Bafut Lukas 15

M̀bînjə̀rə̀ yìi mə ɨ̀ bwɛ̀ aà

(Mt. 18.12-24)

1 À lɛ mbə a njwi yì mɔ̀ꞌɔ, ŋgǎŋkwɛrə bɨ̀taksì bo bɨ̀ ŋ̀gǎŋghɨ̀rə̂ ɨ̀nnù jì bɨ zî ǹtswe a mbɛ̀ɛ Yesu a nyuꞌu ɨ̀nnù jìi à lɛ sɨ swoŋ aà. 2 BaFarɨsai bo bɨ̀ ŋ̀gǎŋndɨ̀ꞌɨ nɔ̀ŋsə̀ kâ nnurəkə nswoŋə nɨ mə, “M̀bâ ghû à lɔ̀gə̀ nɨ̂ ŋ̀gǎŋghɨ̀rə̂ ɨ̀nnù jî bɨ bo bo jɨ̂!” 3 Maa ajàŋ, Yesu a tɨgə̀ ǹnaa nɨghàà nuà a mbo bo:

4 “Àa ghuu ŋû nɨ̀bù yìi mə mbə a tswe nɨ̂ m̀bînjə̀rə̂ ji ŋkhɨ̀ yî fùùrə̀, bɛɛ mə yì mɔ̀ꞌɔ bwɛ, boŋ à ka waꞌà màꞌàtə jya mɨ̀ghum mi bùꞌû ǹtsò mbùꞌû a atu ntaꞌa, ŋghɛɛ ŋka nlɔɔ ya mə ɨ̀ bwɛ aa, nyweꞌe noò yìi mə à ka yə ma ya aa ɛ? 5 Bɛɛ mə a yə, a ŋɛɛ nnɔ̀ŋsə̀ a abɛ̀ꞌɛ yu, ntɨgə ndorɨtə. 6 Ǹtɨgə ŋkwɛɛ a ndùgə̀, ǹtwoŋ ɨkaꞌà ji bo bɨ̀ bàmbɛ̀ɛ ndugə̂ bi, ǹswoŋə a mbo bo mə, ‘Bìꞌinə̀ ka ndorɨtə nloŋ mə mə̀ yə̀ mə̂ m̀bi yà ya mə ɨ̀ lɛ mbwɛ aà’. 7 Mə̀ swòŋə a mbo bù mə a kɨ mbə aa tsiꞌì ma mùu ajàŋ, nɨ̀dorə nì ghàꞌàtə̀ ka tswe a aburə mə mbə ŋù yì mbɨ yì m̀fùùrə̀ a bəŋkə ntɨɨ̀ yi, ntsyatə àjàŋə bɨ dorɨtə nloŋ bə̂ mɨghum mi bùꞌû ǹtsò bùꞌu bìi mə ànnù yaa a tsinə kaa bo waꞌà nɨ̂ m̀bə̀ŋkə mɨ̀ntɨɨ̀ myaa bû ǹtswe aà.

Àbaꞌatə ŋkabə yìi mə a lɛ mbwɛ aà

8 “Kə̀ à nɨ ghuu mâŋgyɛ̀ mə à tswe nɨ̂ ɨ̀bàꞌatə ŋkabə̀ ji ji nɨghum, bɛɛ mə yǐ mɔꞌɔ a bwɛ, a waꞌà lâm kosə̀ nyɛꞌɛ ǹdâ yì, ǹnaŋsə ŋka nlɔɔ nyweꞌe noò yìi à ka yə aa ɛ? 9 Bɛɛ mə a yə, a twôŋ ɨ̀kàꞌâ ji bo bɨ̀ bambɛ̀ɛ̀ ǹdùgə̂ bi bɨ zî, a swoŋ a mbo bo mə, ‘Bìꞌinə̀ ka ndorɨtə ǹloŋ mə mə̀ yə̀ mə̂ ŋ̀kabə̀ yà ya mə ɨ̀ lɛ mbwɛ aà.’ 10 Mə̀ swòŋə a mbo bù mə à kɨ mbə tsiꞌì a ŋgɨ̌ŋ ŋgɨ̀ŋ mə, nɨ̀dorə nɨ tswe a aburə a mbo baangel bɨ Nwî ǹloŋ ŋû ŋ̀ghɨ̀rə̂ ɨ̀nnù jì bɨ yì m̀fùùrə̀ yìi mə à bə̀ŋkə ntɨɨ̀ yi aà.”

