13
Isu è Hamangkhung-aphuii ro Misiahò ji chuak pha yao
(Mth 24:1-2; Lug 21:5-6)
Isu ne Hamangkhung-aphuii ro Misiahò ji thoh srane dun ramuii shii, ai samoy jia è aishii yao, “Masdo, hì pha lubao chiih-è hòthek ne bajo khie doh muii ro.”
Isu è aishii chang ne yao, “Nathek ne hì pha boh lubao hò ne riig iang bo! Doh jia shii ne hì pha hòthek pha lubaothek ne jia de khim ne arai mua pha zab chuak dun phro.”
Gu samoythek shii ne diig chiih-è riie rey ruii phro
(Mth 24:3-14; Lug 21:7-19)
Isu ne ji pha Hamangkhung-aphuii ro Misiahò pha khlei pha sumaro phiing shii dug ne rai shii, Phithar, Jems, Jon chiih-è Andrew ne aishii ug ne wuii thog ruii. Ithek è aishii yao, “Gathek shii yao phi bo, ji pha inai ne khuchung thog ruii phlei? Chiih-è, ji pha inai thog sha ruii rone thieg yi pha gathek è nyie doh shii ji pha inai ne re phlei?”
Isu è ithek shii yao, nathek ne nowbthan ne rai iang bo, chiih-è branthek è ithek shii akhin-aring yi rabo. Bajo branthek è ithek shii yao ruii phro, gune ji pha Masi ro! Bran bajo thek ne gu beng è yi ne khinrin ruii phro. Chiih-è, nathek ne mak thek inui thog pha yoi mage shii, chiih-è mak ruang hà thog pha mua yoi mage shii, nathek ne aram chid rabo. Jithek ne izai re ruii phro, jishii, jine jong pha ishak thog sha rone asi ro. Du-ùa chung de gui rai ruii phro; zab ithua thek chung de gui ruii phro, thiichiih shii zab hà sajid sham ne, chiih-è zab pha chieniing pha thek oi pha diig re ruii phro. Jithek ne hò-amuii thek è ani giak pha ibi shii riie pha duiine diig ruii ro.
+ Nathek ne nawaithek shii nowbthan srane bujuii ne rai iang bo. Nathek shii de zum ne limiang hò hà noh srane Jewthek misiahòthek shii zuang ruii phro; nyieliieshii gu shii nuii pha chiang è nathek shii ne dumuiithek chiih-è saja thek moe shii noh ne ithek ro migi chiang ji yao yi phro. 10 Ai ne zab pha ibi shii guro miyao wie hìne zab branthek shii chiih-è zab pha du-ùathek shii yao ched bi phro. 11 Khuchung magunde, nathek shii zum srane limiang moe shii noh dun shii, nathek ne khi-èrek ne yao sha phlei! Inow ne arum chid rabo; nyieliieshii, ji pha idoh shii ne nathek shii yao mua pha lumuii phi ruii phro; nathek è nyie yao pha miyaogam ne ithek miyao pha asi phro, ji ne Hamangkhung-aphuii Ragung è yao gieng phro. 12 Khuiino chung magunde, zum srane ua yi pha phi muii phro, aphuii è ani shii de ji è rek ruii phro, aniphiingthek de awaithek pha aphuii amuii shii ji è rek ne ua muii phro. 13  +Zab branthek ithek shii gu chiang è snai ne chiih-è ariig yang pha rek ruii phro, nyieliieshii ithek è gu shii migi rek phro. Jishii, hanyie è awai migi shii zab pha inai thog dang pha rek pho ne ragia re ruii phro.
Zeanakhurei pha zia jia
(Mth 24:15-28; Lug 21:20-24)
14  + “Nathek ne doh ruii phro, akhie dang pha ibuii jia yi khi hà ai arai pha ji shii riu ruii phro.” Thampho ne hì thieg bo: Hì pha miyao ne nyie yao pha ji ne thieg pha bidiang bo. Chiihphado shii hanyie ne Judea pha ithua hà um lei ne ithek ne phiingthek hà ran dun phro. 15  + Bran hanyie yi awai hòzak hà um pho ne buzam awai hò iliing hà dun ne mana yi pha ishak amua rabo. 16 Bran hanyie ne raig hà um pho ne awaithek yung yi pha idoh hò hà adun rabo. 17 Hò-amuii hanyie ani wiig ne chiih-è ani ìu um pho ne ji pha inai shii ne bajo diig phro! 18 Jipha ishak ne hakhanshak shii are yi pha Hamangkhung-aphuii shii sia bo! 19  +Hì thek pha diig inai ne, Hamangkhung-aphuii è igobi sohjambling rab dang pha ishak è yi ne thuh thog pha hanyie è athieg ba pha awie dang pha diig ji thog ruii phro. Ji re pha idoh shii ji duiine mia pha diig ne dinne are phro. 20 Jishii Hamangkhung-aphuii è diig pha inai shii ne la-ìu-ìu rek phi phro; ai è ji arek arone, hanyie de asieng mua phro. Jimagunde awai è gua pha branthek chiang shii inai la-ìu-ìu rek phi phro.
