15
Yesu da piari aimbari embobo ae orobeda kopuru mamai demi​ ​ge katain doregesitera.
Edo embo nenei Judea edo nasi bajina Enteoki ainda wotedo gundo nanonameji* atopapositera, “Dabé awa imomane tamo jiugawate dá ango Moses mi aodarida sisina awa bawa. Ata awa ae gido, itomane tonembari mana bawa.” Awatedo, Paul ae Barnabas demi awamanede bemi duduno edo ge jiwae baitera. Ango edo gebé ari embomaimi Paul ae Barnabas de, edo embo nenei awamaneda doda daedo avigedo awamanemi tedogari eiwa kundo Yesu da piari aimbari embobo ae orobeda kopuru mamai de Jerusalem da itera awamaneda yai maundo vitorote sitera. Awa embo, Yesu gebé ari embomainda doregarimi awamane pietero maunsitera. Edo iji dá ainde yai Poenisia torido idegedo yai Samaria torido maunsite awamanemi nongo nongo edo God mi esiri yai eve embomai ainda yai wareregesiteri awa gebé ari nanonamejide tedo esitera. Edo nanonamejimi bino awa ingido awamane berari do yawa bajinabé edo esitera. Edo iji ainde Paul ae Barnabas de embo neneinde Jerusalem gumbero, Yesu gebé ari embomainda doregari ae piari aimbari embobo de orobeda kopuru mamai demi awamane ategesite buritera. Edo Paul ae Barnabas demi buro berari ro awamaneda toda God mi esiri awa tetero gositera.
Ata gebé ari embo nenei Parasi maneda doda awamanemi erido sitera, “Yai nei embobo tamo jiugedo Moses da Aodari awa jidogogo orote!” sitera.
Ango edo piari aimbari embobo ae orobeda kopuru mamai de gundo dada edo ge eiwa katain orote sitera. Edo iji amboda awamane ge iji riboribé baietero, Peter erido awamanede ge sisina:
“Embobo ae nanonameji de, imomane gotewa iji matu God mi kaenato toropuda ainda na avigesisina, bino dave, be natoda awa, yai nei embomaimi ingido gebé orote. Edo God mi embomainda do gido eira. Awatedo, iji ainde ainda Asisi Kotopu awamaneda yaida pipisisina dá kaenamonde pipisisina ango, God mi awamaneda yai arapa esiri gositera, imo yai nei embomai daedo ategedo burisina. Edo God wasiri kaenamonde eve edo awamanede eve ae. Ata iji ainde awamanemi Yesu da yai gebé etero, God mi awamaneda do teiesiri dave esitera. 10 Edo boroko, ro awa embo imomane God bavevi? Imomane bouga ambodanida duboda pipitewa. Bouga awa kaena ko mamono kaenatomi inono barita? 11 Ango ae! Ata kaena gebé era, God mi Badari Yesu da dave arimi kaena tonembedo eira dá ango ami awamane tonembedo eira.”
12 Edo embo jisi bajina awamane berari ge tokain takain edo Barnabas ae Paul demi kariwa neindekainde wasiri babain jiwaede awa God mi awamaneda toda yai nei embomainda yaida esisina awa udugedo tero ingitera. 13 Iji angode awamane ge tedo itae etero, James mi ge engo sisina: “God gebé ari embomai, ge nato ingiwo! 14 Simon mi kaenamonde karigesira, God nongo nongo edo tuturoda yai nei embomainda yai etega edo awamaneda doda ainda embomai topobé bain esisina awa. 15 Edo peroveta maneda ge berari ami awara eira, edo daedo ge engo matu gaiedo tari isira:
16 ‘Einda amboda, na tenda egenembedo,
David da bowa§ dudurisina awa tekago gamana.
Ainda durudo usibesibé arida awa ano dave ari,
tekago jiano eraina.
17 Ango edo embo nenei berarimi na, BADARI awa,​ ​gain edo gara,
yai nei embomai berari daedo,
avekave nanemi nato topobé orote dao sitena.
Na, BADARI ami, buro berari engo edo ena,​ ​awatedo ge eiwa tena.’ ”+
18 Edo James mi ge ango tedo sisina, “God mi ainda buro berari imo matu natopo itarida edo gundo esisina awa gari. 19 Awatedo, kotembari nato awa kaenane mana ano yai nei embomai awamanemi God da yai wareregedo era awa awamaneda do buriya aina. 20 Ata davebé awa, kaenanemi awamaneda ove gaiedo taro gara, indari ove kewaride rorou pisido era awa donode God da jisida, awatedo inainyae. Daedo viro ko ipuda ari ainyae, edo wo asimi duboda kaingari betari awa inainyae, edo ororo inainyae. 21 Aindabé, embomai iji matu edo gundo boroko awamanemi Moses da ge tari awa nasi babain berarida karigedo era. Edo Oena Apari Deguta beraride Judah embomainda benunu oroda ainda ge awa ajijigedo era, awatedo.”*
Yesu da piari aimbari embobo ae orobeda kopuru mamai demi​ ​ove yai nei gebé ari embomainde gaguritera.
22 Ango edo Yesu da piari aimbari embobo ae orobeda kopuru mamai de edo Yesu gebé ari embomainda doregari berari de daedo, awamanemi James da ge awara esitera. Edo awamaneda doda embo nenei avigedo Enteoki nasida piaro mamborote, Paul ae Barnabas de daedo sitera. Edo awamanemi Judas, ainda dao nei awa Barsabas, ae Silas de awa avigesitera. Embo tote (2) awa nanonamejida gisijijiegari. 23 Edo ove eiwa awamanemi pietero kundo gebé ari embomainda yai Enteoki nasida ainda maunsitera:
 
Nakare, Yesu da piari aimbari embobo ae orobeda kopuru mamai de nanonameji demi, Imomane yai nei embomainda nanonamejide, Enteoki nasida, edo Siria yaida edo Silisia yaida isima edo ewa awa: Ategedogogobé era.
