इफिसियों के लिए पौलुस की चिट्ठी
इफिसियों के निता पोलुस कर चिट्ठी
परचा
इफिसियों के लिखे चिट्ठी लगभग उहै टेम लिखे गय रथै जब कुलु के मसीह के पइदा के 60 साल के बाद लिखे गय रथै। लेखक खुदय के प्रेरित पोलुस 1:1के रूप हे पहिचान देथै। अधिकांस बिदमान हइ बात लग सहमत हबै कि पोलुस इफिसियों के लिखिस, भले ही एहमा कुलु हे पाय जाय बाले मनसे के नमस्ते के अभाव हबै। हइ कारन लग इके परदेस के कइ चरचा हे परसारित करै के सोंच हुइ सकथै। पोलुस इहो लिखिस कि जब ऊ चिट्ठी 3:1; 4:1अउ 6:20 लिखे रथै। तब ऊ जेल हे रथै पोलुस तखिकुस के इफिसुस के मंडली के यातरा हे जाय के निता पठोथै। 6:21-22
इफिसुस एसिया माइनर परदेस के निता बोहत बडा सहर अउ रोमन राजधानी रथै। इफिसुस अपन मंदिर के निता परसिध्द रथै जउन ग्रीक देबी आर्टेमिस के समरपित रथै, प्रेरितो 19:23-31 इफिसुस के मंडली अक्ठी बोहत मजबूत सुरुवात करथै पय बाद हे आत्मसंतुस्ट हुइ गइस। परकासितवाक्य 2:1-7
पोलुस हइ चिट्ठी के पहिले भाग हे समझाथै, कि कसना भगवान अपन मनसेन के चुनिस अउ उनके यीसु मसीह के दवारा उनही पाप लग बचाइस। ऊ मंडली के तुलना अक्ठी देह लग करथै जेहमा मसीह मूड के रूप हे हबै, अउ खास अधारसिला के रूप हे मसीह के संग अक्ठी इमारत के रूप हे हबै, किताब के दूसर भाग हे पोलुस मसीह जीवन के निरदेस देथै।
रूप रेखा
1. पोलुस अपन परचा देथै अउ इफिसियों के नमस्ते करथै। 1:1-2
2. फेर ऊ मसीह के संग मंडली के सबंध के समझाथै। 1:3—3:21
3. तब पोलुस लिखथै कि मसीहिन के कउन मेर जाय चाही। 4:1-6—6:20
4. आखरी हे पोलुस कुछ समापन टिप्पडी देथै। 6:21-24
1
1 पोलुस के पल्ला लग जउन भगवान के इक्छा लग यीसु मसीह के अक्ठी चेला हबै, उन पवितर अउ मसीह यीसु हे बिस्वास करै बाले मनसेन के नाम जउन इफिसुस सहर हे हबै।
2 हमर बाफ भगवान अउ परभु यीसु मसीह के पल्ला लग तुमही अनुगरह अउ सान्ति मिलत रहै।
मसीह हे आतमिक आसीस
3 हमर परभु यीसु मसीह के भगवान अउ बाफ के धन्यबाद होय, जउन हमही मसीह हे स्वरग छो सबैमेर के आतमिक आसीस दय हबै।
4 जसना ऊ हमही दुनिया के बनै लग आगू चुन लइस, कि हम ओखर लिघ्घो माया हे पवितर, अउ बिना निरदोस के होय।
5 हमर पल्ला भगवान के माया हबै, उहै के कारन ऊ यीसु मसीह के दवारा हमही अपन टोरवा के रूप हे स्वीकार करै जाय के निता ठहराइस, इहै ओखर इक्छा रथै अउ इहै ओखर उदेस्य रथै।
6 ताकि ओखर महिमा अउ किरपा के बडाई होय, ऊ अनुगरह किरपा हमही ओखर पिरिया टोरवा के दवारा मिलिस,
7 भगवान के अनुगरह किरपा केतका महान हबै, ऊ अपन टोरवा यीसु मसीह के खून के दवारा मुकति कराइस, मतलब हमर पाप छमा करे गइस,
8 जउन ऊ सगलू ग्यान अउ समझ,
सहित हमर उप्पर कुढाय हबै।
9 कि ऊ अपन इक्छा के भेद ऊ भले काम के जसना हमके गुठे हबै, जेही ऊ खुद हे ठान लय रथै।
10 भगवान के हइ इक्छा हबै कि सही टेम आमै लग स्वरग के अउ भुंइ के सगलू चीजन के मसीह हे अकजुट करै।
11 सगलू चीज भगवान के उदेस्य अउ फइसला के जसना करे जथै, भगवान हमही अपन खुदय के उदेस्य के कारन मसीह के संग अपन मनसेन के चुनिस, जउन सुरु लग कहे रथै।
12 ताकि जउन पहिले लग मसीह हे आसरा रखे रथन, भगवान के महिमा होय।
13 जब तुम ऊ सही के संदेस सुना जउन तुम्हर मुकति के संदेस रथै अउ जउन मसीह हे तुम बिस्वास करे रथा, ता जउन पवितर आतमा के टीमा करे रथै, मसीह के जरिये लग ओखर छाप तुम्हर उप्पर लगाय गय हबै।
14 ऊ आतमा हमर वारिस के रूप हे जमानत के रूप हे ऊ टेम तक हे दइ दय गय हबै, जब तक कि ऊ हमही जउन ओखर अपन हबै पूर मेर लग मुकति नेहको दइ देथै, एखर कारन मनसे ओखर महिमा के बडाई करै।
पोलुस कर बिनती
15 इहैनिता जब लग मै परभु यीसु मसीह हे तुम्हर बिस्वास अउ सगलू पवितर मनसेन के माया के बारे हे सुने हव,
16 मै तुम्हर निता भगवान के धन्यबाद लगेतार करथो, अपन पराथना बिनती हे तुमही सुरता करथो।
17 मै हइ बिनती करथो कि हमर परभु यीसु मसीह के भगवान महिमा के बाफ तुमही आतमिक ग्यान अउ उजियार अउ भगवान के ग्यान हे तुमही दिमाक अउ उजियार दे।
18 मै बिनती करथो, कि तुम्हर मन के आंखी उघर जाय ताकि तुम जाना कि तुम्हर बुलाय जाय के आसा अउ पवितर मनसेन के निता ओखर महिमा सुरु लग ओखर डेरा हबै।
19 अउ जउन बिस्वास करथै, ओहमा काम करै के ओखर सक्ति केतका बडा हबै, हमर भित्तर काम करै बाले सक्ति ओतकै बलवान हबै।
20 जउन भगवान यीसु मसीह हे करिस कि यीसु के मरे हर मसे जिन्दा करके ऊ स्वरग के जिघा हे अपन दहिना पल्ला बइठाइस।
21 अउ यीसु के अबहुन अउ आय बाले टेम के कउनो सासक, हक, सक्ति, प्रभुता अउ नाम के बोहत उप्पर ठहराइस।
22 सगलू कुछु उनखर गोडन के तरी करके उनके खास ठहराय के मंडली के दइ दइस।
23 मंडली मसीह के देह हबै, जउन सगलू कुछु सब मेर लग अपन उपस्थिति लग जिघा के भर देथै।