Finik so Deiw ka kel Kakamin em Weng te.
12
(12:1–15:13)
Kun so Kal so Atin Kuw eso Fewtokoko, Bin em Weng te.
Nem nakunum kumel kunum waneng yutaka! Nu Sunbin-Got em nulo kukuyemkabe ibolow folok kukuw be fein atemkabuluw kasike kame, yu nem weng kalakati kiliko, gelewemoliwka! Yu Sunbin-Got em wiin fian daolewkemin kukuw gelewbomi, yukalem kal so, anggil so, finik so bin so, alik alik be atin kuw elo kuw duleweko, akalem wiin so amkoyemse kunum waneng keko, boliwka! Bomeliwi, e yulo yetemeko, kalfong fian keyemoke te.* Keko beli, yu kawin kaleem kawtiw biim kukuw emdiw kanelinba keko, amen amen kuw kakamoliwka! Yu Sunbin-Got em ibolow fukunin beelo kilele dolon kemoliwka! Kemiw tewe, e ki keko, em kitil dim ete yom wa keyemkabe ibolow fukunin be famdes keyemei, yom fukunin e kikis keyemei, yu Sunbin-Got em ibolow ken so, mesesem eisneng sen so banim so, Sunbin-Got em kiin dim e kilinin eisneng so, beem dim ete kuw ibolow fukunkabiliw te.
Yu kililina! Sunbin-Got e nelo ibolow folok kenemeko, finik so aluwbamin dunemse kasike kame, ne beem mongom ete alik alik yulo weng temtem weng mak bokoyemite: Yu kanelom yukalem wiin e emisik keleweko, fian katiw dao kemokoliw te! Kate, yu kilele ibolow fukuneko, Sunbin-Got em yulo amen kuw amen kuw duyemse fein ibolow be yukalem ete kilele diw atemeko, ibolow felit angeko, boliwka!*
Yu kal dim kaleem fakam weng kale kililoliwka! Nukalem kal dim e makmak kekabe kate, anggil beem anung anung be banso keko, beem aluwbamin bakati amen kuw amen kuw banso kekabe te.* Beemdiw, Kulais e kunum waneng banban nulo kuluko, kal makmak em anung anung keyemkabe kasike kame, mali kawtiw yu mali iso kilele fewtokoko, bomi, kanelom mali ilo “Koyemuma!”, yangokoliw te! 6-8 Keko beli, Sunbin-Got e nulo ibolow folok keyemeko, akalem ibolow kuw geleweko, nulo aluwbamin mak amen kuw amen kuw duyemse te. Nulo amen kuw amen kuw duyemkabe aluwbamin be kanekote:
Mak e Sunbin-Got em bontem dim bakamin e,
mak e mali kunum waneng ilo dakayemin e,
mak e Sunbin-Got em kukuyemkabe weng kilele kaleyemin e,
mak e mali kawtiw ilum fian so kebiliw kawtiw im gengbul kal be dokoyemiwi, im ibolow silel angin kebin e,
mak e kamok keko, yetebomin em aluwbamin ete te.
Yu mali aluwbamin be kuliw tewe, yu kitil kuw keko, aluwbamoliwka! Feinka! Sunbin-Got e yulo
mesesem mesesem eisneng sukum kebiliw kawtiw ilo dokoyemin beem aluwbamin be duyeme tewe, yu kitil keko, ilo banban dukayemboliwka!
Beemdiw, e yulo
kinkin ibolow duyemin beem aluwbamin be duyeme tewe, yu kalfong so keko, mali ilo dokoyem kemoliwka!*
Ibolow Mutuk Fian em Dukayemin Kukuw em Weng te.
Yu kanelom kal dim kuw ibolow mutuk fian dukayembokoliw te!
Yu sili sili kukuw beelo ibolow kaim alel kelewsomi, kukuw ken dim kuw fewtokoko, boliwka!
10 Yu Sunbin-Got em angin kekabiliw kasike, yu mali yom mutuk biliw kunum waneng ilo ibolow mutuk fian kuw dukayemboliwka!
