12
Waneng so Sokyan Okgung Kayak Sel so im Sang te.
1 Atebi ding bakate, bemikel kaneko fasel sang banim deiw mak abiil tikin katem elote kelei, ne atemsi te. Kaneko eisneng be kanekote: Waneng mak ataan kak sel elo ilim atew minggiko, bomi, um yan e kayow tikin dim dukubomi, kalun kel fial e ukalem kak dim kak balam atew minggiko, bului, ne watemsi te.
2 Waneng bu aul dukulomin wemei, betbet fian sel kuluko, gaanbomi, olbului, ne watemsi te.
3 Kebu ding bakate, bemikel kaneko fasel sang banim deiw mak abiil tikin katem elote iti mak so kelei, ne atemomete: Sokyan okgung kayak sel mak em kal e kaimfing olol nam kelei, beem kak e ben kel kelei, em gesen e king kel kese te. Em kak balam ben kel be kamok fian wiin so kunum im minggikabiliw kak balam emdiw keko, minggise te.
4 Em mongom tiakim e bitit betet angeko, fial alik alik mongom alemsal kelei, mongom makmak e atin kuw fitatin kawin dim elo da koyemei, ne atemsi te. Atebi dim bakate, sokyan okgung kayak sel be aul dukulomin kis kebu waneng buum mit mewso moko, ulo kilele watemsomi, um dukuloku aul beelo fongate akate kunilomin ibolow kebelei, ne atemsi te.
5 Atemsi ding bakate, waneng bu kunum aul mak dukusu te. Abiil fe kawin fe alik alik angom biliw kawtiw bi kunum aul beem afak kuw keliwi, e ain kaung aluweko, ilo yetebelei, ne yetemsi te. Yetebi dim bakate, yemdakamin finik i aul beelo galuko, Sunbin-Got akalem teinkemin abin ayem teinalakabe dim elo debele uniwi, ne yetemsi te.
6 Debele uniwi, waneng bukati fon uneko, Sunbin-Got akalem memen keumse aneng kawtiw banim dim kalo uneko, bului, ka kel nanbowko, wanin wanbomelui, tiak ding 1'260 ding banimei, ne watemsi te.
7 Beem ding dim bakate, abiil tikin katem kel ganbin fian mak gansiliw te. Yemdakamin finik Maikel so akalem angin so ikal keliwi, sokyan okgung kayak so em angin iso ikal keliw keko, ganbiliwi, ne yetemsi te.
8-9 Keko, Maikel em angin ite imel kuw kitil keko, sokyan okgung kayak fian sel so, akalem angin iso makuw abiil tikin elote yenbakalasomi, kawin dim kaleelo mit da koyemiwi, ne yetemsi te. Sokyan okgung kayak sel be sua kel kawtiw alik alik im ken abin keduku koyemeko, alik alik biim ibolow fukunin e teifulu koyemse sokyan bete te. Em wiin mak e Seten-Ataanim ete te. Mak e “Kawtiw ilo Wa Ibolow Silikmoyemkabe Finik” ete te.
10 Keko beli, abiil tikin elote weng fian mak gaaneko, bokolomele:
“Feinka! Sunbin-Got e num sunsun finik so bin ding duyemoke ding kame fein fitew kele te.
Kesomi, akalem kitil so auk so, akalem gawman ding so, bakati fitew kele te.
Kesomi, akalem Mesaya em wiin so kitil so akati fein fitew kele te.
Nimtew angom? Taw banim, kutiliw banim, diwkuw Sunbin-Got em kiin dim e numdiw fein ibolow so kakabiliw nakunum kumel ilo geeyemse sokyan sel be abiil tikin elote anbakalako, kulaliwi, e kawin dim kalelo talse kasike.
11 Nakunum kumel bi ikalem finik so bin be ibolow fukuninba kesomi, mali im ilo “Yenuwi, yu kuanina!”, yangbiliw weng beem awan be i finganinba kebiliw te.
I Siwsiw Men beem kaim em kitil dim so, ikalem kitil kuw keko, kalan weng bakabiliw beem kitil so, beem kitil dim ete imel kuw keko, Seten-Ataanim elo de mit da kolewsiliw te.
12 Kasike, abiil so, em tikin biliw so, alik alik yu kakatemoliwka!
Kate, kawin so, okmun fian so, alik alik biim biliw yutaka! Yu kal anggil ilum fian mak kulomin mewso kebiliw kasike, yu kilelbi boliwka!
Nimtew angom? Seten-Ataanim e abiil tikin elote kolewsomi, kawin dim kale teleko, ‘Sukum ding kuw kele kai!’, angeko, kaisuw fian kele kasike.”,
angei, ne weng be kilisi te.
13 Keko beli, ne atemite: Sokyan okgung kayak sel be “I nelo kawin da konemsiliw kai!”, angesomelei, e uneko, kunum aul dukusu waneng buulo wanggeleweko, unbelei, ne atemsi te.
14 Kate, Sunbin-Got e waneng buulo bukol bel alew mak duumei, u sokayan okgung kayak sel beem be dim be koleweko, bile uneko, Sunbin-Got em ukalem memen keumse kawtiw banim dim aneng kalo unui, ne watemsi te. Uneko, ka kel nanbowko, wanin wanbomelui, tiak ding alemsal itol kelei, gung kel kayow alei, ne watemsi te.
15 Watebi ding bakate, sokyan okgung kayak sel be ok bontem munggusomi, “Ok be ulo wenoka!”, angeko, busel daume ok be fian ok telemin ok sel atew kese te.
16 Kate, kawin esik bontem busuko, ok be wanei, waneng buulo dokoumei, ne atemsi te.
17 Kanese kasike, sokyan okgung kayak sel be waneng ulo kaisuw fian mak keumsomi, um angin Sunbin-Got em sawa weng afak gelewbomi, Yesus em sang bakayemkabiliw kunum waneng mali iso genen unei, ne atemsi te.
18 Atebi ding bakate, ne atemomete: Sokyan okgung kayak sel be okmun beleng kel mobelei, ne atemsi te.