9
Lahatala ana Noh at palai
1 Angmuse Lahatala Ana Eaaung-Ehama ba bae ebale vengniang angu metma Noh, bot oal ang naung imampi mainang, bot Ana iat mateng hula, “Iini tabaning-tahelit ening toang-rae, senge por-alolang anga ening ana aaving.
2 Binanta balevang ba por-alolang taang, dung burang mi aalili, bot aab tang omimi ang naung, eningse emangpi iing veng iuangmari. Emangpi angu Na metma iiatang mi abaang, senge iing ba ing vengator.
3 Binanta ang naung emangpi euumung angu iini bisa adang, bot te ang naung eihi angu di iini bisa adang. Emangpi angu, Na metma maiinang.
4 Aarunge binanta ba enghara jedung veng sehi angu, iini ekang eve angu adang ekang, se binanta enghara angu, ue eve angu omimi.
5-6 Manusia angu Na ening Nerupa angu eamulung. Angu ebele, ekang manusia angu ameang ekang, bot eve angu ekang abokong ekang. Kalo manusia, bot binanta ba manusia angu ening ana aamina se, Na malekang ebale angu metma iadana, base ing di malekang ing ening ini aamina. Hukung anga Naing ba vengbanang.
7 Base, iini malekang tabaning-tahelit ening toang-rae, garet ahala-taanang ahala, senge por-alolang anga bale ening ana aaving.”
8 Lahatala Ana bot taang mateng hula,
9 “Angase Na etatabit Nepalai angu metma iiat palai, sampe iitabaning ang naung di ing taang.
10 Emangpi ba iiat hama-hamat por-alolang taang aabeta ang naung, benangba binanta gariang, binanta balevang, bot dung burang mi aalili ang naung, bot emangpi ba iiat hama-hamat kampal taang kaluar ang naung di, palai anga metma iadana.
11 Base Nepalai angu Na metma iiat palait hula alang: Angase emangpi ba aabeta angu, jar eele bae ing ening ini aamina niang iila, bot por-alolang anga, jar eele bae ening amusing-ajela niang iila.
12-13 Ne katambe angu Na metma burang mi mea, senge metma tanda ening hula, Nepalai ba Na metma iiat palai, bot metma emangpi ba aabetat por-alolang taang ang naung iat palai tila angu, Na bae vengtajebing niang aulang ejehing-emeang.
14-17 Kalo Na bano at hoa por-alolang anga taang, bot katambe angu bano omimi ava apaleteng se, angu metma Nevengani ening, senge Na Nepalai angu venganit hula: eningse jar eele bae emangpi ba aabeta angu ening ini aamina niang, bot jar eele angu bae por-alolang anga di ening amusing-ajela niang iila. Aulang base, Nepalai angu bae eseng veng niang, kilang iing parta, bot emangpi ba aabetat enghara veng ang naung di ing parta.”
Noh ana naboa
18 Noh oal naung ba at hama-hamat kampal angu taang kaluar, benangba Sem, Yafet, bot Ham. (Ham angu, Kanaan imang).
19 Nehe emangpi ba aabetat por-alolang anga aaving anga, inang tue anga itabaning mi hoa.
20 Noh angu ekarajang ba maada-pina. Aing ba halomang-halomang anggor ebir ening.
21 Minu adana, Noh ana anggor na sampe veng naboa. Angu ebele ana edurat eteeng omimi tia.
22 Ham Kanaan imang angu, ana uuling imang ana edura angu ateing muse, ana bihit kaluar hela ekaku Sem, bot Yafet oleve iat sarenta.
23 Angmuse Sem, bot Yafet oleve noang nu medit metma iabea mi ahele, sengmuse oleve iamota venglamal teeng mi maso, senge noang angu metma imang aing vengtering. Ening aulang base, oleve bae uuling imang ana edura angu ateing niang. Seng angmuse oleve kaluar hela.
24 Uanguveng Noh enaboa angu barinti tila muse, naba ba oal iia ening metma adana angu ana vengmee.
25 Angmuse Noh ana mateng hula, “Ee! Aaing ba Kanaan imang angu! Na kutuk metma maeenang! Eningse aaing metma eekaku ang naung imalea ening!
26 LAHATALA Aing tajaning! Senge Ana Eaaung-Ehama bae ebale veng niang angu metma Sem enang!
Aarunge Kanaan angu, malekang metma Sem emalea ening.
27 Lahatala Ana Yafet emihing-mana angu ening berang;
Bot Yafet etabaning ang naung, malekang Sem etabaning ang naung iat aabetat tominu-tahanu.
Aarunge Kanaan angu, malekang metma Yafet emalea ening.”
28 Jar eele hela barinti sengmuse, Noh ana aabetat mitung 350 maveng.
29 Base, Noh euumur mitung 950 muse, ana aamina.