144
Hina bagade Dunu da Hasalasibiba:le, Godema Nodosu
1 Hina Gode da na Gaga:sudafa! Ema nodoma!
E da na gegema:ne adoba:sa.
Amola na gegema:ne momagesa.
2 E da na gagulasa amola na gaga:sa.
E da na ougiha aligisu dunu esala, amola na gaga:su dunu esala.
Na da se mae nabawane hahawane masa:ne,
Ea hou dafawaneyale dawa:sa.
E da niha fifi asi gala banenesisa
3 Hina Gode! Osobo bagade dunu ilia da hamedei agoai galebe.
Dia abuliba:le ilima asigibala:?
4 Ninia da fo fonomene agoai ba:sa.
Ninia esalebe eso da baba bobaligilalebe agoai ba:sa.
5 Hina Gode! Mu gadelale fasili, gudu sa:ima!
Goumi digili ba:ma! Amasea, goumi da mobi bubugilalebe ba:mu.
6 Dia ha lai afagogoma:ne, ha:ha:na gala:su iasima.
Dia ha lai dunu hobeama:ne, dadia gala:le se bobogema.
7 Na da hano lugudua mogo sososa.
Dia gadodili, lobo ligia guduli, na hiougia gadoma.
Ga fi dunu ilia gasaga na hasalasa:besa:le, Dia gaga:ma.
8 Ilia da dafawane sia: hamedafa sia:sa.
Amola ilia hamomusa: ilegele sia:sea, ogogosa.
9 Gode! Na da Dima gesami gaheabolo hea:mu.
Na da sani baidama dusa, Dima gesami hea:mu.
10 Di da hina bagade ilia ha lai hasalasima:ne hamosa.
Amola Dia hawa: hamosu dunu Da:ibidi gaga:sa.
11 Na dodona:gi ha lai dunu da na osa:la heda:sa:besa:le,
Dia na gaga:ma. Ga fi dunu ilia gasaga na hasalasa:besa:le, Dia gaga:ma.
Ilia da dafawane sia: hamedafa sia:sa.
Amola ilia hamomusa: ilegele sia:sea, ogogosa.
12 Ninia dunu mano ayeligi amolali,
da ha:i manu bugi nasegagini heda:be agoai ganumu da defea.
Amola ninia idiwilali, ilia da noga:le lelu duni bugi
amo da hina bagade ea diasu hegomaia nina: hamonanebe,
amo agoai ba:mu da defea.
13 Ninia liligi legesu diasu ilia ha:i manu amoga nabai ba:mu da defea.
Ninia sibi amo da nasegagi sogega esalebe,
ilia mano osea:idafa lalelegemu da defea.
14 Ninia bulamagau da mae daba:me asili, mano osea:idafa lalelegemu da defea.
Ninia moilai logo ganodini, se nabasu wele sia:su hame nabimu da defea.
15 Fifi asi afae da amo hou ba:sea, hahawane bagade ganumu.
Amola ilia da Hina Gode amo ilia Godedafa ilegesea,
ilia da hahawane bagade ganumu.