Dukayemsomi, yu mali im kiin dim e mali fein ibolow so kunum waneng im wiin e daoko, ilo wangweng keyemboliwka!*
11 Yu kanelom gal kemokoliw te! Kate, yu diwkuw diwkuw Kamok Fian em aluwbamin be aluwbamoliwka!
Kebomeliwi, Sunbin-Got em aluwbamin kemin beem dulum elote ibolow danong danong angeko, kilele aluwbamoliwka!
12 Yu diwkuw diwkuw kalfong so kesomi, Sunbin-Got em yulo dokoyemoke ding fenboliwka!
Sakik mak tele tewe, yu kalaing kuw keko, ibolow falit angeko, boliwka!
Yu kanelom Sunbin-Got eso diwkuw diwkuw weng bakamin beem dulum elo gal keko, beit kemokoliw te!*
13 Sunbin-Got em akalem wiin so amkose angin i mesesem mak sukum kebiw tewe, yu ilo kilele dakayemboliwka!
Kokow kawtiw mak teliw tewe, yu ilo kalfongyemeko, yukalem am elo yemde unemoliwka!*
14 Mali kawtiw i yulo yenomin kemiw tewe, yu ilo kanelom yakok yan weng wa mak keyembokoliw te!
Kate, ilo bamki so weng kuw dukayemboliwka!*
15 Mali kakat kebiliw kunum waneng iso makuw kakateko, boliwka!
Kate, mali amebiliw kunum waneng iso makuw amneng foluw boliwka!
16 Ibolow “Fein!”, dangbiliw yanggimel yu ibolow ki makmak keko, boliwka!
Yu kanelom yukalem wiin ete kuw dao kemokoliw te!
Kate, wiin banim baluw kawtiw iso makuw wanin waneko, kakamoliwka!
Yu kanelom “Nu kal fian so kawtiw nute te!”, angeko, ibolow fukunemokoliw te!*
17 Yu kanelom yulo wa keyemiw kawtiw ilo akati wa keyembokoliw te!
Kate, diwkuw diwkuw kawtiw im kiin dim e ken kiol kuw kukuw beem dulum elote kuw ibolow fukuneko, keboliwka!*
18 Yukalem ete kitil keko, bukeko, mali kunum waneng iso ibolow menew kemin em deiw ka kel kakamoliwka!
19 Nakunum kumel kunum waneng yutaka! Mali kawtiw i yulo wa keyemiw tewe, yu kanelom ilo im kaneyemsiliw beem yan wa be dukayembokoliw te! Kate, yu Sunbin-Got em kaisuw ibolow elo dolon kelewboliwka! Nimtew angom? E fut tem boko, bokolomele:
“Nakalem ete kuw kaneyemsiliw be diweko, kiol kuw yan wa mak duyemoki te!”,
angse kale.* 20 Angeko, iti bokolomele:
“Yulo maka keyemkabiliw kawtiw i yom am teleko, wanin tew so, ok tew so keliw tewe,
yu ibolow folok keyemeko, yemen so, ok so, yemen kemoliwka!
Yemeniwi, i ikalem yulo kaneyemsiliw kukuw be ibolow fukuneko, inkal fian kulokoliw kasike.”,
angse kale.*
21 Feinka! Yu kanelom mali im yulo wa keyembiliw kukuw be yukalem kukuw wa so kasi kolew kemokoliw te!
Kate, yu kitil kuw moko, kukuw ken banso banso mak keyemoliwka!
Kaneliw tewe, yu beem dulum elote im kaneyemsiliw kukuw wa be de mit da kolew kemiw bakate.
Kak Keko, Yetebin Kawtiw im Afak Kakamin em Weng te.
* 12:1 Ulom 6:11,13; 1 Fita 2:5 * 12:3 1 Kolin 12:11; Efesus 4:7 * 12:4 1 Kolin 12:12,27 * 12:6-8 1 Kolin 12:4-11; 1 Fita 4:10-11 * 12:10 1 Fita 1:22 * 12:12 1 Tesalonaika 5:16-18 * 12:13 Kibulu 13:2 * 12:14 Matyu 5:44; 1 Kolin 4:12 * 12:16 Ken Abin 3:7 * 12:17 1 Tesalonaika 5:15 * 12:19 Sawa Weng 32:35; Matyu 5:39 * 12:20 Ken Abin 25:21-22; Matyu 5:44