꞉la꞉ asulaki, mo꞉fo꞉s we gemo꞉wo꞉ a꞉na sa꞉sa꞉lo꞉l. 22 A꞉la꞉ta꞉ga꞉ nowo꞉ we. Gilo꞉ Godemo꞉lo꞉ dulugu sa꞉la꞉len aumbo꞉ dimidaliki, ne gelo꞉ amio꞉ konema꞉ mia꞉no꞉ a꞉la꞉asulab ko꞉lo꞉ giyo꞉ uo꞉b nowo꞉ nino꞉ ta꞉fo꞉lubi.
Giyo꞉ ne gelo꞉wa mena꞉ki Godemo꞉ dulugu sa꞉la꞉len ko꞉lo꞉ ne gelo꞉ amio꞉ ko꞉nema mia꞉no꞉ a꞉la꞉asulo꞉ ko꞉lo꞉, giyo꞉ uo꞉b nowo꞉ nino꞉ ta꞉fo꞉lubi.
Sagalo꞉ towo꞉ saga꞉fo꞉.
23 Ya꞉su Kelisowa꞉ wiya a꞉la꞉ta꞉ga꞉lo꞉ dibolo amilo꞉ sab nowo꞉ Ebafolas, e ne o꞉lia꞉ wena siliki, eyo꞉ sagalo꞉ towo꞉ gemo꞉ sagetab. 24 A꞉la꞉ta꞉ga꞉ negelelo꞉ nanog dian kalu nolo꞉ Mag, Alistakus, Demas o꞉lia꞉ Lug iliyo꞉lo꞉ mada o꞉m a꞉la꞉bo꞉ sagetab.
25 Alan Ya꞉su Kelisowa꞉ ha꞉fo꞉ disa꞉lan man a꞉no꞉ gi mama o꞉lia꞉ dowa꞉biyo꞉.
* 1:11 Onesimus a꞉la꞉do꞉ sa꞉lab a꞉ma꞉ ha꞉go꞉ we, asuwa꞉ta꞉sen.