4
जीव-आत्मा काजे पारखु
1 ए लाटेक्ला साथी, आखी भातीन आत्मान भुरसु मां करु, बाकुन आत्मा काजे पारखु, की चे भगवान भीणी सी छे की नी हय; काहाकी बेसका लुच्चा अघी सी आवणे वाळी बात देखाड़न्या ईनी कळी मां नीकळीन आय गुयला छे।
2 भगवानेन आत्मा काजे तुहुं हीनी रीत सी उळखी लेसु, की जी कुय आत्मा मान लेय, की ईसु मसी माणसेन पुर्यु बणीन धरती पर आवलु छे, चु भगवान भीणी सी छे।
3 ने जी कुय आत्मा ईसु काजे नी माने, ची भगवान भीणी सी नी हय; जी मसीन वीरुदी आत्मा छे; जेरी बात वीच्यार तुहुं सामळी लेदला छे, की चु आवणे वाळु छे ने हय बी जागा मां छे।
4 ए लाटेक्ला पुर्या, तुहुं भगवानेन छे ने हीनु आत्मा काजे जीती गुयला छे; काहाकी जु तुंद्रे मां छे, चु कळी पर मटु छे।
5 झुटी वात सीकाड़न्या, जे माणसे ईनी कळी मायन छे, ने अळी जे भगवानेन वीरुद करन्या ईनी कळीन वीच्यारेन तसा वात करे ने सीकाड़े। ने ईनी कळीन वीच्यारेम रहण्या माणसे हींद्री झुटी वाट सामळीन माने।
6 बाकुन हामु ते भगवानेन नेवताळा छे। हेरेसी जतरा बी भगवान काजे जाणे, चे हामरी वात सामळी लेसे; ने मान लेसे, ने जे भगवान काजे बी नी जाणे तीनुक हामरी वात उळखाये बी नी ने मानाये बी नी। हीनी रीती सी आपणु भगवानेन चुखला जीव-आत्मा काजे ने माणसेक भंगलाड़ने वाळी आत्मा काजे पारखीन उळखी लेसु।
भगवान परम छे
7 ए लाटेक्ला साथी, आपणु एक दीसरा सी परम राखु; काहाकी परम भगवान सी छे ने जु कुय परम करे, चु भगवान सी पयदा हयु, ने भगवान काजे जाणु।
8 जु परम नी राखे चु भगवान काजे नी जाणे, काहाकी भगवान परम छे।
9 भगवान हामरे पर असु परम राख्यु, चु हेरेसी उजेंतो हयो की भगवान आपणा एक खुळ्या पुर्या काजे जागा मां मकेल्लु छे की हामु हेरे साहरे जीवाय जीवसु।
10 भगवानेन परमेन बदले, आपणु बी भगवान काजे परम करजे बाकुन तेबी परम करनेन खरलु दाखलु आपणु जु परम नी हय, खरलु परम असु उजेंतु हयु की भगवान आपसा पुर्या काजे आपणा पापेन माफी वाटे मरीन बादा छुटणे करीन ईनी कळीम मकली देदु।
11 ए मारा लाटेक्ला साथी, जत्यार भगवान हामरे सी असु परम कर्यु, ती हामुक बी एक दीसरा सी परम करनु चाहजे।
12 भगवान काजे कदी कुय नी देख्या, कदी हामु एक दीसरा सी परम राखसुन, ती भगवान हामरे मां बणीन रवे; ने हेरु परम हामरे मां पुरु हवे।
13 हव भगवान आपसा चुखला जीव-आत्मा काजे आपणा जीवेम वसणे करीन मकली देदु, ने भगवानेन जु चुखलु जीव-आत्मा, आपणेम रय्न आपणा परमेक पाक्कु करनेन काम करने बाजी रयु। ईना कामेन साहरे आपणुक ईनी वातेन सबुत जड़े की, भगवान आपणे मां रवे, ने आपणु भगवान मां रवजे।
14 ने हामु देखी बी लेदा ने गवाय देजे की बास पुर्या काजे कळीन छुटकारु करने करीन मकल्यु।
15 जु कुय ज्य मानी लेय, की ईसु भगवानेन पुर्यु छे भगवान हेरेमां बणीन रवे, ने चु भगवान मां।
16 ने ज्य परम भगवान हामरे सी राखे; हीनाक हामु जाणी गुया, ने हामुक हेरे पर भुरसु छे।
भगवान परम छे; जे परम मां बणीन रवे चु भगवान मां बणीन रवे; ने भगवान हेरेमां बणीन रवे।
17 हेरसी परम हामरे मां पुरो हयो, की हामु नीयावेन दाहड़े हिम्मत राखजे; काहाकी जसु चु छे, असोत कळी मां बी छे। ने मसीन जीवनेन तसु छे।
18 परम मां डर नी हय, बाकुन पुरु हवलु परम धाक काजे छेटु कर देय, काहाकी बीहणेन नातो डंड सी हवे, ने जु बीही जाय, चु परम मां पुरु नी हवे।
19 हामु हेरसी परम करजे, काहाकी पेहल भगवान हामरे सी परम कर्यु।
20 कदी कुय कवे, “मे भगवान सी परम राखो,” ने आपणे भायस सी कुहराय राख; ती चु लुच्चु छे; काहाकी जु आपणे सी, तीनाक चु देख्यु, चु परम नी राखे, ती चु भगवान सी बी तीनाक हयु नी देख्यु, परम नी राख सके।
21 ने हेरसी हामुक ज्य हुकुम जड़्यु, की जु कुय आपणा भगवान सी परम राखे, चु आपणा भायस सी बी परम राखे।