Mûmbâŋnə̀ wa yìi mə à lɛ mbwɛ aà

11 Yesu a bû ŋ̀ghɛɛ nɨ̂ m̀bìì ǹswoŋ mə, “Ŋù yì mɔ̀ꞌɔ à lɛ ntswe nɨ bɔɔ mbâŋnə̀ bi baà. 12 Yì ŋ̀kə̀gə a swoŋ ghu mbo mə, ‘Taà, yàtə njoò jo mfa jìi mə ò tswe nɨ̀ m̀fa a mbo mə̀ aa tsɨ̂tsɔ̀ŋə̀.’ Taà waa wa a tɨgə̀ ǹyatə njoo jya a tɨtɨ̀ɨ bo. 13 Ǹjwi jì tsu ɨ ghə̀ mə kə tsyǎ, mu yì kə̀gə wa a ghotə̀ jìi njoo jya mfèè, ǹlɔgə ŋkabə yì m̀fɛꞌɛ ŋghɛ̀ɛ̀ yi a atoo asàꞌa aghaꞌà, ǹta ŋgɨꞌɨ nɨ̂ ŋ̀kabə̀ yì ya, njɨ nɨ̂ m̀bi ghu. 14 Nòò yìi mə ŋkabə yì ya ǹtsɨ̀m ɨ̀ lɛ mmɛ̀ aa, mɨ̀kwenə̀ yî ǹtɨ̀ɨ̀ a kuu wa alaꞌa, a tɨgə̀ ŋ̀karə nlɔɔ nɨ̂ àyoo yì jɨ̀ kɨkaŋ, 15 ŋghɛɛ ntsiꞌi ŋû àlaꞌa wa yì mɔ̀ꞌɔ, mbuꞌu mbo ghu mbo mə tâ à lɔgə yì nɨ̂ ŋ̀gàŋàfàꞌâ yì. Ŋù wa a lɔgə̀ yi ntoo a mûm ǹsòo yu mə à ghɛɛ ŋka njɛꞌɛ bɨ̂kwiŋyàmə̂ bi. 16 À lɛ sɨ yə̀ꞌə̀tə mə boŋ yu jɨ ntsàꞌà bɨ̂ kwiŋyàm jyâ, la kaa ŋù waꞌà ghu mbo fâ. 17 À lɛɛ̀ m̀bə nɨ a njwi yì mɔ̀ꞌɔ, àtû yi a tɔŋ, a swoŋ mə, ‘Ŋ̀gǎŋəfàꞌà Taà tsiꞌì tsɨ̀m ɨ tswe nɨ̀ mɨ̀jɨ a njɨ mɨ ghaꞌà nɨ̀ waa, lâ mə̀ tswê faà m̀baŋnə ŋkwo nɨ̂ ǹjì ghu! 18 Mə̀ ka bɨ̀ɨ̀nə ɨ kwɛɛ ghɛ̀ɛ̀ a mbɛ̀ɛ Taà ghà, ɨ swoŋ gho mbo mə, “Taà, mə̀ ghɨ̀rə̂ ɨ̀bɨ a nsi miꞌi Nwì bo bɨ̀ a mbo wò: 19 Kaa mə̀ sɨ̀ kuꞌùnə̀ mə mbə ò twoŋə̀ gha nɨ mû ghò yî m̀bâŋnə̀; tɨgə nlɔ̀gə̀ gha bə tsiꞌì tsǒ ŋgàŋàfàꞌâ ghò yî mɔ̀ꞌɔ.” ’ 20 À lɛ ntɨgə mbɨɨnə ŋka ŋghɛɛ a mbɛ̀ɛ Taà yì wâ. Lâ nòò yìi mə à lɛ mburə tsiꞌì a sàꞌa aghaꞌa aa, Taà yì wa a yə̂ yi, ŋ̀ko mɨlɨ̀ŋnə̀ yì, ŋ̀khə̀ ŋ̀ghɛ̀ɛ̀ ŋ̀kotə yi a ntsǔntɨɨ yu, ǹnɔŋ mɨghə̀ŋə̂ mi.

