14
Biaŋinba ki Hosea barin Israel teeb
1 Israel teeb, jenin man i Yomdaanɔ Yennu boor. I yanbɔmm nae te ki i jarin ki baa.
2 Jenin ki baar Yennu boor, ki ŋaan i Yenmiaru na-ii tee Yenpiinii ki i teenɔ a, “Nyikin chabit ti yanbɔmm kur, ŋaan gaar ti miaru na, ki tin paka nan taa senn mɔsonn biaŋinba na.
3 Asiria teeb kan fit tinniti, ki tɔb taanii kan fit guuriti. Ti ji kan ban yet tingbana na nan ŋamme tee ti Yomdaanɔ. Yennu, fine mɔk ninbatinu ki teen binba ki mɔk sɔɔ ki saa boi sommir po na.”
Biaŋinba ki Yennu senn mɔsonn nan Israel teeb saa la manfopaann
4 Yennu yet a, “N saa te ki n niib n jen n boor.
N sii loomm nan n par kur,
ki n ji kan ban donn wutoor bi paaki.
5 N sii tee nan saak nba tuu baa tinkooŋ paak nae
ki tur Israel teeb,
ki bi saa yit nan tipuut nae, ki saa baa jiina fanu
nan Lebanonn tiinii nba tee biaŋinba na.
6 Bi sii mɔk manfoor nan kpaat ŋanu,
ki sii mɔk fant nan kpan tiinii na,
ki mɔk nubirmann nan Lebanonn kpekii na.
7 Niib na lek sii be n lɔŋ nie,
ki bi saa bur jeet bi kpaant ni, ki lin nan.
Ki bi sann saa do nan Lebanonn daan sann nba doo biaŋinba na.
8 Israel teeb ji kii mɔk tingbana.
N saa gat bi miaru, ki gotib,
ki bakin bi paak nan timaatik na.
Mine tee bi piisin kura jiinn.”
Majoontkara
9 Niib nba tee yandamm na, ŋamme saa bann maan nba sɔb gbouŋ na ni paak, ki bia jiir teen bi para ni. Yennu sɔnii took, ki niib nba tee niŋamm waar, ŋaan toonbiit damm jarime ki baa tiŋ ni, kimaan bi yêt wannu nawa.