4
Boas em Kese Sang te.
1 Wangsu ding dim be, Boas e Betelekem abiw mutuk fian kalo unse kale. Ka uneko, telesomelei, e abiw mutuk fian beem wati kitil nam em abisom fian dim ka kel teinse kale. Em teinse ding dim be, Ilut um emisik kalun kayak telesomelei, Boas e elo gaalewsomi, bokolewomele: “Nakunum kutaka! Ku kalak teina o!”, dangse kale. Dangei, e teleko, fein em mit mewso teinse kale.
2 Teinei, Boas e abiw beem kamok kunum king kel mak ikati gaayemsomelei, i wensaniwi, alik alik biim kiin dim kel kalun kayak beelo bokolewomele:
3 “Kutaka! Ku kame nem bokokemoki weng kale kilele kilila! Nukalem kaim atuk Elimelek em kalun Noomi u Moaw aneng fian iti kolew teleko, ukalem kawin be mali iso wenomin ibolow kebu te.
4 Kasike kame ku alik alik num kiin dim e kilele yan weng mak bokonema! Ku buum mesesem mesesem alik alik be wenomin ibolow kebelew, meni ba? Ku komisik kesomi, mesesem mesesem beelo wenomin kunum kebelew kate, nesik kom ibik elote wenomin kunum kebi kasike. Ku nukalem am dim kunum waneng kaliso, king kel kamok kaliso, alik alik num kiin dim e fitew kaim dim kuw wenomin weng mak bokoyema!”, dangse kale. Dangei, emisik kalun kayak be yan weng bokolewomele: “Kenka! Ne um kawin be wenoki te.”, dangse kale.
5 Dangeko, Boas e iti weng mak so mak bokolewomele: “Ku Noomi so, Moaw aneng fian elote talsu waneng Ilut so, yat biim kawin be wenew tewe, ku kalun Ilut bukati wamdusomi, um kuanse imok beem dulum elo aul mak dukulokolew kasike, beem wiin e nam banime te! Kasike, yemkal yom aul mak dukulokoliw ding kabalak e, aul be kom kuanse kaim atuk Elimelek beem kawin kuluko, akalem dukulin min atew keloke te.”, dangse kale.
6 Dangei, emisik kalun kayak be yan weng bokolewomele: “Yake! Ibo! Ne ulo wamduko, iti aul kaili tewe, nem kuanoki ding kabalak e, nakalem muluwel i nem fan em kulomin e sukum kelokoliw te. Feinka! Ne kawin be nam weni te. Boas, kukalem ete wena!”, dangse kale.
7-8 Dangse ki akate, akalem yan aom guluko, Boas elo dulewse kale. (Yan aom gulamin be Isalael kawtiw im suaem kukuw ete te. Kanemaliw beem mongom ete kawtiw i kitakamin mak beem weng e ki kelewsiliw kale. Nimin kawtiw ite mak mesesem eisneng mak weneko, beem yan so, ikalem yan aom so, mali ilo duyemiw tewe, biim wesiliw beem dulum elote weng ki kesomi, weng makso mak nam bakamiw te.)
9-10 Beli, Boas e kunum alik alik ka biliw kunum biilo bokoyemomele: “Yutaka! Kunum waneng kaliim kiin dim so, kamok kaliim kiin dim so, alik alik yom kiin dim e nukalem wenomin weng be kame ki kelewsomi, bokoluw bakate. Yelimel Elimelek so, akalem muluwel alew Kilion so, Malon so, kuansiliw kunum biim mesesem eisneng alik alik be ne kame weneko, Noomi ulo beem yan fein duumoki te. Malon em kalun Moaw waneng Ilut bukati wamdoki kasike, nakalem kaim atuk Elimelek em wiin bakati nam banime te. Kasike, em angin nuso, abiw mutuk fian kaleem kunum waneng yuso, alik alik nu ki keko, kuanse kunum beem wiin nam akokow kemuw te. Kame yu fein kiliko, kiin so atemeko, kal keloliwka!”, yangse kale.
11 Yangeko, king kel kamok biso, kunum waneng ka biliw biso, alik alik i makuw bokolewomeliw: “No, feinka! Kame, nu kanelew eisneng be kilele kiin so atemuw te! Yawe e kom am toloku waneng Ilut buulo bamki fian so keumbe te! E Ilut kalu Isalael kawtiw num waneng mongom Elesel so Elea so alew bikatetew keume te! Feinka! Efalata aneng kale so, Betelekem abiw mutuk fian kale so, Yawe e kom wiin e fian kuw kekemoke te!
12 Kekemsomi, kom kalel buulo bamki so keumoke kasike, Ilut u aul banban dukukemui, kom muluwel dow i Suda so, em kuanse min kalel Tamal uso, alew biim aul dukusiliw Feles beem muluwel dow emdiw kelokoliw te!”, dangsiliw kale.
13 Kaneko beli, Boas e fein Ilut ulo wamduse kale. Wamdubelei, deiw mak ding mak kabalak e, Yawe e Ilut ulo bamki so keumei, u fein aul kumun kesomelui, fe e, kunum aul mak dukusu kale.
14 Aul dukulu ding be, waneng min mak teleko, awkok Noomi ulo bokoumomeliw: “Yawe em wiin fian daoluma! Nimtew angom? E kalun kayak mak dukemse kasike. Fein! Boas em wiin e Isalael kawtiw num dim kel fian keloke tako!
15 Kame kuw, kom min kalel Ilut u kunum aul mak dukukembu kasike! Kom fasel kelew ding dim e, aul be kulo kilele kekemboke te.”, wangsiliw kale. Wangeko, iti weng mak so mak bokoumomeliw: “Kukalem ete muluwel ben kel mak dukuselew tewe, alik alik bi bongguko, kulo kilele kekemeko, ibolow mutuk fian dukemeko, kom ibolow elo kom min kalel Ilut buumdiw nam kekemiw te.”, wangsiliw kale.
16 Wangiwi, Noomi aul be kuluko, um aul atew keleweko, em atebin waneng kesu kale.
17 Keko beli, i bokoumomeliw: “Noomi kunum aul mak dukulu kai!”, angeko, aul beem wiin e “Obet”, dangsiliw kale.
Boas em Muluwel Dow im Sang te.
Beli, Ilut so Boas so yemkal bi Obet dukusiliw kale. Dukuliwi, Obet e Yesi em alew kese kale. Yesi e Isalael kawtiw im emisik kamok fian Debit beem alew kese kale.
18 Kale kel kunum mongom Beles beem dukudak dukudak teleko, Debit em dim talse muluwel dow im sang te:
Beles e Keselon em alew te.
19 Keselon e Alam em alew te.
Alam e Aminadaw em alew te.
20 Aminadaw e Nakson em alew te.
Nakson e Salmon em alew te.
21 Salmon e Boas em alew te.
Boas e Obet em alew te.
22 Obet e Yesi em alew te.
Yesi e Debit em alew kese kale.