5
Gethek sohjambling è yang
1 Hanyie è Isu shii Masaiya rone migi rek ai ne Hamangkhung-aphuii ro ani ro; chiih-è hanyie è aphuii shii miie ai ne dufuii shii de miie ro.
2 Gethek ne Hamangkhung-aphuii shii miie chiih-è ai muyungthek shii nuii pha ji è gethek ne Hamangkhung-aphuii ro aniphiing shii miie rone ìd ruii.
3 Nyieliieshii gethek Hamangkhung-aphuii shii miie pha miyaosiu jine gethek airo muyung shii nuii ro. Chiih-è gethek shii ai muyung ne diig asi ro,
4 nyieliieshii Hamangkhung-aphuii ro zab ani ne sohjambling è yang mua ruii phro. Chiih-è gethek ro migi chiang è sohjambling è yang phro.
5 Sohjambling è hanyie yang mua phlei? Hanyie è Isu shii Hamangkhung-aphuii ro Dufuii rone migi rek lei ne ai yang mua bie phro.
Isu Masi chiang shii khagi
6 Isu Masi ne khowo pha kho nane ai iy pha ifai jithek rog shii wuiijong ro. Ai kho rog shii awuii bie ro, jishii kho nane ifai nyimanyi rog shii wuiijong ro. Chiih-è Ragung awai è ji pha miyao jishii khagi rek, nyieliieshii Ragung ne izai.
7 Ji shii ne khagi uom um ro:
8 Ragung, kho chiih-è ifai; chiih-è uom jine zab ò khagi phi ro.
9 Gethek ne tharothamang ro khagi shii migi rek; jishii Hamangkhung-aphuii ro khagi ne ji è de bajo chuh ba, chiih-è airo khagi ne awai Dufuii chiang phi ro.
10 Ji-è hanyie è Hamangkhung-aphuii ro Dufuii shii migi rek ai ne hìpha khagi shii awaithek lubu hà ruii; jishii hanyie è Hamangkhung-aphuii shii migi arek, ai ne Hamangkhung-aphuii shii khlam pha rab ro, nyieliieshii ithek ne Hamangkhung-aphuii è awai Dufuii chiang shii yao pha ji shii migi arek ro.
11 Khagi ne hì: Hamangkhung-aphuii è gethek shii idang pha chai phi, chiih-è hìpha chai khrug ne airo Dufuii è ro.
12 Hanyie shii Dufuii um aishii ne hìpha chai um, hanyie shii Hamangkhung-aphuii ro Dufuii oi aishii ne chai de oi ro.
Idang pha chai
13 Gu ne nathek shii hì zey, ji è nathek ne Hamangkhung-aphuii ro Dufuii shii migi rek pha chiang è nathek ne ìd ruii nathek shii idang pha chai um ro.
14 Hamangkhung-aphuii moe shii gethek ne lububo um, nyieliieshii gethek ne ai è yang pha duiine aishii nyie magunde sia ne lia arone gethek ne izai nuii phro.
15 Gethek è khuchung magun ai ro sia ne lia arone nuii phro; chiih-è gethek hì izai rone ìd pha chiang è, gethek ne hì de ìd gethek è aishii lia pha jine phi ruii phro.
16 Nathek è migipho shii layog rek pha nane iy pha ji anow pha layog rek pha doh arone, nathek ne Hamangkhung-aphuii shii sia chid, hanyie è ji pha bran shii chai phi. Hì pha miyao ne ithek ro hanyie layog yi iy thog pha anoh. Jishii layog è ne iy pha jiha noh pha de um ro, chiih-è gu ne nathek shii ji pha chiang shii Hamangkhung-aphuii shii sia bone ayao ro.
17 Zab asi pha rek pha jine layog ro, jishii layog ne iy thog pha anoh pha de um ro.
18 Gethek ne ìd Hamangkhung-aphuii aniphiing ne layog shii bleb-bleb arek phro, nyieliieshii ithek shii ne Hamangkhung-aphuii Dufuii è ragia rek ruii phro, chiih-è Sakhathong ji è ne ithek shii awie pha arek mua phro.
19 Gethek ne ìd zab sohjambling yi Awiepha Jia ro bokho shii magunde gethek ne Hamangkhung-aphuii ro bran ro.
20 Gethek ne ìd Hamangkhung-aphuii Dufuii wuii chiih-è gethek shii gao yi pha phi, ji è gethek ne izai Hamangkhung-aphuii shii ìd ro. Gethek ne zai Hamangkhung-aphuii rog ò shii rai—Airo Dufuii Isu Masi rog ò shii rai. Jine zai Hamangkhung-aphuii ro, chiih-è jine idang pha chai ro.
21 Gu aniphiing nawaithek shii khlam pha chad è ragia ruii bo.