THAIDAS
Shii Phaul Re-è Jigigam
Yaophi
Thaidas ne Gaibran è migi rey srane hanyie yi Phaul rog Hamangkhung-aphuii blia shii bliapho nane blia rek gieng pha bran ro. Phaul è Thaidas shii jigigam zey pha ji ne Khrethe hà rai pha filiao jia hanyie aishii nongphi ai beng shii zey phro, hanyie shii thiisa Charch pha blia shii dumuii rek yi pha thoh marui. Jigi ne miigak uom pha chiang shii zey.
Igobi, Thaidas shii nowdin yi ji è Charch pha dumuii phothek shii khi-èrek pha ziig um chid, chiih-è hì ne Khrethanthek shii rai pha awie pha ziigphothek duiine arai rabo ne yao. Din ne, charch shii yoh yoh ibrogthek, Firiang, chiih-è miriang shii chiih-è (hanyie yi miliao bimi shii yua chid) chiih-è filiao bufuii, chiih-è khiaothek, shii yua pha chiang shii khi-èrek ne yua pha ji de Thaidas shii yua. Idohhè shii zeypho Thaidas shii Migipho ro ziig chiang shii yua phi pha ji zey, miigak ne liijiing rai ne chiih-è dung ne rai pha, chiih-è khiwegkho, khnaing rai pha ji, nane Charch shii che rai pha ji thoh muii bo.
Iliing shii um pha ji
Yaophi (1:1-4)
Charch pha ophisphothek (1:5-16)
Charchthek shii yoh yoh ibrog pha blia (2:1-15)
Lububo rek pha nane Phriie (3:1-11)
Jongsha (3:12-15)
1
1 Hamangkhung-aphuii ro khiao nane Isu Masi ro Guaphasamoy Phaul ro.
Gu shii ne gua ne Hamangkhung-aphuii è gua pha bran ro migi shii nong phi ne ithek shii ne gathek ro migi pha Izai shii yua pha ji shii noh yi pha thoh ge,
2 Nyie yi idang pha chai luthong ji shii rai ro. Hamangkhung-aphuii hanyie ne biidiie asi pha ji ne, gethek shii hì pha chai ne ishak jao pha ibi è sbang rek,
3 khriig ishak shii ai è ji shii awai mua shii dong phi. Jine gu shii phijong ro, chiih-è gune gethek ro ragia Hamangkhung-aphuii muyung ji è yao.
4 Gethek ro ò um pha migi shii gu zai dufuii, Thaidas shii gu hì zey.
Aphuii Hamangkhung-aphuii nane Masi Isu gethek ro ragia è na shii ne bushun nane liijiing phi bo.
Khrethe shii Thaidas ro blia
5 Jine nyieliieshii nane zab pha thawun shii Charch pha dukho bow srane ithek thuh de nyie chid pha ji mana shii khriig rek yi pha gune na shii Khrethe hà thoh marui. Gu è yao pha ji nowkhlei bo:
6 Dukhowthek ne ichiig oi pho rek chid; aine yiy jia um bie chid, chiih-è airo aniphiing migiphothek um chid chiih-è aphrai mua rone chiih-è miyao anuii pho rone hanyie de athey mua rabo.
7 Charch pha dukho nya rek dang ne Hamangkhung-aphuii ro blia pha ilkhi ro, ai ne athey phoh um chid. Ai ne wiangwe pho nane khthiie lijieg pho nane phuiithiig pho nane ichiigsow pho chiih-è bang giichak pho arey mua phro.
8 Ai ne bran shii wieho chid chiih-è nyie wie shii miie rek chid. Ai ne awai shii zud ne, giang, gang, nane isiiewie um chid.
9 Ai ne nyie mua shii migi rek mua chiih-è nyie muyua shii nuii mua pha ji shii ne chuh è khoh chid. Ji duiine ai ne gai shii izai muyua ji è lububo rek mua chiih-è gidieg pho shii ne ithek ichiig doh mua yichid.
10 Chiih-è de bajo um ba, Jewish ro giang è rey pha migipho shii, hanyie ne ithek ro awie pha khani ji è gai shii gidieg nane khinrin rek.
11 Ithek mulo rai hì ne gak chid phro, nyieliieshii ithek ne nyie ayua pha ithek muyua ji è chiih-è biwo lumuii pha bang rab ne zab pha haliingphothek shii duhug rek ro.
12-13 Hì ne Khrethan awai ro, awaithek ro chaig jia è, hanyie izai yao shii ai è yao, “Khrethanthek ne idang khlamphothek ro, awie pha ibeymuthung, nane siikhad-ajo pha sugowthek ro.” Ji pha chiang è nane ithek shii chieg giung bo, chiihphado ithek shii de chiih-è migi um ruii phro
14 chiih-è Jew phaluiithek ne akhoh sha phro chiih-è hanyie è izai shii snai pha bran è thog pha tharothamang pha muyungthek de akhoh sha phro.
15 Hanyie ne awai è awaishii igang lei ne zab awai shii igang ro; jishii hanyie yi zia nane migi arekpho, ithek ro khani nane siuthek ne zab zia ro.
16 Ithek ne yao ithek ne Hamangkhung-aphuii shii thieg ro, jishii ithek ro blia è ne aishii snai muii. Ithek ne khjaipho nane miyao shii anuiipho ro, ithek ne nyie de wie rek pha a-ò ro.