24 Edo nakare ingera awa, embomai nenei natokare yai edo idegatara, awamaneda gemi etero imomane anana eutawa edo do itomane awa buriya eutara. Awamanemi site siutara awa, ‘Imomane awa tamo jiugawate,’ edo ‘Aodari awa ambo ambo awate,’ siutara. Awarata, nakare awamanede ge ango awa imondemane torote tae. 25 Ango edo, nanekare berari kotembari da (1) edo doregedo awara edo embo nenei avigedo itomane yaida piaro mamborote etera, natokare dubobari otatawo Barnabas ae Paul de daedo. 26 Awamane tote (2)mi Badari Yesu Keriso da daoda buro edo maundo betari tao edo esitera. 27 Edo daedo, nakare Judas ae Silas de avigedo itomane yaida pietero mambera. Awamanemi ge dá ango ove gaiarida awa taro gawa. 28 Edo Asisi Kotopu ae namondekaremi awara tetera awa, nakare mana imondemane bouga bajinabé piara, ata bouga tega inono eiwawa akuta: 29 Imomane indari ove kewaride piedo era awa inainyae, edo ororo inainyae, edo wo asimi duboda kaingari betari awa inainyae, edo viro ko ipuda ari ainyae. Imomane roviravi eiwa daginegawa gido awa buro dave awa. Imomane dave edo isiwo!
 
30 Awatedo, awamane pietero wotedo maundo Enteoki nasida idegesitera. Edo gebé ari embomai yai ainda awa kundo dada edo ove awa pipisitera. 31 Ango edo awamanemi ove awa ajijigedo gido kondade ari ge dave ami esiri dubo yawa bajinabé esitera. 32 Edo Judas ae Silas de, awamane akuta awa daedo peroveta maneda buro edo esitera. Awatedo, awamanemi kondade ari ge dave jiwaemi nanonamejide tetero awamaneda gebé ari babojisina. 33 Edo amboda awamane yai ainda sima ero jiriri nanonamejimi awamanede sitera, “Yesu da piari aimbari embobode tewo gore, ‘Badari da béga itomane yaida itare!’ ” Ango tedo awamane tekago Jerusalem da piaro mamborote pipisitera. 34 Awarata, Silas yai ainda itari jipapa esisina. 35 Edo Paul ae Barnabas de matawa Enteoki ainda sima esitera. Edo aedade embo jiwae neneinde daedo ami Badari da ge embomai yai ainda awa atopasido karigedo esitera.
Paul ae Barnabas demi ge baiedo evekara esitera.
36 Edo deguta nenei itae esiri ainda amboda, Paul mi Barnabas de sisina, “Puyo inge egenembedo nasi babain berarida ingena Badari da ge matu karigesitera ainda tekago mambore. Edo ingenato nanonameji yai ainda awa etega eite, awamane buro nongo eite iteri awa gore.” 37 Ango edo Barnabas mi John Mark awa kundo awamanede daedo mamain jipapa esisina. 38 Ata Paul mi arapada karigedo sisina, embo matu yai Pampilia ainda awamane dodo taigedo maunsisina, awa kundo daedo buroda mamainyae sisina. 39 Edo embo tote (2) ge bajinabé baiedo buro dada ainyae tedo evekara esitera. Ango edo Barnabas un made Mark kundo dodo gatega Saipurasi da tepusina, 40 ata Paul mi Silas geredo burisina. Edo nanonameji Enteoki ainda ami, God mi Paul awa sima ari dave arate benunu tetero idegedo maunsisina. 41 Edo imo maundo yai Siria edo yai Silisia da torido idegedo eite ainda Yesu gebé ari embomainda doregari evekara awa kondade eiuri awamaneda gebé ari Badari da yaida awa bajido esisina.
* 15:1 nanonameji da moka einda awa Yesu da gebé ari embo eutu. 15:10 bouga da moka awa aodari berari God mi Judah embomainda yai pipisisina. Embo da aimi God da aodari berari kera ari tao ae. Awatedo, aodarida bouga ae God da begá de embo enembo berarida yai isira. Awarata, Yesu gundo God da aodari berari kera edo kaenato jimbo bebegae awa embo oregada besisina. Edo ainda betari amboda, deguta tamonde (3) ainde, imo tekago erorisina. Awatedo, embo da aimi ainda jimbo bebegae dodo Yesu da yai wareregedo gebé aina, God mi embo awa tonemaina (John 3:16; Galesia 2:15-16; 3:10-14). 15:14 Simon awa Peter da dao nei (Iwata Ari 15:7 giwo!). § 15:16 bowa awa kariwa ge. Ainda moka awa Daotari David da gisijiari. + 15:17 Amos 9:11-12 * 15:21 Ove Kotopu da atopatari nenei kotembedo era awa, iji ounde, edo Judah embomai aemi aodari angogoda gari nei gain jipapa edo esitera, awamane Judah embomainda benunu oroda inono maundo gido esitera. Aindabé awa, James ge ango sisina. 15:34 Guriki da ove gaiari indewae akuta gano eiwa buritera. 15:41 Silas daedo Paul de maunsisina (Iwata Ari 16:19, 25, 29 giwo!).