4
1 Keko beli, ne ibik ete atemite: Abiil tikin kel abisom mak busule atemii, fongket weng mak atew gaanei, ne em weng be kilisilii, sua kel emisik ding bokonemse weng be iti bokonemomele: “Ku matem telew kano, ne kulo kaneloke eisneng be kukukemoki te.”, nangse te.
2 Nangbe dim bakate, fongate akate Sunbin-Finik e nelo kiinbel nemei, ne atemite:
Abiil tikin kel be teinkemin abin ayem mak belei, Kamokim mak em dim teinbelei, ne atemsi te.
3 Atemsi kamokim beem kal anggil dong alik alik be dakalan dong atew filik falak kebelei, tum kitil nam mak beem dong e gawal atew ailsomi, teinkemin abin ayem beelo folgok mutuk da kolewbelei, ne atemsi te.
4 Atebi ding bakate, 24 kak yetebin kunum mak i Kamokim beem teinkemin abin ayem beelo falal mutuk da kolewbiliwi, ne yetemsi te. Yetemsi kak kunum biim kak dim e kamokim biilo wiin so duyemkabe gol so kaisiliw kak balam mak amen amen kuw minggisomi, biliwi, ne yetemsi te.
5 Yetemsi ding bakate, ailbin dong bamneng dong atew Kamokim beem teinkemin abin ayem beem dulum elote talfut keko, kiman fian bikininsomelei, Sunbin-Got em ben kel finik yongom dong atew moko, ailbiliwi, ne yetemsi te.
6 Yetemsi ding kabalak e, ne Kamokim beem teinkemin abin ayem beem mumul dulum elote okmun fian abiil kul kais nam ok takak atew mak belei, ne atemsi te.
Atemsi ding bakate, beemikel ketket teben kel kilke dukuse finik so biliw eisneng mak biim kiin e ibik so, ololo so keko, kiin banban kebomi, Kamokim beem teinkamin abin ayem folgok mutuk da kolewbeliwi, ne yetemsi te.
7 Ketket teben kel biliw yetemsi eisneng biim mak e alaion atew te. Mak e, bulmakao atew te. Mak e, kawtiw num kiinguen atew te. Fefe e, awon bukol sel bel so bileko, kakamin tew kebelei, ne atemsi te.
8 Nem atemsi ding dim bakate, ne yetemomete: Ketket teben finik so biliw eisneng bi gung kel bel aliw min kebiliwi, ne yetemsi te. Biim bel dim afak so, tikin so be kiin banban kebiliwi, ne yetemsi te. I bel so kakabomi, taw banim kutiliw banim, diwkuw diwkuw Sunbin-Got em wiin fian daoleweko, bokolewomeliw:
“Komikel amen kuw keko, tokotoko, wangweng keko,
emisik auk so kitil Sunbin-Got kutaka!
Kute kuw sua sua kel akal, kame akal, ibik akal diwkuw diwkuw bokolew te.”,
dangbiliwi, ne yetemsi te.
9 Finik so biliw eisneng biim teinkemin abin ayem dim kel teinbe Kamokim fian beem wiin fian daoleweko, “Weso! Seyo! Kute kuw sunsun alakabe Kamokim fian kute te. Kute kuw wiin so auk so Kamok Fian ke alakabelew te!”, angakabiliw ding dim e,
10 24 kel kak yetebiliw kunum i Kamok fian teinkemin abin ayem teinbe Kamok beem mit mewso katin bukbuk angeko, em wiin daoleweko, ikalem kak balam wiin so be em kiin dim kel gulok dukuliwi, ne yetemsi te.
11 Yetemsomi, im weng e kililite:
“Num Kamok Fian Sunbin-Got kutaka! Kute kuw finik so biliw alik alik ilo bakiyemeko, katem ke alakabelew Sunbin-Got kute kuw te.
Kasike, kute ki keko, alik alik angom bi kom wiin ete kuw daokemsomi, ‘Ku auk so kitil wiin fian so Sunbin-Got kutaka!’, kangboliwka!
Nimtew angom? Kukalem ete mesesem alik alik angom bi talfut keyemeko, kai koyemselew kasike.
Ku kukalem ibolow ete kuw geleweko, kilkeselew alik alik bakati kilele yetebomelewi, dokoyemkabelew te.”,
angbiliwi, ne yetemsi te.