21 Chiihphado è, hanyie magunde nathek shii yao, riig bo, ichiih shii ne Masi um ro! Din ne, riig bo, the jine Masi rone yao na de! Jishii aishii migi arek rabo. 22 Biidiie pha Masi chiih-è biidiie pha chaigthek ne khia ruii phro. Ithek ne are mua pha bliathek rek ne chiih-è buangthek ji rek ne, chiih-è rek mua arone, Hamangkhung-aphuii è gua pha branthek shii khinrin pha nyiu phro. 23 Gu miyao pha miyao chiang hì ne nawaithek shii ragia rek ne chiih-è saro bo.
Bran dufuii wuii din ruii pha jigigam
(Mth 24:29-31; Lug 21:29-33)
24  + Diig pha ishak inai pha idoh ne inai ne igiia re dun phro, chiih-è habie de achuang pha re dun phro, 25  + Dadiangthek de hamangkhung è thazam chiih ruii phro, chiih-è hamangkhung pha riichaithek de sham ruii phro. 26  +Chiihphado Bran Dufuii khia ne, biisiie nane boh blu rog shii sakhamiing shii wuii ruii phro. 27 Ai è hamangkhliiethek shii soh pha iring wi shii thog pha thoh srane sohnyiak iring jia pha iring è jia pha iring thog pha ithek shii Hamangkhung-aphuii mugua pha bran shii khrab yi phro.
Iphem hingmuii ro miyao
(Mth 24:32-35; Lug 21:29-33)
28 “Jipha Iphem hingmuii è nathek shii ìd yi phro. Ji pha iphem hingmuii ro idiphak ire re ne chiih-è jum re mage shii irab jao ne nyu ruii phro. Nathek ne thieg phro halua idam ne inui re sharuii rone. 29 Ji duiine, nathek è ji re pha doh mage shii, nathek ne thieg, jao pha ishak inui sha ro. * 30 Now bo, hìthek re mage shii ichiih um pha ithek giak bran ne isieng ba phro. 31 Hamangkhung chiih-è sohnyiak ne san dun phro, jishii gu miyaogamthek ne khuchung de asan phro.”
Hanyie de ji pha inai chiih-è ijak shii athieg phro
(Mth 24:36-44)
32  + “Jishii hì pha inai chiih-è ishak thog pha ji ne hanyie de athieg mua phro Hamangkhliiethek de chiih-è Dufuii de athieg mua phro; ji pha inai thog ruii pha ne Hamangkhung-aphuii awai è thieg bie ro. 33 Wie riig srane nowbthan ne rai iang bo, chiih-è ji pha inai thog ruii phane nathek athieg phro. 34  +Jipha inai ne ji duiine phro, Bran jia hanyie è awai khiaothek shii dumuii phi srane chiih-è zab pha khiao shii nyie rek chid pha ji yao ne chiih-è hò khan pha bran shii hò wie riig bo è yao ne awai hò thoh marui ne wuiidun. 35 Chiihphado è, nowbthan bo, nyieliieshii hò pha muspho ne khuchung thog ruii pha ji ne nathek ne athieg phro yangne ne ai ne habjuang shii dun ruii pha de um phro, yangne ai ne habiu duchoi shii de dun ruii pha de um phro, dinne, yangne ai ne hasiang asiang ba ibi shii thog ruii pha de um phro, yangne ai ne hasieng sieng pha idoh shii thog ruii pha de um phro. 36 Ai ne hamblo shii dun thog mage shii nathek ne amen iang rabo. 37 Chiihphado, gu nathek shii nyie yao pha ji ne, gu zab shii yao ne: nowbthan ne rai iang bo ne yao phro.”
+ 13:9 13:9-11: Mth 10:17-20; Lug 12:11,12 + 13:13 13:13: Mth 10:22 + 13:14 13:14: Dan 9:27; 11:31; 12:11 + 13:15 13:15,16: Lug 17:31 + 13:19 13:19: Dan 12:1; Dng 7:14 + 13:24 13:24: Aij 13:10; Jol 2:10,31; 3:15; Dng 6:12; Aij 13:10; Ezkh 32:7 + 13:25 13:25: Aij 34:4; Dng 6:13; Jol 2:10 + 13:26 13:26: Dan 7:13; Dng 1:7 * 13:29 13:29: ishak noi sha ro, jao pha saro hà bo; dinneai ne noi sha ro, dun pha saro sha bo. + 13:32 13:32: Mth 24:36 + 13:34 13:34: Lug 12:36-38