32
1 “Sanpaak nan tiŋ, gbatir n mɔmaan,
gbiintir fanu linba ki n yeen.
2 N wannu sii toot nan saak nba tuu toot nae,
ki saa baa tiŋ na paak nan marin na.
N mɔmaan saa baa nan nyun nba ki bi tuu maant bonbuburit nae,
ki sii tee nan samimmiiuk nba tuu baa mɔɔt paak na.
3 N saa dont Yennu sanne,
ki u niib saa wann u yabint nba tee biaŋinba.
4 “Yennu-e tee i guutɔɔ nba yab,
ki tee kasii nan barmɔnii u sɔnu kur ni.
I Yomdaanɔ be fanu nan barmɔnii,
ki tuun linba kur ŋan fanu.
5 Ŋaan i ki be fanu, ki ki jaŋ nan wun yiini u niibi.
I tee nibiit nan kpinkpannii damme.
6 Yimm jatit nan yankaarin damm na,
yaa saa dia Yennu biaŋinbae na-a?
U tee i baa nan i naamii daanɔe, ki nami ki i tee digbann.
7 “Tiat man linba gar yaayoo niwa;
boin i baanba ki bin wanni linba din tun.
Boin nikpera ki bin wanni linba gar.
8 Yabint daanɔ tur digbann kur li yente,
ki bɔkit nibooru kur nan bi kpaar,
9 ŋaan gann Jakɔb yaaboona ki bi tee u mɔŋ niib.
10 “U lab muuk ni, ki bi lin yirib siaminba tee kunkoouk
ki wouŋ da yoo kur,
ki u guub ki goriib fanu, nan waa saa got u mɔŋ biaŋinba na.
11 Nan baakir nba tuu tumii u bonbira yukiru biaŋinba,
ki gɔib ki tiab nan u kpinkpant na,
nnae ki Yennu guur Israel teeb ki bi ki baa.
12 Yennu kɔɔe dia u niib, ŋaan ki boi yensau sommir po.
13 “U te ki bi gorii tingbouŋ na, ki di linba kur pia kpaant ni,
ki laat siat tanfiat ni, ki bi kpan tilontii pia tansakirii ni.
14 Ki bi nei nan buunii teemm biin bonchiann.
Ki bi mɔk peŋanii nan buŋanii nan naaŋanii,
ki mɔk jeet nba ŋan, nan daŋanin.
15 “Yennu niib kpaatir nan mɔkint, ŋaan mɔk mɔyêtuk;
ki gbeŋit ki nɔr nan jeet, ki nyik Yennu, bi naamii daanɔ,
ki yêt bi yabint tinntɔɔ.
16 Ki bi yenbis jiantu na kɔɔn Yennu funfunn,
ki toonbiit nba ki bi tun na donn u wutoor.
17 Ki bi jiantir narinbiit nba ki tee Yennu
nan yenbis nba ki bi yeejamm din ki mi,
yennii nba ki Israel teeb din ki sakir.
18 Bi din tamm Yennu po,
wunba tee yabint tinntɔɔ ki turib manfoor na.
19 “Yennu nba din la nna na, ki u wutoor doo;
ki u yêt u bonjai nan u bonpoi,
20 ki yet a, ‘N ji kan ban sommib, ŋaan la linba saa baarib,
damm nba tee tubkangbata ki ki waan fanu na.
21 Bi patmannu nae donn n wutoor.
Li mɔkin funfunn nan bi yenbis na; yensau kaa ki mɔk nyɔɔti.
N saa jii digbanŋmaŋire ki donn bi wutoor,
n saa jii digbanliiŋ nnae ki kɔɔmm funfunn.
22 N wutoor saa doe nan muyeruk na,
ki di linba kur be tiŋ na paak.
Li saa di ki baar tinpɔɔr ni, ki bia di kunkona nba fɔk fiaka.
23 “ ‘Ki n saa te ki bonbiir n baarib ki sii kaa gbennu.
Ki n saa tɔ n peenii kur bi paak.
24 Ki kon nan gbanantouŋ nan yiarbiit saa kpib.
N saa tun bonkob-susoot ki bin lekib, nan waatont ki bin juntib.
25 Ki tɔbii saa faa ki kpi niib, doi sɔnjot ni;
ki jaŋmaanii saa soor niib, ŋei ni.
Naasimm nan sapaamm saa kpo;
li sanpantii koo nikpera gbaa kan tenni.
26 N bo saa biiribe fas fas, ki sɔɔ kii tian bi po,
27 ŋaan n ki loon ki bi datai n donn bi mɔŋ nan ŋamme kɔn
ki nyann n niib na, ŋaan ki li tee n mɔŋe biiribi.’
