Ⅴ
Ʊ b'ʊ zu ʊ y
Ⅰ Ʊ danyɩnɔ, pakra bɛɛ m kʊ n nɩ ci ba awɔɔ ma n nɩ dɔmɩm gɛɛ wakatɩ kʊ minno nɔɔn duro n nɩ baŋ ʊ bɩ mim dɩnda awɔɔ nɩ y.
Ⅱ Bala, awɔɔ mɩŋŋɔɔ a dɔ a zim a ʊ, hinni kʊ Zuuba n nɩ zɛŋ ʊ bɩ, nyɩnta a nawʊm amba koor tɩr bʊr gunuu ʊ gʊaa n a wakatɩ dɔ bɩ m.
Ⅲ Kʊ gʊɔɔ bʊr ŋn'a hɩrɛ ŋ ʊ: «Laafɩɩ dɔmɩm wɔɔ n ta ʊ kɛɛrɛ, minsi ba ʊ y.» Dɔmɩm bɩ do fɩryɩrɛ n nɩ daata zɛrɛ ŋ la amba nyoosibarɛ tɩr daata zɛ lʊ jɩsɩzaa ra bɩ m, ŋ gɔsɩ bɩ bɔm lɛ nɩ y.
Ⅳ Bɩ k'awɔɔ nɩ, ʊ danyɩnɔ, monsigə bɛɛ awɔɔ n ta ʊ, kʊ dɔmɩm bɩ do n bɩ daata zɛ awɔɔ ra, amba koor tɩr daata zɛ gʊaa ra bɩ nɩ y.
Ⅴ Bala, awɔɔ haay, lɛɛgure gʊɔɔ n'awɔɔ m, sinuu gʊɔɔ n'awɔɔ m. Gunuu gʊɔɔ bɛɛ m wɔɔ nɩ, bɩ monsigə gʊɔɔ bɛɛ m wɔɔ m sɔ y.
Ⅵ Naa tɔ ma bɩ, ʊ bɩ hinceem ba am gʊɔɔ mɩsɩrɔ wɔɔ nɩ y, ʊ b'a to kʊ hɔsɩ n'ʊ zu ʊ y, ʊ ʊ da ʊ mɩŋŋɔɔ ma.
Ⅶ Hinceem zannɔ wɔɔ a ba ŋ nawʊm gunuu ʊ, gunuu ʊ ŋnɩ bɛɛ miŋ ʊ sɔ an nɩ ŋ zɛm.
Ⅷ Bɩ, wɔɔ kʊ sinuu gʊɔɔ m wɔɔ m nɔ wɔɔ, ʊ ʊ da ʊ mɩŋŋɔɔ ma, k'ʊ gɔɔta ʊ sɩra ka, ʊ bɩr ŋʊarɛ m, ɩ ʊ pɔyaa goŋŋo wɔɔ ka ʊ ma, ʊ bɩr bʊmbɔrɛ kʊ wɔɔ n nɩ zɛm ba yɩ bɩ taaheerlɛ m, ɩ ʊ, pɔyaa firgə wɔɔ ku ʊ mim ma.
Ⅸ Bala, Woso n wɔɔ bɔ ʊ k'a bɩ fɩr ka wɔɔ ma a nɔmaa nɔ ʊ y, bɩ wɔɔ bɔ a ʊ, kʊ wɔɔ n bʊmbɔrɛ yɩ wɔɔ Zuuba Yeezuu Krista tɔ ma.
Ⅹ Yeezuu Krista mɩŋŋa ɩ ga wɔɔ tɔ ma, k'an bɩr yɩrɛ ɩ ʊ, kʊ wɔɔ gɔɔta ʊ m mɩsɩr, gɛɛ gɩnga wɔɔ ʊ, kʊ wɔɔ m mɩsɩrbaa ba kan kɩ a zɛrɛ hinni ʊ.
Ⅺ Naa minto bɩ, k'a kʊ heer yo, a kʊ sɩrakarɛ da ra, amba awɔɔ n'a bam kara bɩ m.
Dʊndɔrɛrɔ kan leersore kɩ
Ⅻ M danyɩnɔ, gʊɔɔ kʊ ŋ nɩ Woso zi bam awɔɔ barla ŋnɩ karɛ awɔɔ lɛɛ, ŋn'awɔɔ bɔm zaa ʊ Zuuba zaa nɔ ʊ rɔ wɔɔ, a yɛ wɔɔ nawʊrɛ awɔɔ han k'a ŋ gore da ʊ.
ⅩⅢ K'a ŋ da ʊ gʊta kan ŋʊarɛ kɩ, ŋ zibəə bɩ minto. Awɔɔ haay, k'a bɩr laafɩɩ kan kʊ kɩ.
ⅩⅣ Ʊ danyɩnɔ, kʊ a yɛ a han, k'a həən si gʊɔɔ kʊ ŋ bɩr mɩsɩrbaa zore bam nɔ wɔɔ ma, k'a heerkoodəwarzannɔ heer yo, k'a a da paŋŋawarzannɔ han, k'a bɩr bʊraama m kan gʊaa haay kɩ.
ⅩⅤ K'a dundo a zi kʊ gɔsɩ b'a bʊnyaa sompi gʊaa n'ʊ y, bɩ k'a bɩr a karɛ a mɩŋŋa barɛ ma tee…, awɔɔ kan kʊ kɩ, kan gʊɔɔ haay kɩ bire ʊ.
ⅩⅥ K'a bɩr heernyɔɔ m dɔmɩm haay,
ⅩⅦ k'a bɩr yaa dam tee….
ⅩⅧ Mim woo… nɔ ʊ, k'a Woso barka da, bala, naa Woso lɛ n taa awɔɔ gʊr zi Krista Yeezuu zuure bɩ nɔ ʊ.
ⅩⅨ A b'a ta Sɛnt-Ɛspri zibəə m toore y,
ⅩⅩ a bɩ wosolɛsinnɩsora ganwʊrɛ meerbaarɔ gore bɔ ʊ y.
ⅩⅪ Bɩ, mim haay nɔ ʊ, k'a a hɔɔn da ma, a dɩga hɔ k'an mɩŋŋa a nɔ ʊ bɩ ma, a nyasʊ hɔ bɩ do m.
ⅩⅫ K'a a gʊ mimbʊnyaa do haay ma laatʊ.
ⅩⅩⅢ A yɛ wɔɔ nawʊm, kʊ wɔɔ Woso kʊ laafɩɩ karɛzaa m bɩ n'awɔɔ hu bɔ jilli, k'an dɔ awɔɔ hɔɔn ma, kan awɔɔ nyi kɩ a mɛ kɩ ma haay, kʊ minsi bɩ nyɩnta awɔɔ gʊr zi wɔɔ Zuuba Yeezuu Krista zɛrɛ hinni ʊ y.
ⅩⅩⅣ Woso mɩŋŋa y'awɔɔ bir, jɩnalɛrazaa m, an nɩ hɔ kʊ wɔɔ yɛ naa barɛ.
ⅩⅩⅤ Ʊ danyɩnɔ, k'a yaa da Woso m wɔɔ minto sɔ.
ⅩⅩⅥ K'a yaa da danyɩnɔ wɔɔ haay m, amba a a ga m bɩ m.
ⅩⅩⅦ Zuuba tɔ ma, a yɛ mɔɔ nawʊrɛ awɔɔ han paan…. K'a ci naa do karɩnda ba danyɩnɔ wɔɔ haay lɛɛ.
ⅩⅩⅧ A yɛ mɔɔ nawʊm kʊ wɔɔ Zuuba Yeezuu Krista barka n bɩr kan awɔɔ kɩ.