21 Mu wa a swoŋ ghu mbo mə ‘Taà ghà, mə̀ ghɨ̀rə̂ ɨ̀bɨ a nsi miꞌi Nwì a aburə, ŋkɨ ŋghɨrə a nu wò; wa kaa mə̀ sɨ̀ kuꞌùnə̀ mə tâ ò ka ntwoŋə nàa nɨ mû ghò.’ 22 La taà yì wa a bâŋnə̀ ǹswoŋ a mbô ŋ̀gǎŋfàꞌâ ji mə, ‘Nɨ̀ waŋsə nzì nɨ̂ àtsə̀ꞌə̀ yî bɔ̀ŋ bɔŋ ya, mmàꞌà ghu nû; ŋ̀kɨ ŋwɛꞌɛ nɨ̀ a karə̀ ghu mbo, nɨ̂ ǹtam ghu mɨkòrə̀; 23 Zǐ nɨ̀ nɨ kau wa mə bɨ naŋsə njɛꞌɛ a faŋ mfaŋ aa, ŋ̀wa, tâ bìꞌinə̀ jɨ, ŋka ndorɨtə; 24 ǹloŋ mə mû ghà ghû à lɛ ŋkwo, à bǔ ntswe fu ntɨ̀ɨ̀; à lɛ mbwɛ, bɨ bù mə̂ ǹyə yi fu.’ Bo lɛ ntsuꞌu ntɨgə njɨ ndorə.

25 “À lɛ mbə maa noò aa, mu yì ndɨɨ wa a tswê a afɔ̀; nòò yìi mə lɛ ŋkwɛɛ ŋka nyweꞌe a mbɛ̀ɛ̀ ǹdùgə̀ bo aa, nyuꞌu ajàŋ mə bɨ yəə nɨ̂ ɨ̀kòò m̀buꞌu nɨ̂ ŋ̀gɔ̀ɔ̀.

26 “A twoŋə̀ ŋ̀gàŋàfàꞌà wa yì mɔ̀ꞌɔ mbetə yi mə, a fɛ̀ꞌɛ̂ ànnǔ akə lɛ. 27 A swoŋ mə, ‘Mu maà ghò wa à ghɨ̀rə̂ ŋ̀kwɛɛ, taà ghò a tɨgə̀ ŋ̀wa a kaù wa mə bɨ lɛ nnaŋsə njɛꞌɛ a faŋ aà, ǹloŋ mə à lɛ mbù ŋ̀kwɛɛ ŋkuu sɨgɨ̀nə̀ aà.’

28 “Mu yì ndɨɨ wa à lɛ nlwìsə ntɔŋ, ntuu ŋkuu a ndùgə bo. Taà yì wa a fɛꞌɛ̀ ŋ̀ghɛɛ ntsiꞌi yi ŋka nlətə mə tâ à kuu. 29 A kwiꞌi a mbo Taà yì mə, ‘Yə̂, mə̀ nwùgə̀ mə̂ nû ya mfaꞌa a mbo wò nɨ̂ ǹdùu ɨlòò jî ghàꞌàtə̀, kaa mə̀ lɛɛ̀ ŋ̀waꞌǎ atu a mbo wò tɨɨ̀; lâ kaa ò lɛɛ̀ ŋ̀waꞌà tsiꞌì mû mbi yì ŋkə̀ꞌə̀tə̀ a mbo mə̀ fa mə ta mə̀ wa ta bìꞌi bɨ̀ ɨ̀kàꞌâ jya kurə ŋka ndorɨtə. 30 Lâ mû ghò ghû, mə à lɛ nlɔ̀gə njoò jo ŋghɛ̀ɛ̀ bo bɨ̀ ɨ̀kwàrə̀ tâ ŋ̀gɨꞌɨ ghu aa, à tɨ̀ mə tɨ kwɛɛ aa, ò wâ kaù wa mə bɨ lɛ njɛꞌɛ a faŋ faŋ aà!’ 31 Taà yì wa a swoŋ ghu mbo mə, ‘Mû ghà, ò tswe aa tsiꞌì bìꞌò bɨnòò bɨ̀tsɨ̀mə̀, ǹjoò jyâ tsɨ̀m ɨ kɨ̂ m̀bə̂ jô. 32 A ghɨrə mbɔ̀ŋ mə tâ bɨ̀ jɨ ŋka ndorɨtə, ǹloŋ mə mumaà ghò ghû à lɛ ŋkwo, à bu ntswe ntɨ̀ɨ̀; à lɛ mbwɛ bɨ bû ǹyə yi.’ ”