2
Bongguko, Sunbin-Got em Wiin Daolew Kemin em Kukuw te.
1 Nem nakunum Timoti kutaka! Emisik kukuyemin eisneng e kanekote: Ku kunum waneng alik alik im ibolow daoyemeko, kitil keyemin weng mak bokoyemomelew: “Yu kitil keko, alik alik kawtiw im dulum elote Sunbin-Got eso weng bokolew kebomi, ‘Ku ilo dokoyemew kano, im sakik ilum be banimoka!’, dangesomi, Sunbin-Got elo ‘Weso! Seyo!’, dangboliwka!
2 Dangomi, aneng aneng angom im kamokim so, wiin so kawtiw so, im dulum akal Sunbin-Got eso weng bakamoliwka! Keko beli, alik alik nu ken teinbin kuluko, ibolow menew so kulu teinsomi, Sunbin-Got em ibolow fukunin be fein ki kelewbomi, kawtiw alik alik im kiin dim akati kiol kuw kakamoluwka!”, yangolewka!
3 Kaneko beli, yu beemdiw keko, Sunbin-Got eso weng bakamiw tewe, yu kawin dim kaleem kunum waneng num kuankemin deiw bul gewsi belei, okileweko, akalem mit finik so deiw mo koyemse Sunbin-Got em kiin dim e kiol kuw kukuw keliwi, e kalfongyemoke te.
4 Nimtew angom? Sunbin-Got e ibolow fukunomele: “Kunum waneng alik alik ilo dokoyemeko, im kuankemin deiw bul gewsi belei, okileweko, nakalem mit finik so deiw mo koyemii, i fein em dem be kilele atemeko, kal kelokoliw te!”, angakabe kasike.
5 Fein em dem be kanekote:
Sunbin-Got e makmak ete kuw te.
Sunbin-Got so, nuso, watokoyemse kunum akal makmak ete kuw te.
Watokoyemse kunum be kal so kun so kese kunum Kulais Yesus ete kale.
6 Yesus be alik alik num sili sili nam kukuw beem yan wa kulusomi, yan beelo banim kelomin beem dulum elote kuanse te.
Sunbin-Got em “Kame kaneloke!”, angse ding kabalak e, kanebe weng kal be kawin kaleem kawtiw num dim dukulei, e fein num kiin dim fitewse kale.
7 Fitewei, Sunbin-Got esik nelo akalem wiin so amkoko, kalan kunum kenemeko, “Nem weng bakayem tem bakayem tem de una!”, nangeko, namdase te. Ku kilele kilila! Nem weng bokokemi weng be dasuw ba, fein weng te! E nelo namdase kasike, ne fein uneko, Isalael kawtiw im ibik biliw kunum waneng ilo fein angbin ibolow so, fein em dem so, kukuyemin fian be kukuyemkakawkabi te.
8 Kaneko kasike, nem ibolow fian e kanekote: Yom aneng aneng angom bongguliw dim e, kunum i kaisuw kukuw so, weng dumin kukuw so, kukuw be atin kuw koleweko, kiol kuw kukuw kebiliw teing be daoko, Sunbin-Got eso weng bakamoliwka!
9 Waneng im dulum akal nem ibolow fian e kanekote: I kiol kuw kukuw gelewko, kilele minggimoliwka! I kanelom ikalem kak kon fut dukusomi, kait gol so, tum filik falak so, tum win fian so wenkabiliw ilim minggimokoliw te! Mesik esik minggiliw tewe, kunum waneng im kiin e kiinsilili yom dim kuw kemokoliw kasike.
10 Kate, nimin waneng ite mak Sunbin-Got em weng afak keko, gelewiw tewe, i mali kunum waneng ilo dokolew dokolew kukuw kuw gelewbina! Gelewbiliw kukuw be ikalem kait atite atew keboke kasike.
11 Waneng im Sunbin-Got em weng kulamiw ding dim bakate, i ikalem de mit da kolewsomi, weng kimi angeko, boliwka!
12 Bomeliwi, i kanelom mali ilo Sunbin-Got em weng kukuyemeko, kunum im kamokim keko, kebokoliw te! Babo! I weng kimi angeko, afak boliwka!
13 Nimtew angom? Sunbin-Got e Adam elo esik dukusomi, Iw ulo ibik elote dukuse kasike.
14 Fein! Seten-Ataanim e Adam elo funum kelewinba kese kate, em kalel ulo funum keumei, usik em dasuw weng elo “Fein!”, dangeko, Sunbin-Got em weng sakalaw keko, weng bo bo kelewko, sili sili nam kukuw kesu kale.
15 Kaneko kasike, waneng i ikalem Sunbin-Got ilo duyemkabe aluwbamin aluwko, aul duku kemoliwka! Kebomeliwi, i Kulais elo “Fein!”, dangbiliw em kukuw so, mali ilo ibolow fian dulew dulew kukuw so, Sunbin-Got em fukunin kiol gelewomin em kukuw so, ibolow nanbow kebin em kukuw so, kukuw alik alik beem deiw ete kuw kakamiw tewe, Sunbin-Got e biim kuankemin deiw fein bul gewsi belei, okileweko, ilo akalem mit finik so deiw mo koyemoke te.