28 “Israel teeb tee digbann nba ki mɔk yame;
bi ki mɔk yanfoon nan waama.
29 Bi ki bann linbae teen ki bi datai nyannib.
Bi kan fit bann linba tumi.
30 Nlee ki yenɔ kɔn ki nyann bi tusiri,
ki banlee kɔn ki nyann bi tusaa piiki?
Linba na tun kimaan bi Yomdaanɔ Yennu nyikiba.
Bi Yabint Yennu jiib ki turib bi dataiwa.
31 Bi datai na mi nan bi mɔŋ yennii na ki mɔk paŋi,
ki ki tee yenjaana nan Israel teeb Yennu na.
32 Ki bi datai na tuun ki biir nan Sodom nan Gomora teeb na,
ki tee nan tilontii nba tuu lon lɔɔna ki li ton ki tee lɔbii na,
33 ki tee nan daan nba ki bi jii walabiri lɔbii ki ŋaa na.
34 “Yennu tian linba ki bi datai tun na po.
U guue a li yoo n baara ki wun dat bi tuba.
35 Yennu saa ŋmant bi paak ki dat bi tubawa;
yoo baate ki bi saa ŋat baa, bi biiru daar per na.
36 Yennu saa fat u niib, yoo nba ki u la ki bi paŋ gbenn.
U sii mɔk ninbatinu nan damm nba jiantirɔ na,
yoo nba ki u la baa chɔk biaŋinba.
37 Yennu saa boi u niib a, ‘Yenbis nba ki i teemm yada na be lee?
38 I jii i bonkob-kpamma ki mann maruŋ ki turib,
ki bia mɔɔn tilɔɔna daan bi paak a bin nyu.
Ŋaant ki bin baar ki tan fati mɔtana,
ŋaant ki bin chiar ki tan sommi.
39 “ ‘Bant mɔtana nan min kuukɔɔe tee Yennu,
yensau kaa ki tee barmɔnii Yennu.
Min Yennu kpi, ki bia teen manfoor,
n teen daŋ, ki bia teen laafia,
ki sɔɔ ki be ki saa fit fati n nuu ni.
40 Barmɔnii nan maa tee Yennu nba tun be na,
n donn n nuu sanpaapoe ki por
41 nan n saa ŋat n jukbanjiak ki tun buut toonn.
N saa ŋmat took n dataiwa, ki dat binba ki loonin na tuba.
42 N saa te ki n peenii n nyu bi sɔn,
ki n jukbanjiak na saa kpi wunba kur biirin.
N kan nyik bi sɔɔ nba kɔn nanin.
Binba la danii nan yommii na kur saa kpowa.’
43 “Digbana teeb, ii dont Yennu niib,
Yennu saa dat binba kpib na kur tuba.
U tuu dat u datai tubae, ŋaan nyik chab u niib bi biit.”
44 Ki Moses nan Joosua, wunba tee Nunn bija na ŋamm yet yaŋ na mɔbona, a Israel teeb na n gbat.
Ki jiin Moses kpaanjoontii po
45 Moses nba wann niib na Yennu sennu na ki gbenn yoo nba,
46 ki u yetib a, “Ii bann i yan ni man, ki sak wei sennu nba ki n teeni dinna na kur fanu. Ii jiir ki wann i waas ki bii dia Yennu sennii maŋ kur.
47 Wannu na ki tee mɔbonkoona kaa, li tee i manfoore. Ii mɔk mɔsaku nann, ki i saa wei tiŋ nba be Jɔɔdann mɔk-pootir, ki i saa kɔɔ kar na ni.”
48 Daar maŋ niŋe ki Yennu yet Moses a,
49 “Ii saa Abarim kunkona peŋ, linba be Moab tiŋ ni, ki yeek nan Jeriko doo na. Domin Nebo kunkonn ki got diit Keenann tiŋ, linba ki n jikit ki teen Israel teeb ki li sii tee bi yent na.
50 Ki a saa kpo kunkonn maŋ paak, nan a ninja Aarɔnn nba din kpo Hor jɔɔr paak biaŋinba na,
51 kimaan i banlee na ki sak n mɔb, Israel teeb tɔɔnn, yoo nba ki i din be Meriba nyun boor, ki kpia Kades doo, Sinn kunkoouk paak na, ki i ki baakitin niib na tɔɔnn.
52 A saa la tiŋ maŋ banfɔkira, ŋaan a kan kɔɔ tiŋ maŋ ni, tiŋ nba ki n jikit ki teen Israel teeb na.”